ගහක් සිටුවන්න කෙන්යානු රජයෙන් සඳුදා විශේෂ නිවාඩුවක් – 2032ට ගස් බිලියන 15 ක් !

දැවැන්ත රුක් රෝපණ වැඩසටහනක් දියත් කිරීමට කෙන්යානු රජය සූදානම්ව පසුවන බව විදෙස් මාධ්‍ය වාර්තා කරනවා.

පරිසර පද්ධතිය සංරක්ෂණය කිරීමේ අරමුණ ඇතිව ක්‍රියාත්මක මෙම වැඩසටහන එරට ජාතික මට්ටමින් සිදුවන්නක්.

ඒ අනුව සඳුදා (13) විශේෂ නිවාඩු දිනයක් ලෙස කෙන්යානු රජය විසින් ප්‍රකාශයට පත්කර තිබෙනවා. එදින සෑම කෙනකුම එම රුක් රෝපණ වැඩසටහනට සහභාගී විය යුතු බවත් සඳහන්.

දේශගුණික විපර්යාසවල විනාශකාරී බලපෑම්වලින් රට බේරාගැනීමට දරන මෙම උත්සාහයට ජාතියට දක්වන දේශප්‍රේමී දායකත්වයක් ලෙස සලකා සියල්ලන්ගේම සහභාගීත්වය ලබාදෙන ලෙසයි එරට රජය අවධාරණය කර ඇත්තේ.

මෙම වැඩසටහන කෙන්යාවේ භූ දර්ශන සහ පරිසර පද්ධති ප්‍රතිස්ථාපන වැඩසටහනේ කොටසක් වන අතර එය 2032 වසර වන විට ගස් බිලියන 15 ක් වගා කිරීම හා පෝෂණය කිරීම අරමුණු කරයි.

ඒ අනුව විනාශ වූ භූ දර්ශන සහ පරිසර පද්ධති හෙක්ටයාර් මිලියන 10.6 ක් ප්‍රතිස්ථාපනය කිරීම සහ සංරක්ෂණය කිරීමට කටයුතු කරන බවයි විදෙස් මාධ්‍ය වාර්තා කරන්නේ.

මෙලෙස හෙට ක්‍රියාත්මක කිරීමට නියමිත රුක් රෝපණ වැඩසටහන සඳහා ජාතික ස්ථානයක් සහ ප්‍රාන්ත ස්ථාන 47 ක් ක්‍රියාත්මක බවත් සඳහන්.

එක්සත් ජාතීන්ගේ ආහාර හා කෘෂිකර්ම සංවිධානයට (FAO) අනුව 1990 සහ 2010 අතර කෙන්යාවේ වන ආවරණය 12% සිට 6% දක්වා අඩුවී ඇතැයි වාර්තා වේ.

මැයි මාසයේදී, කෙන්යාවේ වසර 40කට පසු රට තුළ ඇති වූ දරුණුතම නියඟයෙන් පසුව නරක අතට හැරුණු මිනිස් – වනජීවී ගැටුම් පිළිබඳව ද දැඩි අවධානයක් යොමුව තිබේ.