මහජන පරීක්ෂකවරුන්ගේ සංගමයේ කරන්දෙණිය ශාඛාවේ භාණ්ඩාගාරික, කරන්දෙණිය මහජන සෞඛ්‍ය පරීක්ෂක රෝෂන් කුමාර අද (26) උදෑසන වෙඩි තබා ඝාතනය කර තිබේ.
පිස්තෝල අවියකින් මෙම වෙඩි තැබීම සිදු කර ඇති බවට දැනට සිදු කළ විමර්ශනවලදී අනාවරණය වී ඇති බව ද පොලිසිය සඳහන් කළේ ය.
සිය දරුවා පාසලට ඇරලවීම සඳහා සූදානම් වෙමින් සිටිය දී ඇල්පිටිය, පතිරාජ මාවතේ පිහිටි ඔහුගේ නිවසට යතුරුපැදියකින් පැමිණි නාඳුනන ඝාතකයෙක් මෙම ඝාතනය සිදුකර ඇති අතර රෝෂන් කුමාර එම ස්ථානයේ දීම මිය ගොස් ඇත.
51 හැවිරිදි මෙම නිලධාරියා පසුගිය වකවානුව පුරාම ගාල්ල දිස්ත්‍රික්කය තුළ සිදුකළ විශාල වැටලිම් ප්‍රමාණයක නායකත්වය ගත් අයෙක් බව මහජන සෞඛ්‍ය පරීක්ෂවරුන්ගේ සංගමය කියයි.
පළා ගිය සැකකරුවන් අත්අඩංගුවට ගැනීමට ඇල්පිටිය පොලිසිය විමර්ශන සිදු කරයි.