ඇලවුණු කුළුණින් පහළට පැන්න සිසුවා හා සිසුවියගේ අභිරහස කුමක්ද?

කොම්පඤ්ඤ වීදියේ පිහිටි සුපිරි මහල් නිවාස සංකීර්ණයකින් වැටී අවුරුදු 15ක් වයසැති සිසුවෙක් සහ සිසුවියක් මියගොස් තිබෙනවා.

මහල් 70කින් සමන්විත මෙම නිවාස සංකීර්ණයේ 03 වන මහලේ පිහිටි වායුසමීකරණ යන්ත්‍ර සවිකර ඇති ස්ථානයේ තිබී මොවුන් දෙදෙනාගේ මළ සිරුරු හමුවී ඇත්තේ ඊයේ රාත්‍රියේයි.

සිද්ධියෙන් මියගිය පිරිමි දරුවා වැල්ලවත්ත ප්‍රදේශයේ පදිංචිකරුවෙකු වන අතර දැරිය කැළණිය ප්‍රදේශයේ පදිංචිකාරිණියක බවයි පොලිසිය සඳහන් කළේ.

මොවුන් දෙදෙනා කොළඹ පෞද්ගලික පාසලක 10 ශ්‍රේණියේ ඉගෙනුම ලබනවා.

ඊයේ පාසැල් නිම වී මොවුන් දෙදෙනා අදාළ නිවාස සංකීර්ණයේ පස්වන මහලේ පිහිටි කායවර්ධන මධ්‍යස්ථාන වෙත ගොස් එහිදී පාසැල් ඇදුම් මාරු කර අදාළ බෑග එම මධ්‍යස්ථානය තුළ තබා 67 වන මහලට ගොස් ඇති බවයි පොලිස් පරීක්ෂණවලදී අනාවරණය වී ඇත්තේ.

මේවන විට මියගිය සිසුවාගේ සහ සිසුවියගේ දෙපාර්ශවයේ දෙමාපියන්ගෙන් ද ප්‍රකාශ සටහන් කර ගෙන තිබෙන අතර දෙදෙනා අතර ප්‍රේම සම්බන්ධතාවක් ද නොතිබු බව දෙමව්පියන් විසින් එහිදී සඳහන් කර ඇතිබව වාර්තා වෙනවා.

දෙදෙනාගේ මෘත ශරීර මේ වනවිට කොළඹ ජාතික රෝහලේ මෘත ශරීරාගාරයේ තැන්පත් කර තිබෙනවා.

සිද්ධිය සම්බන්ධයෙන් පොලිසිය වැඩිදුර විමර්ශන සිදුකරයි.