2022 සාමාන්‍ය පෙළ විභාගයේ ප්‍රතිඵල නිකුත් කරයි – ප්‍රතිඵල බලන්නේ මෙහෙමයි !

2022 (2023) අධ්‍යයන පොදු සහතික සාමාන්‍ය පෙළ විභාගයේ ප්‍රතිඵල මේ වනවිට අද අළුයම (1) නිකුත් කර තිබෙනවා.

විභාග කොමසාරිස් ජනරාල් අමිත් ජයසුන්දර නිවේදනය කළේ www.doenets.lk / www.results.exams.gov.lk යන වෙබ් අඩවිවලට පිවිස විභාග අංකය ඇතුළත් කිරීමෙන් ප්‍රතිඵල ලබාගත හැකි බවයි.

2022 වසරට අදාළව පසුගිය මැයි 29 වනදා ආරම්භ වූ සාමාන්‍ය පෙළ විභාගයට අයදුම්කරුවන් හාරලක්ෂ 72,553 දෙනෙකු පෙනී සිටියා.

ඒ, පාසල් අයදුම්කරුවන් තුන්ලක්ෂ 94,450 ක් සහ පෞද්ගලික අයදුම්කරුවන් සංඛ්‍යාව 78,103 ක් වශයෙන්.

සියලුම විදුහල්පතිවරුන් වෙත සිය පාසලේ විභාග ප්‍රතිඵල ලේඛනය අන්තර්ජාලය ඔස්සේ බාගත කරගත හැකි අතර, එහි මුද්‍රිත පිටපතක් ලබාගැනීමටද පහසුකම් සළසා තිබෙනවා. ඒ සඳහා දැනටමත් අදාළ විදුහල්පතිවරුන් වෙත ලබාදී ඇති පරිශීලක නාමය සහ මුරපදය භාවිත කළ හැකි බවයි විභාග කොමසාරිස් ජනරාල්වරයා කියා සිටියේ.

එසේම නැවත සමීක්ෂණය සඳහා අයදුම්පත් කැඳවීම ලබන 04 වනදා ආරම්භ වන අතර, 18 වනදා දක්වා අයදුම්පත් යොමුකළ හැකියි.

එමෙන්ම ප්‍රතිඵල සම්බන්ධයෙන් ගැටලු පවතින්නේ නම් 1911 හෝ පාසල් විභාග සංවිධාන හා ප්‍රතිඵල ශාඛාව ඇමතිය හැකි බවයි විභාග කොමසාරිස් ජනරාල් අමිත් ජයසුන්දර කියා සිටියේ.