ජනාධිපති රනිල් වික්‍රමසිංහ මහතා සහ ශ්‍රී ලංකා පොදුජන පෙරමුණේ ජාතික සංවිධායක බැසිල් රාජපක්ෂ මහතා අතර ඊයේ (21) රාත්‍රියේ හමුවක් සිදුව තිබෙනවා.
එහිදී ප්‍රථමයෙන් මහා මහමැතිවරණයක් පැවැත්විය යුතු බව ශ්‍රී ලංකා පොදුජන පෙරමුණේ මතය බව බැසිල් රාජපක්ෂ මහතා විසින් ජනාධිපතිවරයාට දැනුම් දී ඇති බව සඳහන්.
කෙසේවෙතත් මැතිවරණය සම්බන්ධයෙන් දෙපාර්ශ්වය අතර පැවති සාකච්ඡාව එකඟතාවකින් තොරව අවසන්ව තිබෙනවා.
ඒ අනුව ජනාධිපතිවරණය ඇතුළු ඉදිරි මැතිවරණ සම්බන්ධයෙන් අවසන් එකඟතාවක් ඇතිකරගැනීම සඳහා දෙපාර්ශවය ඉදිරියේදීත් තවදුරටත් සාකච්ඡා කිරීමට තීරණය කර ඇති බවයි වාර්තා වන්නේ.
පළමුව ජනාධිපතිවරණය සඳහා සූදානම් වන ලෙස ජනාධිපති රනිල් වික්‍රමසිංහ මහතා පසුගියදා පැවැති කැබිනට් රැස්වීමේදී අමාත්‍ය මණ්ඩලය දැනුවත් කළා.
එවන් පසුබිමක ජනාධිපතිවරයා සහ බැසිල් රාජපක්ෂ මහතා අතර මෙම හමුව සිදුවීම විශේෂත්වයක්.
කෙසේ වෙතත් මහා මැතිවරණයට ද? ජනාධිපතිවරණයට ද ප්‍රථමයෙන් යා යුත්තේ යන්න සම්බන්ධයෙන් ශ්‍රී ලංකා පොදුජන පෙරමුණ පක්ෂය තුළ ගැටළු සහගත තත්ත්වයක් පැනී නැගි ඇති බවයි දේශපාලන ආරංචි මාර්ග සඳහන් කළේ.