ඉන්දීය මහමැතිවරණයෙන් අග්‍රාමාත්‍ය නරේන්ද්‍ර මෝදි නැවත වරක් ජයග්‍රහණය කර තිබෙනවා.
නරේන්ද්‍ර මෝදිගේ භාරතීය ජනතා පක්ෂ මූලස්ථානය ඒ බව ප්‍රකාශයට පත්කළා.
එම පක්ෂ මූලස්ථානයේ සිට ජනතාව ඇමතූ ඉන්දීය අග්‍රාමාත්‍යවරයා සිය ජයග්‍රහණය වෙනුවෙන් පාක්ෂිකයින්ට ස්තූතිය පුදකළා.
එරට මැතිවරණ කොමිසම විසින් නිකුත් කරන ලද ප්‍රතිඵලවලට අනුව, ආසන 543කින් යුත් ලෝක් සභාවෙන් භාරතීය ජනතා පක්ෂයට ආසන 240ක් පමණ දිනාගෙන තිබෙනවා.
මේ අතර, භාරතීය ජනතා පක්ෂය ප්‍රමුඛ සන්ධානය ආසන 300කට වඩා වැඩි චන්ද ප්‍රමාණයක් ලබාගෙන ඇති බවයි ඉන්දීය මාධ්‍ය වාර්තා කර තිබෙන්නේ.
ඒ අනුව, ඉන්දීය මහමැතිවරණයෙන් අග්‍රාමාත්‍ය නරේන්ද්‍ර මෝදිගේ සන්ධානය ජයග්‍රහණය කර තිබෙනවා.
ඉන්දීය මැතිවරණ ඉතිහාසය තුළ ජවහල්ලාල් නේරුට පසු මැතිවරණයක් තෙවරක් ජයග්‍රහණය කර ඉන්දීය අගමැති බවට පත්වූ එකම නායකයා බවට නරේන්ද්‍ර මෝදි පත්වනු ඇත.
කෙසේනමුත්, අවසන් ප්‍රතිඵලය පිළිබඳව මෙතෙක් නිල වශයෙන් වාර්තා කිරීමක් සිදුකර නැහැ.
ජනාධිපති රනිල් වික්‍රමසිංහ භාරතීය ජනතා පක්ෂය ප්‍රමුඛ සන්ධානයට මැතිවරණ ජයග්‍රහණය වෙනුවෙන් සුබ පැතුම් එක් කර තිබෙනවා.
අග්‍රාමාත්‍ය මෝදිගේ නායකත්වය යටතේ දෙරට අතර සබඳතාවල අඛණ්ඩතාව ගැන විශ්වාසය තහවුරු කරන බබ එම සුභපැතුමේ වැඩිදුරටත් සඳහන්.