මන්ත්‍රී මහින්දානන්ද අලුත්ගමගේ මහතා සිදුකළ පහරදීමකින් තම පියාගේ පාදයක් බිඳී ඇතැයි පවසමින්, ගුණතිලක රාජජපක්ෂ මන්ත්‍රීවරයාගේ පුත්‍රයා කොටුව පොලීසියට පැමිණිල්ලක් සිදු කර තිබෙනවා.
ජනාධිපති රනිල් වික්‍රමසිංහ මහතාගේ ප්‍රධානත්වයෙන් ඊයේ (03) පැවති ආණ්ඩු පක්ෂ මන්ත්‍රී කණ්ඩායම් අතර රැස්වීමක් අතරතුර පාර්ලිමේන්තු මන්ත්‍රී ගුණතිලක රාජපක්ෂ මහතා තුවාල ලබා රෝහල්ගතකර තිබුණා.
මහනුවර සංවර්ධන කමිටුව සම්බන්ධයෙන් ඇතිවූ බහින්බස් වීමක් දුරදිග යාමත් සමඟ ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී මහින්දානන්ද අලුත්ගමගේ මහතා පාර්ලිමේන්තු මන්ත්‍රී ගුණතිලක රාජපක්ෂ මහතාට පහරදී ඇති බවයි වාර්තා වුණේ.
එහිදී මහින්දානන්ද අලුත්ගමගේ මන්ත්‍රීවරයාගේ මුෂ්ටි ප්‍රහාරයෙන් විසිවී ගිය ගුණතිලක රාජපක්ෂ මන්ත්‍රීවරයා අග්‍රාමාත්‍ය දිනේෂ් ගුණවර්ධනයන්ගේ පුත්‍රයා වන පාර්ලිමේන්තු මන්ත්‍රී යදාමිණී ගුණවර්ධනද පෙරළාගෙන ඇද වැටී තිබෙනවා.
පසුව ගිලන් රථයක් එම ස්ථානයට ගෙන්වාගෙන පහරකෑමට ලක්වූ ගුණතිලක රාජපක්ෂ මහතා කොළඹ යුද හමුදා රොහලට ඇතුළත් කර තිබුණා.
අදාළ ප්‍රහාරයෙන් ගුණතිලක රාජපක්ෂ මන්ත්‍රීවරයාගේ පාදයේ අස්ථි බිඳුමක් සිදුව ඇති බව වෛද්‍යවරුන් විසින් අනාවරණය කරගෙන තිබෙනවා.