LPL ක්‍රිකට් තරගාවලියේ අද (03දා) පස්වරුවේ පැවැත්වෙන ජැෆ්නා කිංග්ස් කණ්ඩායමට එරෙහි තරගයේදී පළමුව පන්දුවට පහරදුන් දඹුල්ල සික්ස්සර්ස් කණ්ඩායම පන්දුවාර 20 තුළදී කඩුලු 02ක් පමණක් දැවී ලකුණු 191ක් රැස්කිරීමට සමත් වුණා.
දඹුල්ල ඉනිමෙන් වැඩි කොටසකට දායක වූ කුසල් ජනිත් ප්‍රහාරාත්මක ශතක ඉනිමක් ගොඩනැගීමට සමත් වුණා.
ඔහු ඉනිම අවසන් වනවිටත් පන්දු 52කට මුහුණ දී නොදැවී ලකුණු 102ක් රැස්කරගෙන සිටියා.
කුසල්ගේ ඉනිම හයේ පහර 05කින් හා හතරේ පහර 10කින් වර්ණවත් විය.
මෙය මෙවර අදියරේදී පිතිකරුවෙකු රැස්කළ වැඩිම ලකුණු සංඛ්‍යාව මෙන්ම එකම ශතකයද වෙනවා.
දඹුල්ල ඉනිම ධනුෂ්ක ගුණතිලක හා කුසල් ජනත් ආරම්භ කළත්, ධනුෂ්කගේ ඉනිම ලකුණු 09කට සීමා කිරීමට ධනංජය ද සිල්වා සමත් වුණා.
කෙසේ නමුත් ඉන් අනතුරුව පිටියට පිවිසි නුවනිඳු ප්‍රනාන්දු, කුසල් සමගින් එක්ව දෙවැනි කඩුල්ලට පන්දු 64කින් ලකුණු 108ක ශතක සබඳතාවක් ගොඩනැගීමට සමත් වුණා.
එහිදී නුවනිඳු ලකුණු 40කට දැවී ගියද, ඉන් අනතුරුව පැමිණි නවසීලන්ත ක්‍රීඩක මාක් චැප්මන් මාක් හා එක්වූ කුසල් දඹුල්ල ඉනිම තවදුරටත් වේගයෙන් ඔසවා තැබුවා.
ඔවුන් දෙදෙනා අතරද පන්දු 38කින් ලකුණු 65ක නොබිදුණු සබඳතාවක් ගොඩනැගුණි.
ජැෆ්නා වෙනුවෙන් බිඳවැටුණු කඩුලු දෙකටම හිමිකම් කියූ ධනංජය ද සිල්වා පන්දුවාර 04 තුළදී ලකුණු 25කට කඩුලු 02ක් දවාගැනීමට සමත් වුණා.
තරගාවලියේ 04වැනි තරගය ලෙසින් මෙය පල්ලේකැලේ ජාත්‍යන්තර ක්‍රිකට් ක්‍රීඩාංගණයේදී පැවැත්වෙනවා.