සහල් බෙදාදීමේ ජාතික වැඩසටහන යටතේ සහල් කිලෝ දහය ලබාදීමේදී එක් අඩු ආදායම්ලාභියෙකුගෙන් රුපියල් සීයක මුදලක් අය කර ගන්නා බව දිඹුලාගල මනම්පිටිය අඩු ආදායම්ලාභීහු චෝදනා කරති.
අවුරුදු උත්සවයක් සඳහා සහභාගි වන ආරාධිත අමුත්තන්ට සංග්‍රහ කිරීම සඳහා යැයි කියමින් මෙම මුදල එකතු කරන බව ද ඔවුහු පවසති.
මනම්පිටිය ග්‍රාමලධාරී කාර්යාලයේදී අද (22) තමන් වෙත සහල් කිලෝ දහයක ප්‍රමාණයක් ලබාදීමට නම් රුපියල් සීයක මුදලක් රැගෙන ආ යුතු බවට කුඩා ගම්මාන සමිතියේ සාමාජිකයන් තමන්ව දැනුවත් කළ බවද, එම මුදල ලබා දීමට අපොහොසත් අයට සහල් කිලෝ දහයක ප්‍රමාණය නොලැබෙන බවද අඩු ආදායම්ලාබීහු ප්‍රකාශ කරති.
අඩු ආදායම්ලාභී පවුල්වල පෝෂණ තත්ත්වය වර්ධනය කිරීම අරමුණු කරගත් සහල් බෙදාදීමේ ජාතික වැඩසටහනට සමගාමීව පොළොන්නරුව දිස්ත්‍රික්කයේ දිඹුලාගල සහ වැලිකන්ද යන කොට්ඨාසවල අඩු ආදායම්ලාභීන්ට සහල් කිලෝ දහයක ප්‍රමාණයක් ලබාදීමේ වැඩසටහන ඊයේ ( 21) ආරම්භ කරනු ලැබුවේය.
මේ පිළිබඳව 207 වසම බාරව රාජකාරී කරන සමෘද්ධි සංවර්ධන නිලධාරිවරිය සඳහන් කළේ සමෘද්ධිලාභීන් කුඩා ගම්මාන රැස්වීම්වලට සහභාගි නොවීම නිසා මාස පහක මුදල් එලෙස කුඩා ගම්මාන සමිතියේ මගින් එකතු කරන බවට තොරතුරු ලැබී ඇති බවය.
සමෘද්ධි කුඩා ගම්මාන සමිතියේ සභාපති ජී.පි. තුෂාරිගෙන් සඳහන් කළේ ඉදිරියේදී පැවැත්වෙන අවුරුදු උත්සවයට සහභාගි වන ආරාධිත අමුත්තන්ට සංග්‍රහ කිරීම සඳහා එවැනි මුදලක් එකතු කරන බවය.
ප්‍රාදේශීය ලේකම් එස්.එම්. අල් අමින්ගෙන් දුරකථනයෙන් කළ විමසීමකදී සඳහන් කළේ එලෙස සහල් ලබාදීමේදී මුදල් එකතු කිරීම සම්පූර්ණයෙන්ම තහනම් බවත්, සත පහක්වත් , එකතු කිරීමට උපදෙස් ලබා නොදුන් බවත්, එලෙස මුදල් එකතු කරන්නේ නම් ඒ පිළිබඳ ලිඛිතව දැනුවත් කළහොත් ඔවුනට විරුද්ධව නීතිමය පියවර ගැනීමට තමන් සූදානම් බවත්ය.