මෙරට දියර කිරි සහ කිරි නිෂ්පාදනවලින් ස්වයංපෝෂිත කිරීම සඳහා ඉන්දියානු රජයේ සහාය ලබාදීමට එකඟතාව පළ කර ඇතැයි ජනාධිපති මාධ්‍ය අංශය ද අපට කීවේය.
ඒ ජනාධිපති රනිල් වික්‍රමසිංහ සහ ශ්‍රී ලංකාවේ ඉන්දියානු මහකොමසාරිස් ගෝපාල් බග්ලේ ඇතුළු නියෝජිත පිරිස අතර පැවති සාකච්ඡාවකදීය.
ඒ අනුව ඉන්දියාවේ ජාතික කිරි සංවර්ධන මණ්ඩලය (NDDB) හා අමුල් (Amul) කිරි සමාගම එක්ව ශ්‍රී ලංකාවේ දියර කිරි නිෂ්පාදනයට අවශ්‍ය තාක්ෂණික සහාය ලබාදීමට නියමිතව තිබේ. ආනයනික කිරි පිටි මත යැපීම වළක්වා දේශීය කිරි නිෂ්පාදනය ඉහළ නැංවීමට අවශ්‍ය කෙටි, මධ්‍ය සහ දිගුකාලීන සැලැස්මක් සකස් කිරීම සඳහා ඉන්දියාවේ ජාතික පශු සම්පත් සංවර්ධන මණ්ඩලයේ බහුවිධ කණ්ඩායම සමඟ කටයුතු කිරීමට මෙරට රාජ්‍ය සහ පෞද්ගලික අංශයේ නියෝජිතයින්ගෙන් සමන්විත කමිටුවක් ද පත්කොට තිබේ. මෙරටට පැමිණ සිටින ඉන්දියාවේ අමුල් සමාගමේ නියෝජිතයින් පශු සම්පත් සංවර්ධන මණ්ඩලයට අයත් ගොවිපොළවල් පරික්ෂා කිරිම ආරම්භකොට ඇත.
ඒ පිළිබඳව කෘෂිකර්ම හා වැවිලි කර්මාන්ත ඇමති මහින්ද අමරවීර කතා කළේය.
පශු සම්පත් සංවර්ධන මණ්ඩලය හා මිල්කෝ සමාගම අතර එකඟතාවයක් ඇති කරගැනීම සඳහා අමුල් සමාගමේ නියෝජිතයන් මෙරටට පැමිණ තියෙනවා. ඔවුන් ගොවිපොළ පරික්ෂා කරනවා. අමුල් සමාගම මේ සදහා රුපියල් මිලියන 15000ක් ආයෝජනය කරණවා කියලා දැනට දළ වශයෙන් කියලා තියෙනවා. තවම මෙවා දෙනවා කියලා එකඟතාවයක් නැහැ. ජනාධිපති කාර්යාලයෙන් තමයි මෙම කටයුතු අධික්ෂණය වෙන්නේ. මේවා අමුල් සමාගමට දෙනවානම් රජයේ තක්සේරුව මත තමයි අමුල් සමාගමට ඉඩ දෙන්නේ. හයිලන්ඩ් මිල්කෝ යන නාමයන් වෙනස් කරන්නේ නැහැ. ඉන්දියාවේ කිරි ගෙනවිත් අපේ රටේ අලෙවි කරන්නෙත් නැහැ
අමුල් විරෝධය
ශ්‍රි ලංකා මහ බැංකුව විසින් නිකුත්කොට ඇති වාර්තාවකට අනුව මිල්කෝ සමාගම මෙම වර්ෂයේ මුල්මාස අට තුළදි ලබා ඇති පාඩුව රුපියල් මිලියන 265කි. 2022 වර්ෂයේ දි රුපියල් මිලියන 391ක පාඩුවක් ලබා තිබුණි. ජාතික පශු සම්පත් සංවර්ධන මණ්ඩලය ඉකුත් වසරේ මුල්මාස අට තුළ රුපියල් මිලියන 65ක ලාභයක් ලබා තිබු අතර 2022 වර්ෂයේ ලබා ඇති ලාභය රුපියල් මිලියන 133කි.
අප දන්නා පරිදි මෙම ලාභය වාර්තා කරන්නේ මිල්කෝ ආයතනය වෘත්තීය දැනුමක් සහ සැලසුමක් සහිතව පරිපාලනය කළ එවක සිටි මිල්කෝ සභාපතිවරයාගේ ප්‍රතිපත්තිය තුළය. එම තරුණ සභාපතිවරයාත් ආණ්ඩුවේම දේශපාලනයේ නියෝජනයකි. ඕනෑම ආණ්ඩුවක යහපත් දේශපාලකයින් මෙන්ම ආණ්ඩු හා බැඳුණු වෘත්තිකයෝ සිටිති.
එහෙත් කුපාඩි පාලකයින්ගේ ඉලක්ක ඇත්තේ අපට හිතන්නවත් බැරි පහත් තැන්වලය. ලාභ ලබත්ම ඔහුව අතාර්කිකව තනතුරින් ඉවත් කර අමු ගවයෙක් වෙත පරිපාලන වගකීම පැවරුවේ. දැන් පාඩු ලබන රාජ්‍ය සම්පත් ප්‍රතිව්‍යගත කිරීම පිළිබඳ සිදුකරන අතාර්කික ජප කිරීම මිල්කෝ වෙතත් ආදේශ කරන්නට ආණ්ඩුව සැරසෙන්නේය.
අමුල්ට එරෙහි උද්ඝෝෂකයින් කියන්නේ කුමක් ද?
මිල්කෝ හා පශු සම්පත් සංවර්ධන මණ්ඩලය පුද්ගලිකරණය කිරිම පිළිබඳ විරෝධය පල කරන ප්‍රධානම කණ්ඩායම ජාතික ජන බලවේගය හා බැඳුණු සමස්ත ලංකා ගොවිජන සම්මේලනයේ ය. එහි ජාතික සංවිධායක නාමල් කරුණාරත්නය. නාමල් කරුණාරත්න අමුල් විරෝධය රට තුළ කුළු ගන්වන්නේය.
ඒ අතර ජාතික ජන බලවේගයේ දූත කණ්ඩායම කරන ඉන්දීය සංචාරයේ දී අමුල් පාලන අධිකාරිය සමග සාකච්ඡා පැවැත්වීම රට තුළ දැවැන්ත විසංවාදයක් ඇති කළේය. එක් අතකින් ඔවුන් අමුල් විරෝධය ගොඩනගන්නේය. අනෙක් පසින් පාලනය සමග සාකච්ඡා කරන්නේය. කෙසේ වෙතත් ඉන්දියානු සංචාරයේ දි සිදුවු “අමුල් හමුව” සම්බන්ධව අදහස් දක්වමින් විජිත හේරත් කීවේ අමුල් සමාගමේ නියෝජිතයින් හා ජාතික ජනබලවේගයේ නායකයා ඇතුළු නියෝජිත කණ්ඩායම් අතර පැවති සාකාච්ඡාව උණුසුම් මුහුණුවරක් ගනු ලැබූ බවය.
මිල්කෝ ආයතනය, විදුලිබලමණ්ඩලය, ටෙලිකොම් වැනි රාජ්‍ය ආයතන කිසිදු ප්‍රසම්පාදන ක්‍රියාවලියක් හෝ ටෙන්ඩර් ක්‍රියාවලියක් නැතිව කටයුතු කරමින් තියෙනවා. ඉන්දියාවේ අමුල් සමාගම එක්ක අපි සාකච්ඡා කළා. අපි ඒ අයගෙන් ඇසුවා අඩුම තරමේ ඉන්දියාව තුළදිවත් ටෙන්ඩර් හා ප්‍රසම්පාදන ක්‍රියාවලියක් කළාද කියලා. ඔවුන් කිවා එහෙම එකක් නැහැ කියලා.
අමුල් සමාගම සමග කළ සාකච්ඡාවේ දි යම් උණසුම්කාරි තත්වයක් ඇතිවුනා. මෙම කටයුතු වලදි විනිවිද භාවයක් තිබුණේ නැහැ. එක ශ්‍රිලංකාවේ ආණ්ඩුව තමයි කරන්න ඕන. ඒ වැරුද්ද අපිට භාරගන්න බැහැ කියලා ඔවුන් කිවා. අදානි හා අනිකුත් සමාගම් සම්බන්ධයෙන් ද එහෙම තමයි. අපි මේ සඳහා එකඟ නැහැ කියලා අපි කිවා. ඉන්දියාව පමණක් නෙවෙයි. ජපානය, ඇමරිකාව ආදි ආයෝජනය කරන්න කැමති ඕනැම රටකට ශ්‍රී ලංකාව විවෘතයි. පනහට පනහ තමයි අපේ ප්‍රතිපත්තිය
යැයි ජාතික ජනබලවේගයේ විධායක සභික පාර්ලිමේන්තු මන්ත්‍රි විජිත හෙරත් අමුල් හමුවේ අත් දැකීම කීවේ එසේය. නාමල් කරුණාරත්න කියන කතාව
මේ අතර ලංකාවේ සිට අමුල් විරෝධය ගොඩනන්වන ප්‍රධානියා වූ නාමල් කරුණාරත්න මේ සිදුවන්නේ කුමක්දැයි අපට කීවේය
මිල්කෝ හා පශු සම්පත් සංවර්ධන මණ්ඩලය පුද්ගලිකරණය කිරිමට එරෙහිව අපි ආරම්භකොට ඇති අරගලය දිගටම කරගෙන යනවා. අනුර දිසානායක සහෝදරයා අමුල් සමාගම බැලීමට ගිය එක වෙනම කාරණයක්. අමුල් සමාගම ඉන්දියාවේ කිරිගොවින්ගෙන් හදාගත්තු සංවිධානයක්. එම සංවිධානය අද ජාත්‍යන්තර තත්වයට ඇවිත් තියෙනවා. ඉන් ඉගෙන ගැනිමට තියෙන දේවල් ගොඩක් තියෙනවා. අමුල් ආදර්ශය අපි බැහැර කරන්නේ නැහැ. එම සමාගම්වල අත්දැකිම් ගන්න ඕන. එක වෙනම කාරණයක්. මේ යන ක්‍රියාවලියට අකමැත්ත අපේ නියෝජිත කණ්ඩායම විසින් අමුල් සමාගමේ පාලනාධිකාරියට ප්‍රකාශ කොට තියෙනවා.
මෙම ආයතන පුද්ගලිකරණ ක්‍රියාවලිය සඳහා අමාත්‍ය මණ්ඩලය අනුමත කරලා තියෙනවා ඒකාබද්ධ ව්‍යාපාර සමාගමක් හදන්න. ඉන්දියානු පශු සම්පත් දෙපාර්තුමේන්තව හා ඇපයෙන් බේරෙන්න වගේ ලංකාවේ සමාගමකුත් මෙම ඒකාබද්ධ සමාගමට ඇතුළු කරලා තියෙනවා. මෙම ඒකාබද්ධ ව්‍යාපාර සමාගමේ ශ්‍රි ලංකා රජයේ කාර්යභාරය කුමක්ද කියලා පැහැදිලි නැහැ. මෙම ඒකාබද්ධ ව්‍යාපාර සමාගමට තමයි මෙම ආයතන ටික සියල්ල දෙන්නේ. පශු සම්පත් සංවර්ධන මණ්ඩලයට අයත් ගොවිපොළවල් 32ක් දෙන්න හදනවා. මෙහි අක්කර 28 828ක ඉඩම් තියෙනවා. මිල්කෝ ආයතනයට අයත් කිරි එකතු කිරීමේ මධ්‍යස්ථාන 97ක් තියනවා. කිරිකම්හල් 05ක් තියනවා. මේ සියල්ල අමුල් සමාගමට දෙන්න රජය තිරණය කරලා තියෙනවා. කුණු කොල්ලයට තමයි මේවා දෙන්න හදන්නේ. මේ ක්‍රියාවලියට එරෙහිව අධිකරණයේ නඩු දෙකක් පවරලා තියෙනවා.
පාඩුයි පාඩුයි කියලා කියනවා. මෙම ආයතන විතරක් නෙවෙයි මුළු රටම හොර ගුහාවක්. රට බංකොලොත් කිරිම ඇතුලේ විකිණිම උත්තරයක් නෙවෙයි. ආයතන විකිණීමෙන් ගොඩයන්න බැහැ. වංචාව හොරකම නැති කරන්න හරි ක්‍රමවේද ක්‍රියාත්මක කරන්න ඕන. අනුර දිසානායක සහෝදරයා කෘෂිකර්ම ඇමති ධුරය දරපු කාලයේ දි මිල්කෝ සමාගම ලාභ ලැබුවා. ගොවින්ට ලාභංශ පවා දුන්නා.
මිල්කෝ දූෂණ විගණනය හෙළි කර හැටි
මෙරට කිරි අවශ්‍යතාවයෙන් සියයට 48ක් දේශිය නිෂ්පාදනයෙන් සපුරා ගනු ලබන ලබයි. ඉතිරි සියයට 52 ප්‍රමාණය විදේශිය රටවලින් ආනයනය කෙරේ. දේශිය කිරි කර්මාන්තය ගැන සඳහන් කරණ විට රාජ්‍ය ආයතනයන් වන ජාතික පශු සම්පත් සංවර්ධන මණ්ඩලය හා මිල්කෝ පුද්ගලික සමාගම ගැන සඳහන් නොකරම බැරිය.
කොළඹ පිහිටි මිල්කෝ කර්මාන්තශාලාව නවසීලන්ත ජනතාව ලාංකීය ජනතාව වෙත ලබාදුන් ප්‍රදානයකි. 1956 වසරේදී නවසිලන්ත රටවැසියන් විසින් ලබාදුන් අරමුදල් හරහා නවීන කිරි නිෂ්පාදන කර්මාන්තශාලාවක් ලෙස මෙය ඉදිකර තිබේ. මේ සඳහා නවසීලන්ත රජය දැරූ වියදම ඩොලර් මිලියන 11කි.
ඩීසල් ටිකෙනුත් ගසා කෑම
අප මේ කියන්නට යන්නේ මිල්කෝ සමාගම සම්බන්දයෙන් ජාතික විගණන කාර්යාලය මගින් කරණු ලැබු විගණනයකදි අනාවරණය වි ඇති වංචා හා දුෂණයන්ය.
විගණන කාර්යාලය මගින් නිකුත්කොට ඇති වාර්තාවකට අනුව ඛනිජතෙල් නිතිගත සංස්ථාව විසින් මිල්කෝ ආයතනයට අයත් අඹේවල කර්මාන්තශාලාව සඳහා ඉකුත් වසර අට තුළ දි (2015 වර්ෂයේ සිටි 2022 අගෝස්තු 31 දක්වා) නිකුත් කරණු ලැබු ඩිසල් ප්‍රමාණයේ වටිනාකම රුපියල් එක්කෝටි, හැත්තෑ දෙලක්ෂ, නමදහස්හාරසිය හැටහතකි. (17,209,467) ඩිසල් ලීටර් 165,300ක් නිකුත්කොට තිබුණි.
එහෙත් මෙම ඩිසල් තොගය මිල්කෝ ආයතනයේ කර්මාන්තශාලවේ තෙල් ටැංකිවලට ගොඩබා නොතිබුණි. ඩිසල් ටැංකි පිටින්ම වාෂ්ප වි ඇත්තේය. සිදුවූ දෙයක් නැත. ඉකුත් වසර හය තුළදි (2017 වර්ෂයේ සිට 2022 අගෝස්තු 31 දක්වා) රුපියල් 9,364,835ක් වටිනා ඩිසල් ලිටර් 92400 රැගත් බවුසර් රථ 14ක් කර්මාන්තශාලාව වෙත පැමිණ නොතිබු අතර එම ඉන්ධන සඳහා ගෙවිම් කර තිබුණි.
ඒ බවුසරවල ඉන්ධන ටිකට සිදුවූ දෙයක් නැත. ඉන්ධන නොලැබ තිබුනද මිල්කෝ සමාගම විසින් කිසිදු හිරිකිතයකින් තොරව මුදල් ගෙවා තිබුණි. විගණනය මගින් පෙන්වාදෙන ආකාරයට තෙල් බවුසර් පිටින්ම අන්තරස්දාන වි ඇත. ඇතැම් තොග සම්බන්දයෙන් ඉන්වොයිස්වල දැක්වෙන අත්සන් ආරක්ෂණ අංශයේ නිලධාරින්ගේ අත්සන් හා නොසැසදෙන බවද විගණන වාර්තාවේ සදහන් වේ.
ඉන්ධන තොග ලැබිමේ ආරක්ෂක අංශයේ ලේඛණ පරික්ෂාවේ දි මෙම තොරතුරු අනාවරණය වි ඇත.
එමෙන්ම අඹේවල කිරි කර්මාන්තශාලාවේ විදුලි ජනක යන්ත්‍රය සදහා ටැංකිවලින් ඩිසල් නිකුත්කිරිමේ දි ඩිසල් ලිටර් 58703 ප්‍රමාණයක් අස්ථානගත වි තිබුණි. අඹේවල කිරි කර්මාන්තශාලාවේ ඉන්ධන මිලදි ගැනිමේ දි හා නිකුත් කිරිමේ දි සිදුවි ඇති වංචාවන් අනුව එහි අභ්‍යන්තර පාලනය ඉතා දුර්වල මට්ටමක ඇති බව නිරික්ෂණය වන බවද විගණන වාර්තාවේ සදහන් විය.
ඉන්ධන අක්‍රමිකතාවයන්ට සම්බන්ද පාර්ශවයන් සඳහා විනයානුකුලව පියවරගතයුතු බවට විගණනය මගින් නිර්දේශකොට ඇත.
මේ පිළිබද මිල්කෝ සමාගමේ කළමණාකාරිත්වය විසින් විගණනයට සදහන් කොට ඇත්තේ ඩිසල් තොග අක්‍රමිකතාවයන් සම්බන්දයෙන් අභ්‍යයන්තර විගණන අංශය විසින් පුර්ණ විගණන පරික්ෂණයක් සිදුකළ බවය. එම වාර්තාව මගින් හෙලිවු කරුණු අනුව මේ සඳහා වගකිවයුතු නිලධාරින්ගේ වැඩතහනම් කොට ඉදිරි විනය පරික්ෂණ සිදුකරමින් පවතින බවය. මේ සම්බන්දයෙන් අපරාධ පරික්ෂණ දේපාර්තමේන්තුව මගින්ද පරික්ෂණ කටයුතු සිදුකරමින් පවතින බව සමාගමේ කළමණාකාරිත්වය විසින් විගණනයට සදහන්කොට ඇත.
මිල්කෝ කිරි කුණු කිරි වූ හැටි
මිල්කෝ සමාගම විසින් නිෂ්පාදනය කරණු ලැබු කිරිපිටි පාරිභෝජනයට නුසුදුසු නිසා සත්ත්ව ආහාර ලෙස අලෙවිකොට ඇත්තේය. සමාගම විසින් නිෂ්පාදනය කරණු ලැබු රුපියල් මිලියන 475.2ක් වටිනා කිරිපිටි කිලෝග්‍රැම් 720,000ක ප්‍රමාණයක් මිනිස් පාරිභෝජනයට නුසුදුසු බැවින් ඉකුත් වසර පහ තුළ (2018 -2022) සත්ත්ව ආහාර ලෙස අලෙවිකොට තිබුණි.
රට්ටුන් වෙනුවෙන් නිෂ්පාදනය කරණු ලැබු කිරිපිටි අවසානයේ සතුන්ට ලබාදිමට සිදුවි තිබුණි.
කර්මාන්තශාලා නවිකරණ ව්‍යාපෘතිය යටතේ නව යන්ත්‍රාගාරය සවිකිරිමෙන් පසු 2017 වර්ෂයේ දි ජුලි මස දි කිරිපිටි කිලෝග්‍රැම් 771,652ක් නිෂ්පාදනය කොට තිබුණි. එම කිරිපිටි දෝෂ රහිත බවට පරික්ෂණ වාර්තා නිකුත්කොට අලෙවිකොට තිබු බවද විගණන වාර්තාවේ සඳහන් වේ.
පසුව පාරිභෝගික පැමිණිලි හේතුවෙන් මිනිස් පාරිභෝජනයට නුසුදුසු මෙකි කිරිපිටි තොගය නැවත ගබඩාව වෙත ගෙන්වා ගෙන තිබුණි. සත්ත්ව ආහාර ලෙස අලෙවි කිරිමෙන් පසු තවත් කිරිපිටි කිලෝග්‍රැම් 561264 ක් 2022 වර්ෂයේ දෙසැම්බර් මස 31 වැනිදින වනවිටත් අඹේවෙල කර්මාන්තශාලාවේ ගබඩාකර තිබුණි. පාරිභෝජනයට නුසුදුසු කිරිපිටි නිෂ්පාදනයට වගකිවයුතු නිලධාරින් සම්බන්දයෙන් කිසිදු පරික්ෂණයක් පවත්වා නොතිබු බවද විගණනය මගින් අනාවරණය කොට ඇත.
මෙම නිලධාරින් සම්බන්දයෙන් විනය පරික්ෂණයක් පවත්වා වගකිවයුතු පාර්ශවයන්ගෙන් පාඩුව අයකරගත යුතු බවද විගණනය මගින් නිර්දේශකොට තිබුණි. කිතුල් ගහට නැගුණු මිනිහාට කුමක් හෝ කිමට හැකිය. ඒ අයුරින් මිල්කෝ සමාගමේ කළමණාකාරිත්වය විසින් මේ පිළිබද විගණනයට සඳහන්කොට ඇත්තේ මිනිස් පාරිභෝජනයට නුසුදුසු ඉතිරි කිරිපිටි තොගයද විකිණිමට කටයුතු කර ඇති බවය.
එම තොග මේ වනවිට ඉවත්කරගැනීමට කටයුතු කරමින් පවතින බවද කළමණාකාරිත්වය විසින් විගණනයට සදහන් කොට ඇත. සමස්ථයක් ලෙස කිරි නිශ්පාදනයේ දී රටේ තත්ත්වය ද කාලකන්නි එකකි. ඉකුත් වර්ෂයේ (2023) ජනවාරි සිට සැප්තැම්බර් දක්වා වු කාලය තුළදී මෙරට කිරි ගව ගොවිපල මේ වනවිට මෙරට ගව ගොවිපොළ 14294ක් වැසිගොස් තිබේ.
සමාගම පාඩු ලැබුවත් ලොක්කන් බෝනස් අරන්
මේ අයුරින් වංචාවන් හා දුෂණයන් සිදුවෙද්දි මිල්කෝ සමාගම පාඩු ලැබිම අරුමයක් නොවේ. සමාගම පාඩු ලැබුවද එහි විධායක නිලධාරින් හා සේවකයින් කලට වේලාවට ප්‍රසාද දිමනා ලබාගෙන ඇත්තේය. සිමාසහිත මිල්කෝ පුද්ගලික සමාගම විසින් වාර්ෂික මුල්‍ය ප්‍රකාශ විගණනය කිරීමට පෙර චක්‍ර ලේඛනවලට පටහැනිව විධායක හා විධායක නොවන නිලධාරින් සදහා ඉකුත් වසර තුන තුළ (2020, 2021, 2022) ලබාගෙන ඇති ප්‍රසාද දිමනා මුදල රුපියල් අටකෝටි, පනස් පන් ලක්ෂ, හැත්තෑතුන්දහස් අනුපහකි. (85,573,095) එමෙන්ම 2020 වර්ෂයේ දි චක්‍රලේඛයට පටහැනිව විධායක හා විධායක නොවන නිලධාරින් 1350ක් වෙනුවෙන් එක් නිලධාරියෙකුට රුපියල් 15000 බැගින් රුපියල් එක්කෝටි අනුලක්ෂ, අසුහයදහස් තුන්සිය හැත්තැපහක මුදලක් (19,086,375) ප්‍රසාද දිමනා ලෙස ගෙවා තිබුණි.
2021 වර්ෂයේ අප්‍රේල් මස 09 වැනි දින එක් නිලධාරියෙකුට රුපියල් 20000 බැගින් රුපියල් දෙකෝටි පනස්නමලක්ෂ, විසිඑක්දහස් දෙසියතිස්අටක මුදලක් (25,921,238) හා එම වර්ෂයේ දෙසැම්බර් මස 21 වැනි දින එක් නිලධාරියෙකු රුපියල් 11.657 බැගින් රුපියල් එක්කෝටි, හතලිස් අට ලක්ෂ, නමසියහතක (14,800,907) ප්‍රසාද මුදලක් ගෙවා තිබු බවද විගණන වාර්තාවේ සදහන් වේ.
එමෙන්ම 2022 වර්ෂයේ දි ප්‍රසාද දිමනා ලැබිමට හිමිකම් නොමැති තත්ත්වයක් තුළදි චක්‍ර ලේඛනයන්ට පටහැනිව 2022 වර්ෂයේ අප්‍රේල් මස 11 වැනි දින රුපියල් 10000 බැගින් රුපියල් එක්කෝටි, තිස්ලක්ෂ, හතලිස් හතරදහස්, අටසියඅසුටක (13,044,888) ප්‍රසාද මුදල් වශයෙන් ගෙවා තිබුණි. එම වර්ෂයේ දෙසැම්බර් මස 23 වැනි දින එක්කෝටි, විසි හත් ලක්ෂ, දහනම දහස්, හයසිය අසු හතක (12,719,687) මුදලක් ප්‍රසාද දිමනා වශයෙන් ගෙවා ඇති බවද විගණනය මගින් අනාවරණය කොට තිබුණි.
මේ පිළිබද මිල්කෝ ආයතනය විසින් විගණයට සඳහන් කොට ඇත්තේ ප්‍රසාද දිමනා ගෙවීමේ දී රාජ්‍ය ව්‍යාපාර චක්‍රලේඛ අනුගමනය කිරිමක් සිදු නොකර ඇති අතර අධ්‍යක්ෂක මණ්ඩල තීරණ අනුව ප්‍රසාද දිමනා ගෙවා ඇති බවය.
කිරි බවුසරවලින් ප්‍රවාහන වියදම එයා ලිෆ්ට් කළ ගානට ගිහින්
අනික් කාරණය වන්නේ මිල්කෝ සමාගම විසින් සමාගමට අයත් කාර්මාන්තශාලා 04 සඳහා කිරි ප්‍රවාහනය කිරිමට බවුසර් රථ 71ක් යොදවාගෙන තිබුණේ ප්‍රසම්පාදන ක්‍රියාවලිය අනුගමනය කිරිමකින් තොරවය. 2020 වර්ෂය තුලදි කිරිලිටර් 46,119,573ක් ප්‍රවාහනය කිරිම සදහා රුපියල් දෙකෝටි තිස් හත්ලක්ෂ, අසු එක්දහස්, හාරසිය දාහතක මුදලක් (203,781,417) දරා තිබුණි.
ඒ අනුව කිරි ලිටරයක් ප්‍රවාහනය කිරිම සදහා රුපියල් 4.42ක මුදලක් වැයවී තිබුණි. මෙම අධික ප්‍රවාහන වියදම කිරිවල ඒකක පිරිවැය වැඩි වීමට බලපා තිබුණි.
එහෙත් මේ පිළිබද සමාගමේ කළමණාකාරිත්වයේ අවධානය යොමුවී නොතිබුණි. මිල්කෝ සමාගම විසින් කොළඹ පිහිටි කර්මාන්ත ශාලාව සදහා 2011 වර්ෂයේ කල්බදු පදනම යටතේ රුපියල් එක්කෝටි, හතලිස්එක් ලක්ෂ, හැත්තැ හත්දහස්, හත්සිය හැත්තැ නමයක් (104,177,779) වියදම් කොටි යෝගට් මිශ්‍ර කිරිමේ යන්ත්‍රයක් මිලදි ගෙන තිබුණි.
එහෙත් මෙකි යන්ත්‍රය වසර 12ක පමණ කාලයක සිට යන්ත්‍රයේ ඇති දෝෂ නිසා භාවිතයට නොගෙන ඉවත දමා තිබුණි. මෙම යන්ත්‍රය මිලදි ගැනීමට පෙර යන්ත්‍රයේ ඇති දෝෂ පිළිබද අවධානය යොමු වී තිබුණේ නැත.
මිල්කෝ වැටී ඇත්තේ කොතැනටදැයි මේ රට තේරුම් ගත යුතුය.
වල් වැදුන ඉඩමේ වල් පැල ගලවා ඉඩම අස්වද්දන්නේ නැතිව වල් පැල නිසා ඉඩම විකුණන කුජීත අලසයින් සේ හැසිරීමේ නියත ඛේදවාචකය අත් විඳිනු ඇත්තේ මුන් නොවේ. අපේ අනාගත පරම්පරාවය. මේ විකිණුම්කාර නාකි හැත්ත තව අවුරුදු දහයක් ජීවත් වන්නේ නැත.
ඒ කාලය තුළ ජීවත්වීම සඳහා සික් කාරයින් කුඩු ගැසීමට ගෙදර බඩු විකුණන්නා සේ කරන මේ ව්‍යසනය නැවැත්විය යුතුව තිබේ.
ඒ රටේ හෙට දවස වෙනුවෙනි.