ධම්මික පෙරේරාගේ නිවස ඉදිරිපිට නොසන්සුන් තත්වයක් !

පාර්ලිමේන්තු මන්ත්‍රී ධම්මික පෙරේරා මහතාගේ නිවස ඉදිරිපිට නොසන්සුන්කාරී තත්ත්වයක් නිර්මාණය වී තිබෙනවා.

ඒ, වතුකම්කරුවන් පිරිසක් විසින් ආරම්භ කර ඇති විරෝධතාවයක් හේතුවෙන්.

රජය විසින් වැඩි කළ රුපියල් 1700ක වැටුප ඉල්ලා ඔවුන් අද (09) ලංකා වැවිලිකරුවන්ගේ සංගමයේ කාර්යාලය විරෝධතාවක් ආරම්භ කළා.

එහි දී උද්ඝෝෂකයින් විසින් එම සංගමයේ මාධ්‍ය ප්‍රකාශක ආචාර්ය රොෂාන් රාජදුරෙයි මහතා හට දැඩිව විරෝධය එල්ල කළ බව සඳහන්.

මීට පෙර මාධ්‍ය ප්‍රකාශකවරයා කියා සිටියේ, වැටුප ඉහළ නංවන ලෙස රජය ප්‍රකාශයට පත් කළ ද නිෂ්පාදන පිරිවැය ඉහළ යාම හේතුවෙන් මේ අවස්ථාවේ එය ඉටුකිරීමේ හැකියාවක් නොමැති බවයි.

එහි දී විරෝධතාකරුවන් රාජදුරෙයි මහතාගේ රුව සහිත පෝස්ටරයකට සෙරප්පුවලින් පහරදී ඔහුගේ රුව සහිත පඹයෙකු පුළුස්සා දැඩි ලෙස විරෝධය පල කළ බව සඳහන්.

ඒ මහතා ධම්මික පෙරේරා මහතාට අයත් හේලිස් සමාගමේ කළමණාකාර අධ්‍යක්ෂකවරයෙක් ලෙසද සේවය කරනු ලබනවා.

ඒ හේතුවෙන් විරෝධතාකරුවන් ව්‍යාපාරිකයෙකු වන ධම්මික පෙරේරා මහතාගේ කොළඹ – රීඩ් මාවතේ පිහිටි නිවස ඉදිරිපිටට පැමිණ සිය විරෝධය පළ කළ බවයි අප වාර්තාකරු සඳහන් කළේ.