තම ප්‍රාණ ඇපයේ සිටින ඊශ්‍රායල වැසියන් නිදහස් කරන්නේ, ඊශ්‍රායලය එරට බන්ධනාගාරවල සිටින පලස්තීන සිරකරුවන් සියලු දෙනා නිදහස් කරන්නේ නම් පමණක් යැයි හමාස් සටන්කාමීහු පවසති.
ඊශ්‍රායල රජය එසේ නොකරන්නේ නම්, ප්‍රාණ ඇපයේ සිටින ඊශ්‍රායල වැසියන් සියලු දෙනා ඝාතනය කිරීමට තමන් පසුබට නොවන බව ද හමාස් සටන්කාමීන් වැඩි දුරටත් පවසා තිබේ.
හමාස් සටන්කාමීන්ගේ මෙම ප්‍රකාශය, ඊශ්‍රායලයේ දැඩි කෝපයට හේතුවක් වී ඇත. ඊශ්‍රායල හමුදා, ගාසා තීරයේ දකුණින් පිහිටි යූනිස් ඛාන් නගරය වට කරමින් දරුණු ලෙස පහර දීමට පටන්ගෙන ඇත්තේ ද මේ නිසාය.
පසුගිය ඔක්තෝබර් 7 වැනිදා හමාස් සටන්කාමීන්, ඊශ්‍රායලයට කඩා වැදී පහර දුන් අවස්ථාවේදී, ඊශ්‍රායලයේ සිට, 240 දෙනකු ප්‍රාණ ඇපකරුවන් ලෙස අල්ලාගෙන ගාසා තීරයට රැගෙන ගියේය.
දින කීපයකට පමණක් සීමා වූ සටන් විරාමය අතරතුරේ, ප්‍රාණ ඇපකරුවන් බොහෝ දෙනකුට නිදහස හිමිවිය.
එසේ වුවත්, තවමත් 130 දෙනකු හමාස් ප්‍රාණ ඇපයේ සිටින බව පැවැසෙයි. හමාස් සටන්කාමීන්, ඝාතනය කිරීමට සූදානම් වෙනවා යැයි පැවැසෙන්නේ එම 130 දෙනාය.