ව්‍යාපාරික රනිල් විල්ලද්දරගේ ‘රනිල් ජනපති’ කරන්න පෙරට එයි

රටේ ඇතිවූ ආර්ථික අර්බුදය කළමනාකරණය කළ ජනාධිපති රනිල් වික්‍රමසිංහ මහතා යළිත් ජනාධිපති ලෙස පත් කළ යුතු බව ව්‍යාපාරික හා කැස්බෑව එක්සත් ජාතික පක්ෂ කළාප සංවිධායක රනිල් විල්ලද්දරගේ මහතා පැවසීය.

ඒ මහතා මෙම අදහස් පළ කර සිටියේ එක්සත් ජාතික පක්ෂයේ කැස්බෑව තුම්බෝවිල සිය මැතිවරණ කාර්යාලය ඊයේ (09) විවෘත කරමිනි.

එහිදී වැඩිදුරටත් අදහස් දැක්වූ රනිල් විල්ලද්දරගේ මහතා,

“දේශපාලන ගමන් මගේ අලුත් කඩයිමක් ආරම්භ කරන දවසක්. වසර 15 කට ආසන්න කාලයක් ව්‍යවසායකයෙක් ලෙස කටයුතු කර ඒ තුළින් ලද අද්දැකීම් සමග දේශපාලන ගමන් මග අදින් ආරම්භ කරනවා.

රනිල් වික්‍රමසිංහ ජනාධිපතිතුමා මේ අවස්ථාව මා වෙත ලබා දීම ගැන මම අවංකවම සතුටු වෙනවා. දේශපාලන ගමන් මගේ පළමු අරමුණ රනිල් වික්‍රමසිංහ මහතා නැවත ජනාධිපති බවට පත් කිරීමයි.

1948 නිදහසින් පසු මේ රටේ දේශපාලඥයින් දේශපාලනයේ නිරත වුනා. අවසානයේ සිදු වූ දේ අපි දැක්කා. ඒකට අපි සියලු දෙනා වගකිව යුතුයි. අපි මෙච්චර දවස් දැක්කේ දෙපැත්තට බෙදිලා බැනගෙන කාලය නාස්ති කරපු එක. එතනින් එහාට ගිය නව දේශපාලන සංස්කෘතියක් අවශ්‍යයි. පවතින අර්බුදයෙන් රට බේරා ගැනීමේ වගකීම දේශපාලඥයින්ට මෙන්ම පුරවැසියන්ටත් තියෙනවා. ඇතිවූ ආර්ථික අර්බුදයෙන් මහජනතාව බේරා ගැනීම සඳහා ව්‍යවසායකයකු වශයෙන් මටත් වගකීමක් තියෙනවා. එතනදි මාගේ ව්‍යාපාර වලින් 51% ක් මහජනතාවට දෙනවා කියලා පොරොන්දුවක් දුන්නා. ඒ මේ රටේ ජනතාව වෙනුවෙන් යම් කැපකිරීමක් සිදු කළ යුුතු නිසයි.

රනිල් වික්‍රමසිංහ ජනාධිපතිතුමා රටේ පැවති අර්බුදය මනාව කළමනාකරණය කළා. පසුගිය අවුරුදු දෙක තුළ දේශපාලනඥයකු ලෙස නොවේ නායකයකු හා ව්‍යවසායකයකු ලෙස කටයුුතු කරමින් රටේ ඇතිවූ අර්බුදය ජයග්‍රහණය කල අයුරු අපිට දකින්න පුලුවන්.

ව්‍යාපාරයක් ගත්තම ඒක ආරම්භ කරන්න ඕනේ. පවත්වාගෙන යන්න ඕනේ. ව්‍යාපාරයක තියෙන බරපතල අභියෝගය තමා ව්‍යාපාරය බංකොලොත් වුනාම නැවත ප්‍රකෘති තත්ත්වයට ගේන එක. ව්‍යවසායකයකු විදියට බැලුවම ව්‍යවසායක මනසක් තියෙන, දැක්මක් හා පරිනත නායකයකුට පමණයි රට අර්බුදයෙන් ගොඩදාන්න පුලුවන්. එවැනි හැකියාවක් ඇති නායකයෙක් විදියට රනිල් වික්‍රමසිංහ මහතාව දකින්න පුලුවන්. රටේ ඇතිවූ අර්බුදය කළමනාකරණය කරමින් රට ජයග්‍රහණය කරා මෙහෙයවීමට රනිල් වික්‍රමසිංහ මහතා තුළ වූ හැකියාව හා නායකත්වය එතුමා තෝරා ගැනීමට හේතු වුනා.

ආර්ථික අර්බුදයක් තිබුනු රටක් කළමනාකරණය කරමින් එය වෙනස් කළ නායකයෙක්ට මේ රට භාර දෙනවද ? එහෙම නැතිනම් කිසිදු අවබෝධයක් නැති අයෙකුට රට භාර දෙනවද ? කියන එක ජනතාව තීරණය කරන්න ඕනේ. ඒ නායකත්වය වෙනස් කරන්න යෑම ලොකු මෝඩකමක්.

ව්‍යවසායකයකු විදියට Gflock කියන සන්නාමය ගෝලීය වශයෙන් ප්‍රවර්ධනය කරමින් කලින් පොරොන්දූ වූවා සේ ශ්‍රී ලංකාවේ ඩොලර් අර්බුදය කඩිනමින් විසදීමට කටයුතු කරනවා. එමෙන්ම ශ්‍රී ලංකාව තුළ නව තරුණ ව්‍යවසායකියන් ගොඩනැංවීමටත්, ඒ සඳහා අවශ්‍ය මග පෙන්වීම ලබා දීමට කටයුතු කරනවා. ඒ සඳහා ජනාධිපතිතුමාගේ දැක්ම හා වැඩපිළිවෙළ සමග වැඩ කරනවා. සෘජු හා වක්‍ර රැකියා විශාල ප්‍රමාණයක් ලබා දෙමින් මේ රටේ විරැකියාව අවම කිරීමට දායකත්වය ලබා දුන් ආයතනයක් ලෙස Gflock ආයතනය පෙන්වා දිය හැකියි. විරැකියා ප්‍රශ්නයට විසදුමක් සෙවීමට වගේම විදේශ විනිමය අර්බුදයන්ට අපි වැනි ව්‍යවසායකයින් හරහා ස්ථිර සාර විසදුම් සෙවීමට ජානාධිපතිතුමාට අවශ්‍යතාවයක් තියෙනවා. ඒ සඳහා අපි එතුමා සමග අත්වැල් බැඳ ගත යුතුයි.”