මත්පැන් අලෙවි හලක් නිසා පූජාපිටිය උණුසුම් වෙයි !

පූජාපිටිය ප්‍රදේශයේ විවෘත කරන ලද නව මත්පැන් අලෙවි හලකට එරෙහිව පැවැති ගිහි පැවිදි විරෝධතාවක් හේතුවෙන් දැඩි උණුසුම් සහගත තත්ත්වයක් උද්ගත වී තිබෙනවා.

අද (22) උදෑසන සිට දහවල් දක්වා මත්පැන් අලෙවි හල ඉදිරිපිට විරෝධය පැවති අතර මේ සඳහා ප්‍රදේශයේ වෙහෙර විහාරස්ථානවල භික්ෂූන් වහන්සේ මෙන්ම අන්‍යාගමික පූජ්‍ය, පූජක වහන්සේලා ද එක්ව සිටියා.

ප්‍රදේශවාසීන් සඳහන් කරන්නේ ජනතාවට ජීවන බර දරාගැනීමට නොහැකි අවස්ථාවේ මත්පැන් අලෙවිහල් විවෘත කිරීමෙන් ආර්ථිකය තවතවත් කඩාවැටීමට ලක්වී ප්‍රදේශයේ දැඩි ආරාවුල් මෙන්ම ජන ජීවිතයද අවුල් සහගත තත්වයක් උද්ගතවන බවයි.

විරෝධතාවය සඳහා දහම් පාසල් නියෝජනය කරමින් දරු දැරියන් පවා එක්ව සිටි අතර විරෝධතාවයට එක්ව සිටි පිරිසක් පූජාපිටිය මහනුවර මාර්ගය වසා දැමීමට උත්සාහ කළද පොලිස් නිලධාරීන් එක්ව එම උත්සාහය ව්‍යර්ථ කළා.

ප්‍රදේශවාසීහු සඳහන් කළේ මත්පැන් අලෙවිහල වසා දමන තුරු මෙම විරෝධතා පවත්වන බවයි.