ඇවෙන්රා ගාර්ඩ්න්ස් හෝටලය වැටලූ සෞඛ්‍ය පරීක්ෂකවරුන් පොලිසියට කැඳවයි !

මීගමුව ඇවෙන්රා ගාර්ඩ්න්ස් හෝටලය වැටලීමට ගිය මහජන සෞඛ්‍ය පරීක්ෂකරුවන්ට එරෙහිව පොලිසියට පැමිණිල්ලක් සිදු කර තිබෙනවා.

ඒ, ඔවුන් විසින් අදාළ ව්‍යාපාරිකයන්ගෙන් අල්ලස් මුදල් ඉල්ලූ බව පවසමින්.

මේ සම්බන්ධයෙන් මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ මහතාගෙන් සිදුකල විමසීමේදී ඔහු කියා සිටියේ, අදාළ හෝටලයේ කළමනාකාරීත්වය විසින් තම නිලධාරින්ට එරෙහිව නින්දිත බොරු චෝදනා සහිත කුමන්ත්‍රණයක් සමාජගත කිරීමට කටයුතු කර ඇති බවයි.

උත්සවය සමයේ හේතුවෙන් පසුගිය දිනවල මහජන සෞඛ්‍ය පරීක්ෂකවරුන් දිවයින පුරා වැටලීම් සිදු කළා.

එහි දී එම හෝටල් හිමිකරුවන් පිසූ ආහාර සහ නොපිසූ ආහාර එකම අධි ශීතරකණයක ගබඩා කර තිබූ බවටයි අනාවරණ වුණේ.

මීට මාස දෙකකට පෙර ද මේ ආකාරයෙන් ම මෙම හෝටලය පරීක්ෂා කළ බවත් එම අවස්ථාවේදීත් මෙලෙස ආහාර ගබඩා කර ඇති බවට අනාවරණ වූ බවත් උපුල් රෝහණ මහතා කියා සිටියා.

එම අවස්ථාවේ දී නඩු නොදමන ලෙසට සිදු කළ බලපෑම් හමුවේ අවවාද කරන ආහාර වර්ග විනාශ කිරීමට කටයුතු කර තිබුණා.

මෙවර සිදු කළ වැටලීම සම්බන්ධයෙන්, හෝටල් පරිපාලනයට දන්වා විනාඩි 45ක් පමණ සිටියත් කිසිවෙක් එම ලේඛනවලට අත්සන් තැබීමට කිසිවෙක් ඉදිරිපත් නොවූ බවයි, උපුල් රෝහණ මහතා අවධාරණය කළේ.

අනතුරුව තම හෝටලයට නඩු නොපවරණ ලෙස වැටලීම් කළ නිලධාරීන් වෙත තදින්ම බලපෑම් කළ බව ද සභාපතිවරයා කියා සිටියා.

හෝටලයට විරුද්ධව ආහාර පනත යටතේ චෝදනා ගොනු කර ඇති බවත් එහි බී වාර්තාව මීගමුව මහේස්ත්‍රාත් අධිකරණයට ඉදිරිපත් කරන බවත් උපුල් රෝහණ මහතා සඳහන් කළා.

එමෙන් ම අදාළ හෝටලයේ සන්නාමය සහිත ලියාපදිංචි නොකළ පානීය ජල බෝතල් ද මහජන පරීක්ෂක නිලධාරින් සොයාගෙන ඇති බව සඳහන්.

මෙම වැරදි සම්බන්ධයෙන් වන සාක්ෂි තමන් සතුව පවතින බවයි ඔහු කියා සිටියේ.

මෙවැනි අනීතික බලපෑම්වලට යටත් වී මෙහෙයුම් නැවැත්වීමට තම සංගමය සූදානම් නොමැති බව ද උපුල් රෝහණ මහතා ප්‍රකාශ කළා.

ඔහු වැඩිදුරටත් ප්‍රකාශ කළේ, පොලිසිය විසින් සිදු කරන විමර්ශන කටයුතුවලට තම නිලධාරින් පූර්ණ සහයෝගය ලබා දෙන බවයි