අමෙරිකාවේ නගර තුනක් ලොක්ඩවුන් – ඝාතකයා තවමත් නිදැල්ලේ !

අමෙරිකාවේ ලුවිස්ටන් – මේන් ප්‍රදේශයේ සිදුවූ සමූහ වෙඩි තැබීමෙන්, පුද්ගලයන් 18 දෙනෙකු ජීවිතක්ෂයට පත්ව තවත් 13 දෙනෙකුට තුවාල සිදුව ඇති බව බී.බී.සි. පුවත් සේවය පවසනවා.

වෙඩි ප්‍රහාරය එල්ල කළ සැකකරු 40 හැවිරිදි ‘රොබර්ට් කාර්ඩ්’ ලෙස ප්‍රාන්ත පොලීසිය හඳුනාගත් අතර, ඔහු අමෙරිකා එක්සත් ජනපද හමුදාවේ ආරක්ෂක භටයෙකු බවත් සඳහන්. මේ වන විට ඔහුව සෙවීමේ මෙහෙයුම දෙවන දිනටත් ක්‍රියාත්මක වනවා.

පොලිසිය පවසන්නේ රොබට් කාඩ්, සන්නද්ධ හා භයානක වන අතර ආරක්ෂාව සඳහා තම නිවෙස් තුළ නවාතැන් ගන්නා ලෙස ජනතාවගෙන් ඉල්ලා සිටින බවයි.

වෙඩි තැබීම ලුවිස්ටන් කුඩා නගරයේ පන්දු යැවීමේ මංතීරුවක දී ආරම්භ වූ බව පොලීසිය පවසනවා.

එහිදී එක් කාන්තාවක් සහ පිරිමි 06 දෙනෙකු ජීවිතක්ෂයට පත්ව තිබෙනවා.

මිනිත්තු 10 ක් පමණ ඇතුළත, අසල අවන්හලක් වන Schemengees Bar & Grille වෙතින්ද වෙඩි තැබීමක් වාර්තා වූ අතර, තවත් පුද්ගලයින් අට දෙනෙකුට ද වෙඩි තබා තිබෙනවා. මේ අතර, ලුවිස්ටන් සහ ඒ අවට නගර තුනක ආරක්ෂාව දැඩි කර පාසල් මෙන්ම බොහෝ ප්‍රාදේශීය ව්‍යාපාර වසා දමා ඇති බවයි විදෙස් වාර්තා පවසන්නේ.