අතුරුගිරිය ක්ලබ් වසන්ත ඝාතනයේ ඝාතකයා ඇතුළු තවත් කරුණු රැසක් එළියට !

කැරොකේ අවන්හල් ජාලයක හිමිකරුවෙක් වන ව්‍යාපාරික සුරේන්ද්‍ර වසන්ත පෙරේරා නොහොත් කැරොකේ වසන්ත ඇතුළු දෙදෙනෙක් ඝාතනය කරමින් සහ ජනප්‍රිය ගායිකා කේ.සුජීවා ඇතුළු සිව් දෙනෙකුට තුවාල සිදුකරමින් අතුරුගිරියේ ටැටූ රූපලාවන්‍යාගාරයකදී එල්ලවුණු වෙඩි ප්‍රහාරය ප්‍රබල මත්කුඩු ජාවාරම්කරුවෙක් වන කංජිපානි ඉම්රාන් විසින් මෙහෙයවා ඇති අතර වෙඩි තැබූ සෑම උණ්ඩයකම පාහේ KPI ලෙස සටහන්කර ද තිබී ඇත.

මෙතෙක් ඉතිහාසයේ පාතාල අපරාධකරුවන් වෙඩි උණ්ඩයේ සිය නම සටහන්කර වෙඩි තබා නැති බවත් එසේ පාතාල සිය නම වෙඩි උණ්ඩයේ සටහන්කර එල්ලකළ ප්‍රහාරය වන්නේ මෙය බවත් පොලිස් තොරතුරු සඳහන් කළේය.

පුද්ගලයින් දෙදෙනෙක් ටී 56 අවි දෙකකින් මෙම වෙඩි තැබීමකර ඇති අතර එම අවිවලින් පිටවූ උණ්ඩවල හිස්කොපුවල පැහැදිලිවම KPI යනුවෙන් පෑනකින් සටහන්කර ඇති බව විමර්ශන නිලධාරීන්ට පෙනී ගොස් තිබේ.

මෙම පතොරම්වල පැහැය සාමාන්‍ය පතොරම්වලට වඩා වෙනස් බැවින් යම් ද්‍රාවනයක් එහි ආලේපකර තිබේදැයි දැන ගැනීමට රස පරීක්ෂක වෙත ඉදිරිපත්කර ඒ සම්බන්ධයෙන් වාර්තාවක් ගැනීමටද නියමිත බව පොලිස් තොරතුරු සඳහන් කළේය. සැකකරනුයේ මෙම පතොරම්වල රන් ආලේපිත කර ඇති බවය.

කැරෝකේ වසන්ත විසින් වෙඩි නොවදින සුරයක් පළදින අයෙක් බැවින් සුරයේ බල බිදිමින් ඔහුට වෙඩි තැබීමට පතොරම්වල රන් ආලේපිත කර තිබේදැයි සැකයක් මේ සම්බන්ධයෙන් විමර්ශන පවත්වන පොලිස් කණ්ඩායම් වල සිටින ඇතැම් නිලධාරීන් සැකකරති.

මෙම වෙඩි තැබීම කැරෝකේ වසන්තම ඉලක්කරගෙන එල්ලවී ඇති බව පෙනී යන බව විමර්ශන වලින් පෙනී ගොස් තිබේ.

කැරොකේ වසන්තගේ මූලිකත්වයෙන් විවෘත කෙරුණු රූපලාවන්‍යාගාරය ජනප්‍රිය ගායන ශිල්පිනි කේ . සුජීවා මහත්මියට අයත් එකකි. අතුරුගිරිය හන්දියේ කඩුවෙල පාරේ දෙමහල් ගොඩනැගිල්ලක ඉහළ මහලයේ කාමරයක මෙම ටැටූ රූපලාවන්‍යාගාරය විවෘතකර ඇත. කැරොකේ වසන්ත ඇතුළු ආරාධිතයන් රූපලාවන්‍යාගාරය තුළ සිටියදී සුදු පැහැති මෝටර් රථයකින් පැමිණි වෙඩික්කරුවන් දෙදෙනා ගිනි අවිද අමෝරාගෙන තරප්පුපෙල මතින් පැමිණ එකවර වෙඩි වර්ෂාවක් වසන්තව ඉලක්කකරගෙන එල්ලකරගෙන ඇති බව විමර්ශනයේදී පෙනී ගොස් ඇත. මෝටර් රථයෙන් වෙඩික්කරුවන් පැමිණ ඉහළ මහලට ගමන්කර වෙඩි තබන අයුරු ආරක්ෂක කැමරාවලද පැහැදිලිවම සටහන්ව තිබී ඇත. ආරක්ෂක කැමරාවල එම අවස්ථාවේ වේලාව සටහන්ව ඇත්තේ පෙරවරු 10.15 ලෙසිනි.

වෙඩික්කරුවන් දෙදෙනා ගිනි අවි අතැතිව මෝටර් රථයෙන් බසින්නේ ගොඩනැගිල්ල දෙසට ඇති පිටුපස පැති දොරිනි. ඉතා වේගයෙන් පැතිදොර විවෘතකර ඒ ක්ෂණිකව ගිනි අවි අතැතිව එළියට එන ඔවුන් දෙදෙනා වේගයෙන් ඉහළ මහලට ගොස් රූපලාවන්‍යාගාරයේ දොර අසල සිට එකවරම වෙඩි ප්‍රහාරය එල්ලකර ඇත්තේ කැරොකේ වසන්ත සිටි දෙසට බව විමර්ශන වලින් හෙළිවී තිබේ. ඔවුන් දෙදෙනා මාස්ක් පැළද සිට ඇති බවත් එක් අයෙක් කැප් එකක් පැළද සිට ඇති බවත් ආරක්ෂක කැමරාවල සටහන්ව ඇත.

වෙඩික්කරුවන් දෙදෙනා එක දිගට වෙඩි වරුෂාවක් තැබීමෙන් අනතුරුව එක් වෙඩික්කරුවෙක් ටී 56 අවියේ පතොරම් ගැබ ගලවා මේසයක් මත තබා තවත් පතොරම් ගැබක් සොයන අයුරුද ආරක්ෂක කැමරාවේ සටහන්ව තිබී ඇත. ඔවුන් අමතර පතොරම් ගැබ් රැගෙනවිත් නොතිබුණු බැවින් නැවත මේසය මත තැබූ පතොරම් ගැබද රැගෙන පහළට දිවගොස් මෝටර් රථයේ නැගී පළාගොස් තිබේ. වෙඩික්කරුවන් දෙදෙනාගේ හැසිරීමත් වෙඩි තබන ආකාරයත්, පතොරම් ගැබ අවසන් වූ පසු එය ගලවා තවත් ගැබක් සොයා නැවත එම පතොරම් ගැබම ටී 56ට සවිකිරීමත් අධ්‍යනයේදී පෙනී යන්නේ වෙඩික්කරුවයන් දෙදෙනා පළපුරුදු වෙඩික්කරුවන් බව යැයි උසස් පොලිස් නිලධාරියෙක් සඳහන් කළේය.

මෙම ප්‍රහාරය එල්ලකළේ යැයි සැකකරන කංජිපානි ඉම්රාන් මේ වන විට ඩුබායි සහ ප්‍රංශය යන රටවල් දෙක අතර සංක්‍රමණය වෙමින් සිටින බවත් පකිස්තානයේ සිටින ප්‍රබල මත්කුඩු ජාවාරම්කරුවන් සමඟ ඔහුට ඝෘජු සම්බන්ධකම් ඇති බවත් බුද්ධි අංශ තොරතුරු සඳහන් කරයි. මොහු ප්‍රංශයේ දේශපාලන රැකවරණය අවස්ථා කිහිපයකදීම ඉල්ලා සිටි බවට තොරතුරුද බුද්ධි අංශයෙත ලැබී තිබුණි.

මෙම වෙඩි තැබීම හා මාකඳුරේ මධුෂ් නැමැති පාතාල අපරාධකරු ඩුබායි හීදී එරට පොලිස් අත්අඩංගුවට ගැනීම අතර සම්බන්ධයක් ඇති බවට සැකකරන තොරතුරුද මේ වන විට ඇතැම් විමර්ශන කණ්ඩායම් වෙත ලැබී තිබේ. මාකදුරේ මධුෂ්ගේ දියණියගේ උපන්දින සාදය 2019 වසරේ පෙබරවාරි 05 වෙනිදා පැවති අවස්ථාවේදී ඩුබායි පොලීසිය විසින් එම සාදය පැවති හෝටලය වටලා මධුෂ් ඇතුළු පිරිසක් අත්අඩංගුවට ගත්තේය. ඒ අතර ආරාධිතයන් ලෙස එහි ගොස් සිටි මෙරට ප්‍රසිද්ධ මෙන්ම ජනප්‍රිය ගායකයෙක්ද, නළුවෙක්ද ඇතුළු පිරිසක්ම සිටියේය. ඒ හැරුණු කොට අත්අඩංගුවටගත් අය අතර කංජිපානි ඉම්රාන්ද සිටියේය. ඩුබායි පොලිස් අත්අඩංගුවේ සති දෙකකට වැඩි කාලයක් රදවාගෙන සිටි කංජිපානි ඉම්රාන් මෙරටට පිටුවහල්කල අවස්ථාවේදී පවා ඔහු මාලදිවයින්ට පැන යාමට පවා සැළසුම්කර තිබුණි. ඒ ඩුබායි සිට මෙරටට පැමිණෙන අතරතුර මාලදිවයින බලා යාමට ගුවන් යානයක ගුවන්ටිකට්පත් වෙන්කර ගෙනය. කටුනායක ගුවන්තොටුපොලට පැමිණි ඔහු පිටතට නොපැමිණි බැවින් කළ පරීක්ෂාවේදී 2019 වසරේදී ඔහුව හසුවන්නේ මාලදිවයින් බලා පියසර කිරීමට සූදානමින් තිබුණු ගුවන් යානයට ගොඩවීමට සිටි මගීන් අතර සිටියදීය.

අත්අඩංගුවටගත් කංජිපානි කොළඹ අපරාධ කොට්ඨාශයභාරයේ තබාගෙන දීර්ඝ කාලයක් ත්‍රස්තවාදය වැලැක්වීමේ පනත යටතේ රදවාගෙන විමර්ශනයන් පවත්වනු ලැබීය. 2015 වසරේ මාර්තු 28 වෙනිදා මෙරටින් පළාගිය කංජිපානි ඉම්රාන් 2016 වසරේදී ඩුබායි වලින් මතුවන්නේ ආයෝජකයෙක් ලෙස ඩුබායී හී ව්‍යාපාර රැසක මුදල් ආයෝජනයක්ද කරමිනි. 2019 වසරේ ඔහු මධුෂ්ගේ දියණියගේ සාදයේදී ඩුබායි පොලීසියට හසුවන තුරු රැදී සිටින්නේ ආයෝජකයෙක් ලෙස ඩුබායි හී පිහිටි සුපිරි තට්ටු නිවාස සංකීරණයකය.

ඩුබායි වලින් පිටුවහල් කිරීමෙන් අනතුරුව වසරකට වැඩි කාලයක් රැදවුම් නියෝග මතත් වසර දෙකකට වැඩි කාලයක් බන්ධනාගාරගතවත් සිටි කංජිපානි ඉම්රාන් දැඩි ඇප කොන්දේසිමත අධිකරණය විසින් නිදහස්කරනු ලබන්නේ 2022 වසරේ දෙසැම්බර් 20 වෙනිදාය. ඇප ලැබීමෙන් පසු වෙස්වලාගෙන අධිකරණ භූමියෙන් පිටතට යන ඔහු පැය 24ක් යන්නට මත්තෙන් බෝට්ටුවක නැගී ඉන්දියාවට පැනගත් බව එකල කියැවිනි. මේ වන විට ඔහු රැදී සිටින්නේ යැයි කියැවෙන්නේ ප්‍රංශයේය.

මාකදුරේ මධුෂ්ව සහ තමාව ඩුබායි පොලීසියට හසුකර දීමට මුල්වූ සෑම අයෙකුගෙන්ම පළිගන්නා බව කංජිපානි ඉම්රාන් පවසා ඇති බවත් එහි ප්‍රතිඵලයක් ලෙස කැරෝකේ වසන්තගේ ඝාතනය සිදුවී දැයි සැකයක් බුද්ධි අංශ මතුකරයි. මාකදුරේ මධුෂ්ගේ දියණියගේ උපන්දින සාදයේ ආරාධිතයෙක් ලෙස කැරොකේ වසන්තද සිට ඇති බවත් ඔහු අවසන් මොහොතේ එම සාදයට සහභාගිවීමට ඩුබායි බලා යන ගමන නවතා දමා තිබුණු බවත් එකල කියැවිණි. මත්කුඩු ආරවුලක් මුල්කරගෙන මාකදුරේ මධුෂ්ව ඩුබායි පොලීසියට කොටුකර දී ඇත්තේ මත්කුඩු ජාවාරම්කරුවන් පිරිසක් බවද එකල කියැවිණි.

මාකඳුරේ මධුෂ්ගේ හිතවතෙක් බව කියන කැරොකේ වසන්ත විශාල මුදලක් මධුෂ්ගෙන් ණයට ලබාගෙන ඇති බවට තොරතුරක්ද බුද්ධි අංශ වෙත ලැබී තිබේ. එම මුදල රුපියල් ලක්ෂ 1400ක් පමණ වනු ඇති බව සඳහන්ය. ඒ ගැනද මේ වන විට වැඩිදුර සොයා බැලීමක් බුද්ධි අංශ විසින් සිදුකරනු ලබන්නේ මෙම වෙඩි තැබීමට ඒ හැම දෙයක්ම එකිනෙකට සම්බන්ධකමක් ඇතැයි පෙනී යන බැවින් යැයි උසස් පොලිස් නිලධාරියෙක් පැවසීය. කැරොකේ වසන්ත කනබොන ස්ථානවලදී මාකදුරේ මධුෂ්ට වැඩේ දුන්නේ යැයි නිතර පවසා ඇති බවට තොරතුරුද බුද්ධි අංශ වෙත ලැබී තිබේ. කැරොකේ වසන්ත කනබොන තැන්වලදී රොලැක්ස් වර්ගයේ මිල අධික ඔරලෝසුවක් පෙන්වමින් එය මධුෂ්ගේ යැයි පවසන බවට තොරතුරුද තිබේ. මේ හැම දෙයක් ගැනම විමර්ශනයට ලක්වෙන බව පොලිස් තොරතුරු සඳහන් කළේය.

වෙඩික්කරුවන් පැමිණි ටොයෝටා වර්ගයේ සුදු පැහැති මෝටර් රථය කඩුවෙල කොරතොට ප්‍රදේශයේ දමාගොස් තිබියදී වෙඩි ප්‍රහාරයෙන් පැයකට පමණ පසු පොලීසියට හමුවී ඇත. මෝටර් රථය අතහැර වෑන් රථයකින් වෙඩික්කරුවන් පළාගොස් ඇති බවත් වෙඩික්කරු දෙදෙනා හැරුණු කොට මෝටර් රථයේ රියදුරුද වෑන් රථයෙන් පළාගිය අය අතර සිටින බවත් විමර්ශනයේදී පෙනී ගොස් තිබේ. මෝටර් රථය අතහැර වෑන් රථයක නැගී ඔවුන් පළායන අයුරු දැක්වෙන ආරක්ෂක කැමරා දර්ශනද පොලීසියට හමුවී තිබේ. කොරතොට, යාකාල,වෙලේහංදිය හරහා කඩුවෙල නගරයටත් එතැන් සිට හේවාගම දෙසටත් වෑන් රථය ගමන්කර ඇත.

මෙසේ පළාගිය පිරිස හඳුනා නොගත්තද රටින් පළායාමට ඇති අවස්ථා අහුවරමින් විශේෂ ආරක්ෂක වැඩපිළිවෙලක්ද දියත්කර තිබුණි. බොහෝ විට මොවුන් බෝට්ටු මගින් රටින් පළායාමේ ඉඩක් ඇතැයි සැකයක්ද මතුව තිබුණි.

කොළඹ 07 වෝර්ඩ් පෙදෙසේ පදිංචිකරුවෙක් වූ රාජපක්ෂ අප්පුහාමිලාගේ දොන් සුරේන්ද්‍ර වසන්ත පෙරේරා හෙවත් කැරොකේ වසන්ත (55) සමඟ වෙඩි ප්‍රහාරයට ලක්ව මිය ගිය අනෙත් පුද්ගලයා වන්නේ පැලවත්ත කන්දෙවත්ත පදිංචිකරුවෙන් වූ විජේසූරිය ආරච්චිලාගේ නයන වාසල විජේසූරිය (37) නැමැති අයෙකි. මෙම පුද්ගලයා ව්‍යාපාරිකයෙක් බව පොලීසිය කියයි.

වෙඩි වැදුණු අය අතර වසන්තගේ බිරිද වන මැණික් විජේවර්ධන (42) ද සිටින්නීය. ඇය සහ වෙඩි වැදුණු තවත් කාන්තාවක වන යොමානා කෞෂධි යන දෙදෙනා හෝමාගම රෝහලේදී ශල්‍යකර්ම සඳහා යොමු කර තිබේ. ඔවුන් දෙදෙනා දැඩි සත්කාර ඒකකයේ ප්‍රතිකාර ලබන බව රෝහල් තොරතුරු සඳහන් කළේය.

වෙඩි වැදුණු ගායන වසන්තත් ගායන ශිල්පී සුජීවාත් ඇතුළු තුවාලකරුවන් මුලින්ම රැගෙන ගොස් ඇත්තේ හෝමාගම රෝහලටය. ඒ වන විටත් වසන්ත මියගොස් සිට ඇති බව සඳහන්ය. වෙඩි රැසක් ඔහුගේ සිරුරට වැදී ඇති බව රෝහල් තොරතුරු සඳහන් කළේය. දෙවැන්නා මියගොස් ඇත්තේ රෝහලට ඇතුලත් කිරීමෙන් අනතුරුවය. ගායන ශිල්පී කේ.සුජීවාගේ පාදයට වෙඩි වැදී ඇති අතර වැඩිදුර ප්‍රතිකාර සඳහා ඇය කොළඹ ජාතික රෝහලට මාරුකර යවා ඇත. ඇය සමග තවත් අයෙක්ද කොළඹ ජාතික රෝහලට මාරුකර ඇත. වසන්තගේ බිරිඳ හා අනිත් කාන්තාව හෝමාගම රෝහලේ ප්‍රතිකාර ලබන බව පොලිස් මාධ්‍ය ප්‍රකාශක කාර්යාලය සඳහන් කළේය.

ආන්දෝලනාත්මක චරිතයක් වන කැරොකේ වසන්ත සමාජයේ විවිධ තරාතිරම්වල පුද්ගලයින් සමඟ ඉතා කිට්ටු සම්බන්ධකම් පැවැත්වූ අයෙකි. ව්‍යාපාරිකයන්, කලාකරුවන්, පාතාල අපරාධකරුවන්, පොලීසියේ මෙන්ම දේශපාලනඥයන් රැසක් ද ඒ අතර විය. සිය උපන්දිනය වෙනුවෙන් ඒ සෑම අයෙක්ම තරුපන්තියේ තට්ටුනිවාස සංකීර්ණයකට කැදවා සාදයක්ද වාර්ෂිකව පවත්වන බව ද තතුදත් තොරතුරු සඳහන් කළේය.

අසීමාන්තික ලෙස මෑතක සිට කැරොකේ වසන්ත දෙවියන් බුදුන් අදහමින් ආගමික පරිසරයකට නැඹුරුවීමේ ප්‍රවණතාවක් ඇතිවූ බව ඔහුට සමීපතයින් සඳහන් කළේය. වසන්ත යූ.ටියුබ් නාලිකාවක්ද පවත්වාගෙන ගිය අතර එයද යම් පිරිසක් අතර ජනප්‍රියතාවක් හිමිකරගෙන තිබුණි.

කැරොකෙ වසන්ත ඊයේ අතුරුගිරියේ පැවැත්වෙන උත්සවයට පැමිණෙන බව දැනගෙන කල්තියා කළ සැළසුමකට අනුව මෙම වෙඩි තැබීම සිදුව ඇති බව පෙනී යන්නේ යැයි පොලීසිය සැකකරයි.
කැරොකේ වසන්ත වීවෘත කිරීමේ උත්සවයට පැමිණ සිටින බව ඒ අවට සිටි අයෙක් විසින් කළ දැනුම්දීමට අනුව වෙඩික්කරුවන් පැමිණ ඇති බව පෙනී යන බැවින් එම පුද්ගලයා හඳුනා ගැනීමට දුරකථන ජාල විශ්ලේෂණයක්ද සිදුකිරීමට විමර්ශන නිලධාරීන් පියවර ගනු ඇත.

වෙඩි ප්‍රහාරය එල්ලවූ ස්ථානය නුගේගොඩ කොට්ඨාස අපරාධ ස්ථාන පරීක්ෂණාගාර නිලධාරීන්ගේ පරීක්ෂාවටත් මහේත්‍රාත් නිරීක්ෂණයටත් ලක්විය.

මෙම වෙඩි තැබීම සිදුවූ ස්ථානයේ මෙයට පෙර ද රූපලාවන්‍ය මධ්‍යස්ථානයක් තිබී ඇත. 2017 වසරේදී පාතාල සාමාජිකයෙක් වන ටනිල් බණ්ඩාර නොහොත් අතුරුගිරියේ බණ්ඩා නැමැත්තාට වෙඩි තබා මරා දමන්නේ එම රූපලාවන්‍යාගාරය තුළදීය. කඩුවෙල සමයං නැමැති පාතාලයේ අපරාධකරු බන්ධනාගාරයේ සිට කළ සැළසුමකට අනුව අතුරුගිරියේ බණ්ඩාව එසේ මරා දමා තිබුණේ පාතාල කල්ලි දෙකක් අතර පැවති ගැටුමක ප්‍රතිඵලයක් ලෙසිණි. එම ඝාතනය සිදුවන්නේ අතුරුගිරියේ බණ්ඩා සේෂල් එකක් කර ගැනීමට මෙම රූපලාවන්‍යාගාරයට පැමිණ සිටියදී එහි හිමිකාරිනිය විසින් ලබාදුන් දුරකථන ඇමතුමකට අනුව වෙඩික්කරුවෙක් පැමිණය. ඒ සම්බන්ධයෙන් අත්අඩංගුවට පත්වූ එම රූපලාවන්‍යාගාරයේ හිමිකාරිනිය ඇපමත නිදහස් වීමෙන් අනතුරුව වෙඩි ප්‍රහාරයකට ලක්ව මරුමුවට පත්විය.

මාකදුරේ මධුෂ් ඩුබායි සිට කළ සැළසුමකට අනුව කළුතර එතනමඩලේදී 2017 වසරේදී කළුතර බන්ධනාගාර බස් රථයකට අංගොඩ ලොක්කා ඇතුළු කණ්ඩායමක් ප්‍රහාරයක් එල්ලකරමින් සමයං ඇතුළු 07 දෙනෙකු මරා දමන්නේ අතුරුගිරියේ බණ්ඩාගේ ඝාතනයට පලිගැනීමක් ලෙසිණි.

නුගේගොඩ කොට්ඨාශ භාර ජ්‍යෙෂ්ඨ පොලිස් අධිකාරී ජී.පී.එස්.ජයමහ මහතාගේ උපදෙස් මත අතුරුගිරිය පොලිස් ස්ථානාධිපති ප්‍රධාන පොලිස් පරීක්ෂක සාරද ප්‍රනාන්දු මහතාගේ මෙහෙයවීමෙන් අපරාධ විමර්ශන අංශයේ ස්ථානාධිපති පොලිස් පරීක්ෂක ප්‍රේමලාල් මහතා ඇතුළු නිලධාරීහු පරීක්ෂණ පවත්වති