මෙරට වෙරළ තීර 28ක් ‘නිල්’ වෙයි – සංචාරක අමාත්‍යංශයේ නව ව්‍යාපෘතිය මෙන්න !

දෙස් විදෙස් ඉහළ සංචාරක ආකර්ෂණයක් හිමි මෙරට වෙරළ තීර 28ක් ‘නිල්ධජ වෙරළ තීර’ බවට පත් කිරීමට රජයේ අවධානය යොමුව තිබෙනවා.

එහි මුල් අදියර යටතේ උණවටුන, බෙන්තොට, පාසිකුඩා හා ආරුගම්බේ යන වෙරළ තීරවල ‘නිල්ධජ ව්‍යාපෘතිය’ ක්‍රියාත්මක කිරීමට නියමිතයි.

එම වෙරළ තීරයන් සංචාරක අමාත්‍යාංශයේ උපදෙස් මත තෝරාගෙන ඇති බව නාගරික සංවර්ධන හා නිවාස අමාත්‍ය ප්‍රසන්න රණතුංග මහතා ප්‍රකාශ කළා.

‘ආරුගම්බේ හා පාසිකුඩා’ ‘නිල්ධජ වෙරළ තීර වැඩසටහන වෙනුවෙන්’ රුපියල් මිලියන 32ක මුදලක් සංචාරක අමාත්‍යාංශය විසින් වෙන් කර තිබෙනවා.

එම මුදල් දැනටමත් දිස්ත්‍රික් ලේකම්වරුන්ට මුදාහැර ඇති බව සඳහන්.

ඒ අනුව සමුද්‍රීය පරිසර ආරක්ෂණ අධිකාරියේ නියමු ව්‍යාපෘතියක් වන ‘පාසිකුඩා වෙරළ තීරය’ මෙම වසර අවසාන වන විට ‘නිල්ධජ වෙරළ තීරයක්’ බවට පත් කිරීමට හැකිවනු ඇති.

මෙරට තෝරාගත් වෙරළ කලාප ‘නිල්ධජ වෙරළ තීර’ නිර්ණායක සපුරාලීමෙන් සංචාරක ආකර්ෂණය වැඩි කරගැනීමට හැකිවනු ඇති බව රජයේ අපේක්ෂාවයි.

ඒ හරහා අදාළ කලාපවල පරිසරය ආරක්ෂා කිරීම, සංචාරකයන් සදහා ප්‍රමාණවත් පහසුකම් සැපයීම, සංචාරකයන්ගේ ආරක්ෂාව තහවුරු කිරීම හරහා සංචාරක කර්මාන්තයේ දියුණුව සමගම එම කලාපයේ ජනතාවගේ ජීවන තත්ත්වය ද ඉහළ නැංවීමට හැකිවනු ඇති.

වෙරළ කලාපයට පැමිණෙන සංචාරකයන්ගේ ආරක්ෂාව සහ සෞඛ්‍ය තත්ත්වය ආරක්ෂා කරගැනීම සදහා ක්‍රියාත්මක වන වැඩසටහනක් වන ‘නිල්ධජ වෙරළ සහතික කිරීමේ වැඩසටහන’ ලෝකයේ සංචාරකයින් අතර ප්‍රචලිත පරිසර හිතකාමී සන්නාමයක් වනවා.

නිල්ධජ සහතිකයක් ලබා දෙන්නේ ජලයේ ගුණාත්මකභාවය, පරිසර කලමනාකරණය, පරිසර අධ්‍යාපන තොරතුරු හා ජනතාවගේ ආරක්ෂාව යන ප්‍රධාන අංග හතර යටතේ වූ නිර්ණායක 32ක් සපුරාලීම මගින්.

ලොව පුරා රටවල් 50 කට වඩා වැඩි සංඛ්‍යාවක මෙම වැඩසටහන මේ වන විට ක්‍රියාත්මක වනවා.