රග්බි සංගමයේ ව්‍යවස්ථාවට හෝ නිළවරණවලට ක්‍රීඩා අමාත්‍යාංශය සම්බන්ධ නෑ !

ශ්‍රී ලංකා රග්බි සංගමයේ ව්‍යවස්ථා කෙටුම්පත අනුමත කිරීමේ ක්‍රියාවලිය හෝ නිළවරණය සම්බන්ධයෙන් ඇති ක්‍රියාවලියට ක්‍රීඩා අමාත්‍ය හරීන් ප්‍රනාන්දු මහතා හෝ ක්‍රීඩා අමාත්‍යංශය මැදිහත් බවට සිදුකරන ප්‍රකාශයන් පදනම් විරහිත බවත්, ඒ සඳහා ක්‍රීඩා අමාත්‍යංශයේ කිසිඳු බලපෑමක් නොමැති බවත් ක්‍රීඩා සංවර්ධන දෙපාර්තමේන්තුවේ අධ්‍යක්ෂ ජනරාල් මහාචාර්ය (රියාද් අද්මිරාල්) ෂේමාල් ප්‍රනාන්දු මහතා නිවේදනයක් නිකුත් කරමින් දන්වා සිටිනවා.

ඉහත ක්‍රියාවලිය සඳහා යටිතල පහසුකම් සැපයීම සහ සම්බන්ධීකරණ කටයුතු පමණක් සිදුකරන බවත් කිසිඳු අවස්ථාවක එම ක්‍රියාවලීන් සම්බන්ධයෙන් වගකීමක් හෝ දායකත්වයක් නොමැති බවත් එම නිවේදනයේ සදහන් වනවා.

මේ පිළිබඳ වැඩිදුරටත් පැහැදිලි කරමින් එම මහතා දක්වන්නේ,

2023 වසරේ ඔක්තෝම්බර් මාසයේ ජාත්‍යන්තර රග්බි සංගමය විසින් ශ්‍රී ලංකා රග්බි සංගමය තහනම් කරනු ලැබූ අවස්ථාවේ එවක ක්‍රීඩා අමාත්‍යවරයා විසින් ජාත්‍යන්තර රග්බි සංගමය සමඟ සාකච්ඡා සිදුකිරීමෙන් පසු ජාත්‍යන්තර රග්බි සංගමය විසින් ශ්‍රී ලංකා රග්බි සංගමයේ ව්‍යවස්ථා කෙටුම්පත සඳහා Constitutional Review Group (CRG) කමිටුවව පත් කළ අතර එහි සාමාජිකයෙකු ලෙස එතුමා පත්කර තිබෙන බවයි.

කෙසේ වෙතත් එම වසරේනොවැම්බර් වන විට ජාත්‍යන්තර රග්බි සංගමය විසින් එම තහනම ඉවත් කර ඇති අතර ශ්‍රී ලංකා රග්බි සංගමය 2024 මැයි මස 24 වන දිනට පෙර වාර්ෂික මහසභා රැස්වීම පැවැත්වීමට අපොහොසත් වූ බැවින් 2024 මැයි මස 24 දින 2386/08 දරණ ගැසට් පත්‍රයේ නිසි බලධාරියා ලෙස තමාව පත්කර ඇති බවයි.

එබැවින් ශ්‍රී ලංකා රග්බි සංගමයේ ව්‍යවස්ථා සංශෝධන හෝ නිලධාරී මණ්ඩලය තෝරා ගැනීමේ ක්‍රියාවලියට ඇමැතිවරයා හෝ ක්‍රීඩා අමාත්‍යාංශය සම්බන්ධ බව ප්‍රකාශ කිරීම පදනම් විරහිත බව එතුමා ප්‍රකාශ කරනු ලබනවා.