මුලතිව් කොක්කුතුඩුවායි සමූහ මිනිවලෙන් තවත් මිනිස් සිරුරු දෙකක අස්ථි කූඩු මතු කරගෙන තිබෙනවා.
ඒ සමඟ එම ස්ථානයෙන් සොයා ගත් අස්ථි කූඩු ගණන 26ක් දක්වා ඉහළ ගොස් ඇති බව සඳහන්.
සමූහ මිනිවළ ආශ්‍රිත තෙවැනි අදියරේ සිව් වන දින කැනීම් ඊයේ (23) සිදු කෙරුණා. එම කැනීම් තුළින් පූර්ණ මිනිස් සිරුරු පහක අස්ථි කොටස් අලුතින් මතුකරගත් බවයි,
මුලතිව් රෝහල් විශේෂඥ අධිකරණ වෛද්‍ය නිළධාරි කනක වාසුදේව මහතා කියා සිටියේ.සමූහ මිනිවළ ආශ්‍රිත දෙවැනි අදියර කැනීම් තුළින් පූර්ණ මිනිස් සිරුරු 17 කට අදාළ අස්ථි කොටස් ගොඩ ගනු ලැබුවා.
තෙවැනි අදියරේ තෙවැනි දිනයේ කැනීම් තුළින් නොවැම්බර් 22 වැනිදා තවත් මිනිස් සිරුරු පහකට අදාළ අස්ථි කූඩු මතුකරගත් බව ද ඔහු ප්‍රකාශ කළා.
තෙවැනි අදියරේ කැනීම් තුළින් මේ දක්වා මතු කරගැනීමට සමත් වී ඇති මිනිස් සිරුරු සංඛ්‍යාව හතක්.
සමූහ මිනිවළ තුළින් මේ දක්වා පතුරම් උණ්ඩ වැනි කොටස් හයක් හා LTTE සංවිධානයේ සාමාජිකයින් හඳුනා ගැනීමට පළදින බව කියන අංක තහඩු හයක්, අපවිත්‍ර ජලය පවිත්‍ර කරන උපකරණයක්, සයිනයිඩ් කරලක්, කාන්තා තනපට, ආරක්ෂක අංශ භාවිතා කරන කැළෑ ඇදුමට සමාන ඇඳුම් වැනි උපකරණ රැසක්ද හමු වී ඇති බව සඳහන්.
සමූහ මිනිවළ කොපමණ සීමාවක් පුරා පවතින්නේද යන්න දළ අනුමානයක් ලබා ගැනීමට සමූහ මිනිවළ පවතින ස්ථානය අවට සීමාවේ විශේෂ ස්කෑන් පරීක්ෂණයක් පැවැත්වීමටයි අධිකරණයෙන් අවසරය ලැබී ඇත්තේ.
මේ බව මුලතිව් රෝහල් විශේෂඥ අධිකරණ වෛද්‍ය නිළධාරිවරයා තහවුරු කළා.
කැළණිය විශ්ව විද්‍යාලයේ පුරාවිද්‍යා අධ්‍යයන අංශයේ නිලධාරීන්ගේ මඟපෙන්වීම යටතේ අදාළ ස්කෑන් පරීක්ෂාව සිදුකිරීමට නියමිතයි.
මේ දක්වා සමූහ මිනිවළ තුළින් ගොඩගත් අස්ථි කොටස් මුලතිව් මහේස්ත්‍රාත්වරයාගේ නියෝග යටතේ පරීක්ෂණ වෙනුවෙන් මුලතිව් රෝහලේ ස්ථාපිත විශේෂිත කුටියක තැන්පත් කර තිබෙනවා.
කැනීම් තුළින් එක මත එක පිහිටි අස්ථි කූඩු මතුකරගත් බවත්, හමුවු අස්ථි කූඩු අවිධිමත් ලෙසට වළට දමා ඇති බව නිරීක්ෂණය වන අතර, පොදු සුසානයක සිරුරු තැන්පත් කරන ආකාරයට ක්‍රමානුකූල බවකින් තොරව සිරුරු වළට දමා ඇති බවත් මුලිකව දැක ගැනීමට හැකි වන බවද කැනීම් නිලධාරින් කියා සිටියා.