බංග්ලාදේශයේ ජාතික රූපවාහිනියට ගිනි තබයි – විරෝධතාවලින් පුද්ගලයින් 32 ක් මරුට !

බංග්ලාදේශ රජයට එරෙහි විරෝධතා දක්වන ප්‍රචණ්ඩකාරී විරෝධතාකරුවන්, ඩකා අගනුවර බංග්ලාදේශ ජාතික රූපවාහිනිය පිහිටි මූලස්ථානය වන BTV ගිනි තබා තිබෙනවා.

ජාතික රූපවාහිනිය අයත් එක් ගොඩනැගිල්ලක් ගිනි ගත් අවස්ථාවේ බොහෝ දෙනෙක් එම ගොඩනැඟිල්ල තුළ සිර වී තිබෙනවා.

කලහකාරී විරෝධතාකරුවන් රූපවාහිනී පරිශ්‍රයට ඇතුළු වූයේ ආරක්ෂක අංශ නිලධාරීන්ට සහ සේවක සේවකයන්ට පහර දෙමින් බවද විදෙස් මාධ්‍ය වාර්තා කරනවා.

ගිනි තැබීමත් සමග එහි සිටි බොහෝ දෙනෙකු ගින්නට කොටුවී ඇති අතර ගිනි නිවන හමුදා මැදිහත් වී එම පිරිස් බේරාගෙන තිබෙන බවයි වාර්තා වන්නේ.

විශ්ව විද්‍යාල සිසුන් විසින් සංවිධානය කරන මෙම විරෝධතා මාලාව විරෝධතා මැඩ පැවැත්වීම සඳහා පොලිසිය විසින් වෙඩි තැබීම් කිහිපයක් ද සිදුකර තිබෙනවා.

මෙම විරෝධතා හේතුවෙන් මේ වන විට අවම වශයෙන් පුද්ගලයින් 32 මියගොස් ඇති බව විදෙස් මාධ්‍ය වාර්තා කරනවා.

රජයේ රැකියා සඳහා ආන්දෝලනාත්මක කෝටා ක්‍රමයක් යළි ස්ථාපිත කිරීමට එරෙහිව මෙම විරෝධතා ආරම්භ වුණා.

මේ වන විට එරට සමාජ මාධ්‍යද සම්පූර්ණයෙන් අවහිර කිරීමටත් දුරකථන මාර්ග ද අක්‍රිය කිරීමට පියවර ගෙන ඇති බවයි සඳහන් වෙන්නේ.