දඹුල්ල හිමිකරු අත්අඩංගුවට ගැනීමත් සමඟ දඹුල්ල තන්ඩර්ස් කණ්ඩායමේ අයිතිය අහෝසි කරයි- කණ්ඩායම් පහ, හතරකට අඩුවෙයි ?

ක්‍රීඩා වැරදි වැළැක්වීමේ ඒකකය විසින් දඹුල්ල තන්ඩර්ස් හිමිකරු වන Imperial Sports Group ප්‍රධාන විධායක නිලධාරී තමිම් රහ්මාන් අත්අඩංගුවට ගැනීමත් සමඟ එළිබෙන ලංකා ප්‍රිමියර් ලීග් (LPL) තරගාවලියෙන් වහාම ක්‍රියාත්මක වන පරිදි ඔවුන්ගේ ගිවිසුමද අවලංගු කර තිබෙනවා.

ඒ අනුව එළබෙන ජූලි මස 01වැනිදා සිට ක්‍රියාත්මක කිරීමට කටයුතු යොදා තිබෙන 05වැනි එල්.පී.එල්. අදියරෙන් එක් කණ්ඩායමක් ඉවත් වී කණ්ඩායම් 04ක තරගාවලියක් ලෙසින් පැවැත්වීමට සිදුවනු ඇති.

ලංකා ප්‍රිමියර් ලීග් නිවේදනය කරන්නේ, තරගාවලියේ විශ්වාසනීයත්වය සහ ගුණාත්මක භාවය ආරක්ෂා කරගැනීම වෙනුවෙන් ගිවිසුම අවලංගු කිරීමට පියවර ගත් බවයි.

කෙසේ වෙතත් දඹුල්ල ගිවිසුම අවලංගු වුවද, එම අයිතිය වෙනත් පාර්ශ්වයකට හිමිකර දීමට හැකියාව තිබෙන බවද සඳහන්.

ඒ අනුව ඉදිරි දින කිහිපයේදී නව හිමිකරුවෙකු ඉදිරිපත් වුවහොත්, දඹුල්ල කණ්ඩායමට LPL ක්‍රීඩා කිරීමේ හැකියාව පවතියි.

ඊයේ පැවැති LPL 2024 වෙන්දේසියේදී දඹුල්ල තන්ඩර්ස් විසින් දෙස් විදෙස් ක්‍රීඩකයින් රැසක් මිලදී ගැනීමට කටයුතු කළා.

ඉන් ඔවුන් ඇෆ්ගනිස්තානයේ කරිම් ජනට් ඩො. 80,000ක මිලදී ගත්තේ මෙවර වෙන්දේසියේදී වැඩිම වටිනාකමකට මිලදී ගත් විදෙස් ක්‍රීඩකයා ලෙසිනි.

එමෙන්ම කරීම්ට අමතරව ඇෆ්ගනිස්තානයේම හස්රතුල්ලාහ් සසායි හා ඊබ්‍රහිම් සද්‍රාන්, බංග්ලාදේශයේ මුස්තෆිසුර් රහ්මාන් ඇතුළු විදෙක් ක්‍රීඩකයෝ කිහිප දෙනෙක්ම මිලදී ගැනීමට කටයුතු කළා.

තවද මෙරට ක්‍රීඩකයින් වන ඩිල්ෂාන් මධුශංක, නුවන් තුෂාර, අකිල ධනංජය, ධනුෂ්ක ගුණතිලක, නුවන් ප්‍රදීප් ඇතුළු තවත් කිහිප දෙනෙකුද ඔවුන්ගේ මිලදී ගත් ලැයිස්තුවට ඇතුළත් විය.