අවුරුද්දට අසල්වැසි නිවසට ආ 17 හැවිරිදි තරුණියකට වෙඩි තබයි – සැකකරු පලා යයි !

මින්නේරිය යාය 04 ගිරිතලේ ප්‍රදේශයේ දී 17 හැවිරිදි තරුණියකට වෙඩි තබා තිබේ.

ඊයේ (14) රාත්‍රියේ සිදු වූ මෙම වෙඩි තැබීම හේතුවෙන් තරුණිය බරපතල තුවාල සහිතව රෝහල් ගත කර තිබේ. මේ වනවිට ඇය පොලොන්නරුව රෝහලේ ප්‍රතිකාර ගනිමින් සිටී.

වෙඩි තැබීමට හේතුව මෙතෙක් අනාවරණය නොවී ඇති අතර ඊයේ රාත්‍රී 8.30 ත් 8.45 අතර කාලයේ මෙම වෙඩි තැබීම සිදුව ඇති බව මින්නේරිය පොලීසිය පවසයි.

වෙඩි වැදීමෙන් එම තරුණියගේ ගෙල ප්‍රදේශයට බරපතල තුවාල සිදුව ඇති අතර ඇගේ තත්වය බරපතල හෙයින් ඇය වැඩිදුර ප්‍රතිකාර සදහා පොලොන්නරුව මහ රෝහලෙන් අනුරාධපුර ශීක්ෂණ රෝහල වෙත මාරු කර යවා තිබේ.

මෙම තරුණිය අලුත් අවුරුදුද්ද නිමිත්තෙන් අසල්වැසි නිවසකට අවුරුදු නෑගම් ගොස් සිටි අවස්ථාවේදී මෙම වෙඩි වැදීමට ලක්ව ඇත

ඇය පවත්වාගෙන ගිය බව කියන ප්‍රේම සම්බන්ධතාවයක් මුල් කරගෙන ඇති වූ ගැටුමකට පසු මෙම වෙඩි තැබීම සිදුවන්නට ඇතැයි සැකකෙරෙන බව මින්නේරිය පොලීසිය පවසයි.

තරුණියගේ මව පවසන්නේ තමන් ඥාති නිවසකට පවුලේ අය සමග පැමිණ සිටි බවත්, එහිදී තරුණිය සිය ජංගම දුරකථනයත් රැගෙන එළියට පැමිණි විට රතිඤ්ඤා සද්දයක් වැනි හඬක් ඇසුණු බවත්ය. ඇයට වෙඩි වැදී ඇති බව දන්නේ ඉන් පසුව බව ඇය කියන්නීය.

තරුණිය සමග සම්බන්ධයක් පැවැත්වූ පුද්ගලයෙක් මෙම අපරාධය කරන්නට ඇති බවට ඇය සැක කරන්නීය.

වෙඩි තැබීමට සම්බන්ධ පුද්ගලයා ජයන්තිපුර ප්‍රදේශයේ පදිංචි වයස අවුරුදු 40ක පුද්ගයෙකු බවට මින්නේරිය පොලීසිය විසින් හඳුනාගෙන ඇති අතර එම සැකකරු මේවනවිට ප්‍රදේශයෙන් පලා ගොස් ඇත.

එම සැකකරු අත් අඩංගුවට ගැනීම සඳහා මින්නේරිය පොලීසිය විසින් මේවනවිට විශේෂ මෙහෙයුමක් දියත් කර ඇති අතර මේ පිළිබඳ වැඩිදුර පරීක්ෂණ කටයුතු මින්නේරිය පොලීසිය විසින් සිදු කරගෙන යනු ලබයි.