වසය අවුරුදු 19න් පහළ හිටපු ක්‍රිකට් ක්‍රීඩක ධම්මික නිරෝෂන් ඝාතනය කිරීමට මීට පෙර අවස්ථා දෙකක දී උත්සහා කර ඇති අතර ඉතාලියේ සහ ඩුබායි රාජ්‍යයේ සිටින පුද්ගලයින් දෙදෙනෙකුගේ සැලසුම් මත මෙම ඝාතනය සිදු කර ඇති බව වාර්තා වනවා.
සිද්ධිය සම්බන්ධයෙන් අත්අඩංගුවට ගත් සැකකරුවන් මේ බව ප්‍රකාශ කර ඇති බවයි, පොලිස් ආරංචි මාර්ග උපුටා දක්වමි ජාතික පුවත්පතක් තොරුතරු වාර්තා කළේ.
ඊට යොදාගත් ගිනි අවිය ඉතාලියේ වෙසෙන අයෙක් විසින් ලබා දී ඇති බවට තොරතුරු වාර්තා වන අතර ධම්මික නිරෝෂන් ඝාතනය කිරීම සඳහා තිදෙනෙකුගෙන් සමන්විත කණ්ඩායමක් සම්බන්ධ වී තිබෙනවා.
තමන් විසින් වෙඩි තැබීමෙන් අනතුරුව සෙසු පුද්ගලයා විසින් මන්න පිරි පහර එල්ල කළ බවයි, වෙඩික්කරු පොලිසිය හමුවේ පාපෝච්චාරණය කර ඇත්තේ.මෙම වෙඩික්කරු අත්අඩංගුවට ගැනීම සඳහා පොලිසිය විසින් CCTV දර්ශන භාවිත කර තිබුණා.
ධම්මික ඝාතනය සඳහා මොහුට අමතරව තවත් පුද්ගලයකු අත්අඩංගුවට ගැනුණා. ඔහු සන්තකයේ තිබී අදාළ අපරාධය සිදු කිරීමට යොදාගත් ගිනි අවිය සොයාගෙන ඇති බවටයි තොරතුරු වාර්තා වන්නේ. එම පුද්ගලයා සමඟ සමීප සබඳකම් පැවැත් වූ කාන්තාවක් ද අත්අඩංගුවට ගෙන ඇති බව සඳහන්. ධම්මික ඝාතනයට පෙර සහ පසු ඇගේ බැංකු ගිණුමට රුපියල් ලක්ෂයක් බැර වී ඇති බවටයි මූලික විමර්ශනවල දී අනාවරණ වී ඇත්තේ.
ධම්මික නිරෝෂන් පසුගිය 16 වැනිදා රාත්‍රියේ වෙඩි තබා මරා දැමුණු අතර පරණ කෝන්තර දෙකක් ඔහුගේ ඝාතනයට ඉවහල් වී ඇති බවට ද තොරතුරු වාර්තා වනවා.