කෝටිපති ව්‍යාපාරිකයාගේ සිරුර බාල්කයක එල්ලෙයි !

ආණමඩුව, වෙම්බුවැව ප්‍රදේශයේ පදිංචි කෝටිපති ව්‍යාපාරිකයකු ඔහුට අයත් දෙමහල් නිවෙසේ උඩුමහලේ ගෙල වැලලාගෙන සියදිවි නසාගෙන සිටියදී ඊයේ (22) හමු වූ බව ආණමඩුව පොලිසිය පවසනවා.

පොලිසිය පැවසුවේ මෙලෙස සියදිවි නසාගෙන ඇත්තේ වෙම්බුවැව, අංගම්මනගේ පදිංචිව සිටි ශානක දිසානායක නමැති අවුරුදු 33ක තිදරු පියෙක් බවයි.

දෛනිකව හා මාස් පතා මුදල් පොලියට දීමේ ව්‍යාපාරයක් හා තවත් ව්‍යාපාර කිහිපයක් පවත්වාගෙන ගිය මෙම පුද්ගලයාගේ බිරිඳ මීට මාස 07කට පමණ පෙර විදෙස් ගත වී තිබෙනවා.

එම නිසා සෑම දිනකම උදෑසන දරුවන් පාසල් බස් රථයට රැගෙන යන්නේත්, නැවත දරුවන් පාසල නිම වී බස් රථයෙන් පැමිණි පසු රැගෙන ඒමට කටයුතු කර ඇත්තේත් මෙම ව්‍යාපාරිකයා විසින් බවත් පොලිසිය පවසනවා.

ඒ අනුව ඊයේ දරුවන් රැගෙන ඒමට බස් රථය අසලට ඔහු නොපැමිණි නිසා දරුවන් පා ගමනින්ම නිවෙසට පැමිණ ඇති අතර, නිවස විවෘතව තිබීම නිසා පියා සොයමින් නිවස පුරා ගමන් කරමින් සිටියදී, සිය පියා උඩු මහලේ කාමරයක බාල්කයක ලණුවක් ආධාරයෙන් එල්ලී සියදිවි නසාගෙන සිටියදී වැඩිමල් දරුවා විසින් දැක ඇති බව පොලිසිය පවසනවා.

පශ්චාත් මරණ පරීක්ෂණය සඳහා සිරුර පුත්තලම මූලික රෝහලට රැගෙන යෑමට නියමිත බවත්, මෙය ඝාතනයක්ද, සිය දිවි නසාගැනීමක්ද යන්න මෙතෙක් අනාවරණය වී නොමැති බවත්, සිදුවීම සම්බන්ධයෙන් විමර්ශන ක්‍රියාත්මක බවත් ආණමඩුව පොලිසිය සඳහන් කළා.