පාර්ලිමේන්තු මන්ත්‍රී රවුෆ් හකීම් අකුරණදී පැවැත්වූ සමගි ජන බලවේග ජන රැලියක් ඇමතූ අවස්ථාවේදී එම ප්‍රදේශයේ රැලියට සහභාගී වූ ජනතාව පසුගියදා (අගෝ. 23) හූ තබමින් දැඩි විරෝධතා පළ කර ඇත.
රවුෆ් හකීම් මන්ත්‍රීවරයා ගෙන යන දැඩි ජාතිවාදී ප්‍රචාර මෙම විරෝධයට මූලික හේතුව බවට පත්වී ඇතැයි කියයි.
හූ හඬ මැද වුවද රැලිය ඇමතීමට ශ්‍රී ලංකා මුස්ලිම් කොංග්‍රස් නායක රවුෆ් හකීම් පාර්ලිමේන්තු මන්ත්‍රීවරයා උත්සාහ කළත් ජනතා විරෝධය දැඩිවීමත් සමග ඔහුට විනාඩියක පමණ කාලයකින් එම වේදිකාවෙන් බැස යෑමට සිදුව ඇති බව ද වාර්තා වේ.
හූ හඬ එල්ල වීමත් සමග රාවුෆ් හකීම් මන්ත්‍රීවරයා සිය කතාව නවත්වා දැමූ නමුත් නැවත සිය කතාව ආරම්භ කළ විට ජනතාව දිගින් දිගට ම ‘හූ’ තියමින් මන්ත්‍රීවරයාට විරෝධය පළ කර තිබේ.
යළි සිය කතාව ආරම්භ කළ හකීම් මන්ත්‍රීවරයා,
“ප්‍රචණ්ඩත්වය ගැන කියන කොට දැන් ගර්භාශයේ අන්තවාදයක් ගැන කතාවක් යනවා. ඒ කතාව උඩ දැන් මට එන්තරවාසියක් ඇවිත් අපේ හාමුදුරුවනේ. ඒ එන්තරවාසිය ඒම තුළ ඒක සාධාරණීකරණය කරන්න හදනවා අපේ හාමුදුරුවනේ. ඒ ගැන අපිට ප්‍රශ්නයක් නෑ. මම ඉතා ම ගරු ගාම්භීරත්වයෙන් කියා සිටිනවා ඕනෑ ම නඩුවකට මුහුණ දෙන්න ලෑස්තියි. ඒක පිළිබඳව මම පෞද්ගලිකව උසාවියට ගිහිල්ලා නඩු කියනවා.” යනුවෙන් පැවසීය.
ජනාධිපති අපේක්ෂක, විපක්ෂ නායක සජිත් ප්‍රේමදාස ප්‍රධාන ආරාධිත දේශකයා ලෙස සහභාගී වූ මෙම ජන හමුවට රෝහිණී කවිරත්න, තිස්ස අත්තනායක, ලක්ෂ්මන් කිරිඇල්ල සහ හිටපු පාර්ලිමේන්තු සුජීව සේනසිංහ යන පිරිසද අකුරණ රැලියට එක්ව සිටියහ.