ස්ත්‍රී දූෂණයකට ලක්වූ 14 හැවිරිදි දැරියකගේ මානසික සහ ශාරීරික යහපැවැත්ම ආරක්ෂා කිරීම සඳහා ඇයට ගබ්සාවක් සිදුකිරීමට ඉන්දීය ශ්‍රේෂ්ඨාධිකරණය අවසර ලබාදී තිබේ.
මහාරාෂ්ට්‍ර ප්‍රාන්තයේ වෙසෙන 14 හැවිරිදි දැරියක් සඳහා ගබ්සාවක් සිදුකිරීමට අවසර ලබාදීම සඳහා සම්පූර්ණ යුක්තිය ඉටුකිරීමට ශ්‍රේෂ්ඨාධිකරණය අප්‍රේල් 22 වැනි දින ආණ්ඩුක්‍රම ව්‍යවස්ථාවේ 142 වගන්තිය යටතේ එහි බලතල භාවිත කර ඇතැයි ඉන්දීය ජනමාධ්‍ය පවසයි.
ලිංගික හිංසනයෙන් ගැබ්ගෙන ඇති ඇගේ කළලය සති 30කට ආසන්න බව ජනමාධ්‍ය වාර්තා පවසයි.
එහෙත් බාලවයස්කාර දැරිය ඇගේ තත්වය දැන ගෙන ඇත්තේ ඉතා ප්‍රමාදවීය.
ගැබ්ගැනීම අවසන් කිරීමේ (MTP) පනත මගින් විවාහක කාන්තාවන්ට මෙන්ම ස්ත්‍රී දූෂණයකට ලක්වූ අය ඇතුළු ආබාධිත සහ බාල වයස්කරුවන් වැනි විශේෂ කාණ්ඩවල සිටින අයට සහ වෙනත් අවදානමට ලක්විය හැකි කාන්තාවන් සඳහා ගබ්සා කළ හැකි සීමාව සති 24 ක් ලෙස ප්‍රකාශයට පත්කර ඇති බැවින් මෙවැනි සිද්ධි සම්බන්ධයෙන් සහන ලබා දීම දුර්ලභ බව පැවසේ.
කෙසේවෙතත් මෙම නඩුවේදී, අපරාධයේ පළමු තොරතුරු වාර්තාව පවා ගබ්සා කිරීමට අවසර දී ඇති සති 24 සීමාවෙන් පසුව එනම් මාර්තු 20 දින පමණ ලියාපදිංචි කර ඇත.
ඉන්දීය අගවිනිසුරු ඩී. චන්ද්‍රචුඩ් සහ විනිසුරු ජේ. බී. පර්දිවාලාගෙන් සමන්විත විනිසුරු මඩුල්ල විසින් “වින්දිත බාල දැරියගේ කැමැත්තට එරෙහිව ඇය දිගටම ගැබ් ගෙන සිටීම ඇගේ ශාරීරික හා මානසික යහපැවැත්මට බලපෑ හැකිය” යන වෛද්‍ය මණ්ඩලයේ නිර්දේශයට එකඟ වී තිබේ.
එමෙන්ම ගබ්සා ක්‍රියා පටිපාටියේ යම් අවදානමක් ඇති නමුත්, එය ගැබ් ගැනීමේ කාලය සම්පූර්ණ කළහොත් දරු ප්‍රසූතියේදී ඇති විය හැකි ජීවිත තර්ජනයට වඩා තර්ජනයක් නොවන බව වෛද්‍ය මණ්ඩලයේ මතය වූ බව අධිකරණය සඳහන් කළේය.
එමෙන්ම ගබ්සා ක්‍රියා පටිපාටිය, රැකවරණය සහ ඇයගේ පසු වියදම් දැරීමට ප්‍රාන්ත රජය එකඟ වී තිබේ.
මුම්බායි මහාධිකරණය අප්‍රේල් 4 වැනිදා ලබාදුන් නියෝගයක් මගින් බාලවයස්කාර දැරියට සහන ලබාදීම ප්‍රතික්ෂේප කිරීමෙන් පසු දැරියගේ මව මෙලෙස ශ්‍රේෂ්ඨාධිකරණයට අභියාචනයක් ඉදිරිපත් කර තිබිණි.