අද මධ්‍යම රාත්‍රියේ සිට දුම්රිය වර්ජනයක් – වෘත්තීය සමිති කිහිපයක් එක්වෙයි !

අද (05) මධ්‍යම රාත්‍රියේ සිට ක්‍රියාත්මක වන පරිදි දුම්රිය වර්ජනයක් ආරම්භ කිරීමට සැලැසුම් කර තිබෙනවා.

ලොකොමොටිව් ඔපරේටින්ග්ස් ඉංජිනේරු සංගමයේ සභාපති චන්දන ලාල් මහතා මේ බව ප්‍රකාශ කළා.

අදාළ වැඩ වර්ජනය තවත් වෘත්තිය සමිති කිහිපයක් එක් වන බව සඳහන්.

ඒ අනුව දුම්රිය රියදුරු සංගමය දුම්රිය නියාමක සංගමය සහ දුම්රිය අධීක්ෂණ කළමනාකරුවන්ගේ සංගමය මෙම වැඩ වර්ජනයට එක්වනු ඇති.

මේ අතර අද (05) පැවැත්වීමට නියමිතව තිබූ ජාතික දුම්රිය සේවා සමිතියේ 22වන නියෝජිත සංවත්සර මහා සභා රැස්වීම හා නිලවරණයට වාරණ නියෝගයක් නිකුත් කර තිබෙනවා.

ඒ, කොළඹ ප්‍රධාන දිසා විනිසුරු සඳුන් විතාන මහතා විසින්.

අදාළ නිලවරණය නීතිවිරෝධී අන්දමින් කැඳවා ඇති බවට චෝදනා කරමින්, අධිකරණයට පෙත්සමක් ඉදිරිපත් කර තිබුණා.

බි.එම්.ඒ.සුදත් ධම්මික මහතා ඇතුළු සාමාජිකයින් දෙදෙනෙකු මෙම පෙත්සම ගොනු කර ඇති බව සඳහන්.

එහි දී වගඋත්තරකරුවන් කර තිබුණේ, සමිතියේ නියෝජ්‍ය සභාපති එස්.ඒ පි.පි.වීරසිංහ මහතා,සමිතියේ ලේකම් නිහාල් ගුණරත්න යන මහත්වරුන්.

කරුණු සලකා බැලූ ප්‍රධාන දිසා විනිසුරුවරයා විත්තිකරුවන්ට අතුරු තහනම් දැන්වීම් හා නොතීසි නිකුත් කරමින් ලබන දහ අටවැනි දින අධිකරණය හමුවේ කරුණු දක්වන ලෙසට නියෝග කළා.