පාලිත තෙවරප්පෙරුම බලන්න ජන ගඟක් රෝහලට (PHOTOS)

හිටපු නියෝජ්‍ය අමාත්‍යවරයෙකු මෙන්ම එක්සත් ජාතික පක්ෂයේ හිටපු පාර්ලිමේන්තු මන්ත්‍රීවරයෙකුද වන පාලිත තෙවරප්පෙරුම මහතා අද (16) පස්වරුවේ අභාවප්‍රාප්ත වුණා.

ඔහුගේ හදිසි මරණය සම්බන්ධයෙන් පාලිත තෙවරප්පෙරුම මහතාගේ වැඩිමහල් සහෝදරයාගේ පුත්‍රයෙකු පැවසුවේ ඔහුගේ පුද්ගලික වත්තේ වැඩ කරමින් සිටියදී මෙලෙස විදුලි සැර වැදී මරණයට පත් වූ බවයි.

එසේ විදුලිය ලබා ගෙන තිබුණු තැන් අතරින් බිම තිබුණු විදුලි වයරයකින් විදුලි සැර වැදී ඇති බවත් එම ස්ථානයේ සිටි සේවකයන් වහා ඔහු රෝහල් ගත කිරීමට පියවර ගත් නමුත් හිටපු මන්ත්‍රීවරයා ජීවිතක්ෂයට පත් වූ බවයි.

ඔහු එහිදි වැඩිදුරටත් පවසා සිටියේ රෝහලට ඇතුලත් කිරීම සඳහා දුර අනුව විනාඩි 40ක පමණ කාලයක් ගත වූ බවයි.

මේ වන විට කළුතර ශික්ෂණ රෝහල වෙත පාක්ෂිකයන්, හිතවතුන් ඇතුලු විශාල ජනතාවක් එක්ව තිබෙන අතර තත්වය පාලනය කිරීම සඳහා පොලීසියද පැමිණ තිබෙනවා.

හිටපු මන්ත්‍රී පාලිත තෙවරප්පෙරුම මහතාගේ අසීමිත සමාජ සේවාව නිසා ඉමහත් ජනාදරයට පත්වූ ඔහුගේ හදිසි අභාවය කළුතර දිස්ත්‍රික් ජනතාවට ඉමහත් සංවේගයක් ඉපදවන්නක් වන අතර මේ වන විට කළුතර ශික්ෂණ රෝහල ජනතාවගෙන් පිරී ඉතිර ගොස් ඇති බවයි වාර්තා වෙන්නේ.