පකිස්ථානයේ හිටපු අගමැති ඉම්රාන් ඛාන් සහ ඔහුගේ බිරිය බුෂ්රා බීබී අතර වර්ෂ 2018 දි සිදුවූ විවාහය ඉස්ලාමීය නීතිය උල්ලංඝණය කළ බවට තීන්දු කරමින් ඔවුන් දෙදෙනාට වසර හතක නව සිර දඬුවමක් පැනවීමට පකිස්ථානයේ අධිකරණයක් නියෝග කර තිබේ.
ඊයේ (03) මෙම තීන්දුව ප්‍රකාශ කර තිබුණේ ඛාන් සිරගත කර සිටින රාවල්පින්ඩි නගරයේ අඩියාලා බන්ධනාගාරය තුළ පිහිටුවා ඇති සිවිල් අධිකරණයේ දී ය. ඛාන් සහ බිරිය ඉදිරියේ දඬුවම ප්‍රකාශයට පත් කළ අධිකරණය ඔවුන්ට රුපියල් මිලියනයක (ඩොලර් 3,560) දඩයක් ද නියම කළේය.
මෙම නඩුව පසුගිය වසරේ දී පනවා තිබුණේ බුෂ්රා බීබී ගේ පෙර සැමියා වූ ඛාවර් මෙනේකා විසිනි. ඛාන් සමඟ විවාහ වීමට පෙර තමන්ගෙන් දික්කසාද වූ බිරිය ඉස්ලාමීය නීතිය යටතේ අවශ්‍ය මාස තුනක විවේකය අනුගමනය නොකළ බවට චෝදනා කරමින් ඔහු මෙම යුවළට එරෙහිව උක්ත නඩුව ගොනු කර තිබිණි.
2017 නොවැම්බරයේදී ඔහු තම බිරිය දික්කසාද කළ බව මනේකා ප්‍රකාශ කරයි. ඛාන් 2018 පෙබරවාරි මාසයේදී බිබී සමඟ ඔහුගේ තෙවැනි විවාහය නිවේදනය කළේ ඔහු අගමැති වීමට මාස කිහිපයකට පෙරය.