ජනාධිපතිවරණය සහ මහ මැතිවරණය වසර දෙකකින් කල් දැමීමට යෝජනාවක් – එජාපය ජනමත විචාරණයක් ඉල්ලයි !

ජනාධිපතිවරණය සහ මහ මැතිවරණය වසර දෙකකින් දීර්ඝ කිරීමට ජනමත විචාරණයක් පැවැත්විය යුතු යැයි එක්සත් ජාතික පක්ෂය යෝජනා කර තිබෙනවා.

ඒ සඳහා වන යෝජනාව පක්ෂ මහලේකම් පාලිත රංගේ බණ්ඩාර මහතා විසින් අද (28) ඉදිරිපත් කළ බවටයි තොරතුරු වාර්තා වන්නේ.

ජනාධිපතිවරයාගේ සහ පාර්ලිමේන්තුවේ ධුර කාලය වසර දෙකකින් දීර්ඝ කරන ලෙසටයි අදාළ යෝජනාවෙන් ඉල්ලා ඇත්තේ.

මෙම අවස්ථාවේ දී ඇති හොඳම විකල්පය මෙය බව පාලිත රංගේ බණ්ඩාර මහතා ප්‍රකාශ කළා.

ජාත්‍යන්තර මුල්‍ය අරමුදල, ලෝක බැංකුව හා අනෙකුත් ජාත්‍යන්තර ආයතනය සමඟ ගිවිසුම් ගත වීම හේතුවෙන් මෙය අත්‍යවශ්‍ය බවයි ඔහු අවධාරණය කර සිටියේ.

මෙරට ආර්ථිකය ස්ථාවර කිරීම සඳහා ගෙන යන වැඩපිළිවෙල සාර්ථක කරගැනීමට මෙය අත්‍යවශ්‍ය කරුණක් වනවා.

ඒ සඳහා ජනමත විචාරණයක් පැවැත්වීම වඩාත් ප්‍රජාතන්ත්‍රවාදී බවයි, පාලිත රංගේ බණ්ඩාර මහතා වැඩිදුරටත් කියා සිටියේ.