World Cup 2023 – ඔලුව පාවිච්චි කරලා ගහපු හෙඩ්ගේ ඉනිම නිසා ඉන්දියානු සිහින බොඳ කරමින් ශුරතාවය ඔස්ට්‍රේලියාවට

2023 ලෝක කුසලාන එක්දින ක්‍රිකට් තරගාවලියේ (World Cup 2023) අවසන් මහා තරගයෙන් සත්කාරක ඉන්දීය කණ්ඩායම පරදා කඩුලු 6 ක ජයක් වාර්තා කරමින් 6 වැනි වරටත් ලෝක ශූරතාවය දිනා ගැනීමට ඔස්ට්‍රේලියානු කණ්ඩායම අද (19) සමත් වුණා.

අහ්මදාබාද් හි පැවැති තරගයේ කාසියේ වාසිය දිනූ ඔස්ට්‍රේලියාවේ ආරාධනයෙන් පළමුව පන්දුවට පහරදුන් ඉන්දියාවට පන්දුවාර 50 අවසානයේ සියලු දෙනා දැවී ලබා ගත්තේ ලකුණු 240 ක් පමණයි.

ක්‍රීඩාංගනයට රැස්ව සිටි එක් ලක්ෂ තිස් දහසක ප්‍රේක්ෂකයින් ඉදිරියේ පිතිකරුවන්ට අපහසු තණතීරුවක පන්දුවට පහර දීමට පිටියට පිවිසි ඔස්ට්‍රේලියාව පන්දුවාර 43 ක් අවසානයේ කඩුලු 4 ක් දැවී ජයග්‍රාහී ඉලක්කය පසු කළා.

ට්‍රැවිස් හෙඩ් පන්දු 120 කින් ලකුණු 137 ක් රැස් කළේ හයේ පහර 4 ක් හා හතරේ පහර 15 ක් සමගින්. ඔහුට අනගි සහායක් ලබා දුන් මර්නස් ලබුෂේන් පන්දු 110 තුල ලකුණු 58ක් ලබා ගත්තා.

ඔස්ට්‍රේලියානු ඉනිමේ තෙවැනි කඩුල්ල ලකුණු 47 දී බිද වැටුණු පසුබිමකයි ඔවුන් දෙදෙනා සිව්වැනි කඩුල්ලට පන්දු 215කදී ලකුණු 192ක සම්බන්ධතාවයක් ගොඩ නැගුවේ.

පළමුව පන්දුවට පහරදුන් ඉන්දියාව වෙනුවෙන් කේ එල් රාහුල් ලකුණු 66 ක්, විරාත් කෝලි ලකුණු 54 ක් රැස් කළා.

පන්දු යැවීමේ දී මිචෙල් ස්ටාක් කඩුලු 3 ක් දවා ගත් අතර, ජොෂ් හේසල්වුඩ් හා පැට් කමින්ස් කඩුලු 2 බැගින් දවා ගත්තා.

අවසන් තරගයේ වීරයා බවට පත්වුයේ විශිෂ්ට ශතකයක් වාර්තා කල ට්‍රැවිස් හෙඩ්.

2023 ලෝක කුසලානයේ තරගාවලියේ විරයා බවට පත්වුයේ විරාට් කෝලි