රාජාංගනය ප්‍රදේශයේ ගොවීන්ගේ යහපත පිණිස රාජාංගනයේ යාය 18 ප්‍රදේශයේ පිහිටි වැවක් තම පෞද්ගලික ධනයෙන් පවිත්‍ර කර ඒ අවට මීපැළ සිටුවීමේ උත්සවය අවස්ථාවට පෞද්ගලික හෙලිකොප්ටර් යානයෙන් එම ස්ථානයට ගොස් සිදුකල සද්කාර්‍ය අවසානයේ අහිංසක පොලිස් නිලධාරීන් තිදෙනෙකුට ඉතාම අසාධාරණ අන්දමින් ස්ථාන මාරු ලබාදීම සම්බන්ධයෙන් වූ පුවත ඇසිමෙන් තමා දැඩි සංවේගයට පත් උනේ යැයි අවුරාලංකා සමාගමේ සභාපති වෛද්‍ය විරංජිත් තාඹුගල මහතා සදහන් කර සිටී.
එම සිදුවීම පිලිබදව 9 වන අගහරුවාදා ජාතික පුවත්පත්වල ප්‍රධාන පිටුවල වාර්තා වී තිබූ පුවත නිවැරැදි විය යුතු බවද තාඹුගල මහතා පෙන්වා දෙයි.
පුවතේ සදහන් වන අන්දමට හෙලිකොප්ටර් යානයට ආරක්ෂාව සැපයීම සදහා යාය 18 ප්‍රදේශයට රාජකාරි සදහා ගොස් සිටි රාජාංගනය පොලිසියේ රථවාහන අංශයේ නිලධාරීන් සිය රාජකාරිය නියමිත අන්දමින් ඉටුකල බවද නිලධාරීන් මීපැළ සිටුවීමට එක්වී තේපැන් සංග්‍රහයට සහභාගි වන අවස්ථාවේදී හෙලිකොප්ටර් යානය ඉන්ධන සපයා ගැනීම සදහා එම ස්ථානයෙන් බැහැරට ගොස් සිටි බැවින් එහිදී රාජකාරිය පැහැර හැරීමක් සිදුනොවී ඇති අතර මෙලෙස අත්තනෝමතික අයුරින් පොලිස් නිලධාරීන් ට ස්ථාන මාරු ලබාදීමෙන් ඔවුන්ගේ මානව හිමිකම් කඩවීමක් සිදුවන බව විරංජිත් තාඹුගල මහතා තවදුරටත් සිය කණගාටුව පලකරමින් ප්‍රකාශ කර සිටී.
උත්සව අවස්ථාවකදී ඒ සදහා එක්වන පොලිස් නිලධාරීන්ට තේපැන් සංග්‍රහයට ආරාධනා කිරීම සංග්‍රහශීලී ශ්‍රී ලාංකිකයාගේ පුරුද්ද බවත් තේ කෝප්පයක් පානය කිරීම මිනිසුන්ගේ අවශ්‍යතාවයක් බැවින් එය දඩුවම් මාරුවකට හේතුවක් නොවන බවද ඔහු සදහන් කරයි.
ස්ථාන මාරුවට ලක්වූ එම නිලධාරීන් වෙනුවෙන් සාධාරණ නිගමනයකට එන ලෙසත් මින් පසුව මෙවැනි පෞද්ගලික පළිගැනීම්වලට පොලිස් දෙපාර්තමේන්තුව තුලදී ඉඩ නොතබන ලෙසත් මහජන ආරක්ෂක අමාත්‍ය ටිරාන් අලස් මහතාගෙන් සහ වැඩබලන පොලිස්පති දේශබන්දු තෙන්නකෝන් මහතාගෙන් තමා ඉල්ලා සිටින බවද විරංජිත් තාඹුගල මහතා කියා සිටියි.
එසේම සිය කණගාටුව අසාධාරණයට ලක් වූ පොලිස් නිලධාරීන් වෙත පලකරන බවද විරංජිත් තාඹුගල මහතා පවසයි.
මේ අතර පසුගියදා (11) අනුරාධපුර බන්ධනාගාරයේ අමුත්තන් පෙන්වීමේ කටයුතු විධිමත් කර ගැනීමට අංග සම්පූර්ණ ශබ්ද විකාශන යන්ත්‍ර පද්ධතියක් ස්ථාපිත කිරීමට අවුරා ලංකා එන්ටර්ටේට්මන්ට් ආයතනයේ සභාපති විරංජිත් තාඹුගල මහතාගේ පෞද්ගලික ධනයෙන් රුපියල් 750,000මුදලක් පරිත්‍යාග කළ බව බන්ධනාගාර මාධ්‍ය ප්‍රකාශක ගාමිණී දිසානායක මහතා සදහන් කළේය.
සිරකරු සුභසාධක සංගමයේ සභාපති උතුර හා උතුරු මැද ප්‍රධාන අධිකරණ සංඝනායක පණ්ඩිත මංගල ධර්ම කීර්ති ශ්‍රී සෝභිත නූගේ තැන්න පඤ්ඤානන්ද ස්වාමින් වහන්සේගේ ඉල්ලීම පරිදි එය සිදු කර ඇත.
මෙවැනි පරිත්‍යාගයන් තුළින් බන්ධනාගාරයේ වැඩකටයුතු සාර්ථක කර ගැනීමට මහඟු උපකාරයක් වන බව වැඩිදුරටත් බන්ධනාගාර මාධ්‍ය ප්‍රකාශකවරයා කියා සිටියේ ය.
