මහජන සෞඛ්‍ය පරීක්ෂක නිලධාරීන්ගේ සංගමයේ සභාපති උපුල් රෝහණ සඳහන් කළේ එළඹෙන ජනාධිපතිවරණයේ ඡන්ද ඉලක්ක කරගෙන ඇතැම් ආධාරකරුවන් වතුකරයේ කම්කරු ජනතාව අතර කෘතීම බෝතල් රා නොමිලයේ බෙදාහරින බවට මැතිවරණ නිරීක්ෂණ සංවිධාන විසින් සිදුකරන ලද අනාවරණය කරගෙන ඇති බවයි.
කෘතීමව නිපදවා බෝතල් කළ රා පරිභෝජනය කරන ජනතාව අතර සිදුවිය හැකි සෞඛ්‍ය අවදානම පිළිබඳ විශේෂ අධ්‍යයනයක් සිදුකර එම තොරතුරු රජය ඇතුළු වගකිවයුතු පාර්ශ්වවල අවධානයට යොමු කරන බව මහජන සෞඛ්‍ය පරීක්ෂක නිලධාරීන්ගේ සංගමය පවසයි.
බෝතල් කළ කෘතීම රා වර්ග පාරිභෝජනය නිසා සිය ශ්‍රම බළකාය දැඩි සෞඛ්‍ය අවදානමක පසුවන බවට තේ සහ රබර් වතු පරිපාලනාධිකාරිවරුන් ද මහජන සෞඛ්‍ය පරීක්ෂකවරුන් වෙත පැමිණිලි කර තිබෙන බව පැවසූ උපුල් රෝහණ මහතා බෝතල් කළ රාවල අන්තර්ගතය පිළිබඳ විධිමත් අධ්‍යයනයක් කර ඒ සම්බන්ධයෙන් ජනතාව දැනුවත් කරන බව කීය.
එහිදී වැඩිදුරටත් අදහස් දැක්වූ මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ;
“කෘතිමව රා නිපදවන බවට සහ ඒවායේ අන්තර්ගතය සෞඛ්‍යට අහිතකර බවට විවිධ තොරතුරු වාර්තා වෙනවා. එතුළින අනාගතයේ ශ්‍රම බලකායට විවිධ සෞඛ්‍ය ගැටළු වලට මුහුණ දීමට සිදු වන බව නියතයි. ඒ පිළිබඳ විධිමත් ආකාරයේ අධ්‍යයනයක් සිදු කර නොමැති නිසා අපි මේ ගැන සොයා බලා ජනතාවට තොරතුරු කියන්න තීරණය කළා”.