බංග්ලාදේශයේ විපක්ෂ නායක සහ ඔහුගේ පක්ෂයේ සාමාජිකයින් පිරිසක් අත්අඩංගුවට ගෙන තිබෙනවා.
ඒ ඩකාහි පැවති ප්‍රචණ්ඩ ආණ්ඩු විරෝධී විරෝධතාවලින් පසුවයි. බංග්ලාදේශ ජාතිකවාදී පක්ෂයේ (BNP) මහලේකම් Mirza Fakhrul Islam Alamgir චෝදනාවලට මුහුණ දී සිටින අය අතර වන බවයි නිලධාරීන් පවසන්නේ.
විරෝධතා අතරතුර ඇති වූ ප්‍රචණ්ඩ ක්‍රියා සම්බන්ධයෙන් ප්‍රශ්න කිරීම සඳහා අලම්ගීර් රඳවාගෙන ඇති බව සඳහන්.
අගමැතිනි ෂෙයික් හසීනාට (Sheikh Hasina) ඉල්ලා අස්විය යුතු යැයි කියමින් සති අන්තයේ දස දහස් සංඛ්‍යාත විරෝධතාකරුවන් පැමිණ සිටි බව වාර්තා වූවා.
එහිදී විරෝධතා හමුවේ එක් පොලිස් නිලධාරියෙකු සහ එක් විරෝධතාකරුවෙකු මිය ගිය බවයි විදෙස් මාධ්‍ය වාර්තා කළේ.
කෙසේ නමුත් 75 හැවිරිදි අලම්ගීර් අත්අඩංගුවට ගැනීමට හේතුව සම්බන්ධයෙන් පරස්පරතා මතුව තිබෙනවා.
ප්‍රාදේශීය මාධ්‍ය වාර්තා සඳහන් කළේ බංග්ලාදේශයේ අගවිනිසුරුවරයාගේ නිවසට එල්ල වූ බව කියන ප්‍රහාරයක් සම්බන්ධයෙන් අලම්ගීර් රඳවාගෙන සිටි බවයි.
නමුත් AFP ප්‍රවෘත්ති ඒජන්සිය ප්‍රකාශ කරන්නේ සෙනසුරාදා පැවති විරෝධතාවයේදී පොලිස් නිලධාරියා මිය යාමෙන් පසු මිනීමැරුම් චෝදනාවකට අලම්ගීර් හට සහ තවත් BNP සාමාජිකයින් 164 දෙනෙකුට චෝදනා එල්ල වී ඇති බවයි.
ඒ අනුව පොලිස් නිලධාරියා කපා කොටා ඝාතනය කර ඇති බව ප්‍රකාශ කර ඇති අතර, ඝාතනය සම්බන්ධයෙන් BNP ක්‍රියාකාරීන්ට චෝදනා එල්ල වී තිබෙනවා.
අග්‍රාමාත්‍ය ෂෙයික් හසීනාට ඉල්ලා අස්වන ලෙස විපක්ෂයේ පුද්ගලයින් බල කර ඇති අතර, වසර 15කට වැඩි කාලයක් බලයේ සිටීමෙන් පසු නිදහස් හා සාධාරණ මැතිවරණයක් පවත්වනු ඇතැයි විශ්වාස කළ නොහැකි බවයි විරෝධතාකරුවන් තර්ක කරන්නේ.