Israel-Hamas War – සටන් විරාම නෑ, ඊශ්‍රායලයෙන් සහ හමාස් වෙතින් නිවේදනයක් !

ඊශ්‍රායලය විසින් ගාසා තීරයට ප්‍රහාර තීව්‍ර කිරීමත් සමඟ සටන් විරාම සැලසුම් ඇනහිට ඇති බව විදෙස් මාධ්‍ය වාර්තා කරනවා.

ඒ අනුව වටලනු ලැබූ පලස්තීන ප්‍රදේශයෙන් විදේශ ගමන් බලපත්‍ර හිමියන්ට පිටව යාමට සහ ආධාර ගෙන ඒම සඳහා දකුණු ගාසා තීරයේ කෙටි සටන් විරාමයක් සඳහා වූ බලාපොරොත්තු බිඳ වැටී ඇති බවයි වැඩිදුරටත් වාර්තා වන්නේ.

පවතින තත්ත්වය හමුවේ ආහාර, ඉන්ධන සහ ජලය හිඟ වීමත් සමඟ, රටවල් කිහිපයකින් ලද ආධාර ටොන් ගණනක් ඊජිප්තුවේ සිට ගාසා වෙත ආරක්ෂිතව බෙදා හැරීම සඳහාත් විදේශ ගමන් බලපත්‍ර හිමියන් රෆා දේශසීමාව හරහා ඉවත් කිරීමට සැලසුමක් ඇති බවත් මීට පෙර විදෙස් මාධ්‍ය වාර්තා කර තිබුණා.

නමුත් ඊශ්‍රායල අගමැති බෙන්ජමින් නෙතන්යාහු නිවේදනයක් නිකුත් කරමින් සඳහන් කළේ

“විදේශිකයන් පිටතට ගැනීම සඳහා ගාසා තීරයේ දැනට සටන් විරාමයක් සහ මානුෂීය ආධාර නොමැත” යනුවෙන්.

එමෙන්ම හමාස් නිලධාරි ඉසාත් එල් රෙෂික් රොයිටර් පුවත් සේවය හමුවේ ප්‍රකාශ කර තිබුණේ ඊජිප්තුව සමඟ හරස් මාර්ගයක් විවෘත කිරීම හෝ තාවකාලික සටන් විරාමයක් පිළිබඳ පළවන වාර්තාවල කිසිදු “සත්‍යතාවක්” නොමැති බවයි.

මේ සම්බන්ධව ඊජිප්තුව පවසන්නේ පසුගිය දිනවල මෙම ”රෆා” දේශසීමා (Rafah border) හරස් මාර්ගය ඊජිප්තුව පැත්තෙන් විවෘතව පැවති නමුත් පලස්තීන පැත්තෙන් ඊශ්‍රායල බෝම්බ ප්‍රහාර හේතුවෙන් ක්‍රියා විරහිත වූ බවක්.

කෙසේ නමුත් රොයිටර් මාධ්‍යවේදීන් පෙන්වා දුන්නේ ඊජිප්තුවට ඇතුළු වීමට බලා සිටි කුඩා පිරිසක් ”රෆා” දේශසීමාවෙහි රැස්ව සිටින බවක්. මේ අතර එක්සත් ජනපදය විසින් ගාසා තීරයේ සිටින තම පුරවැසියන්ට පිටතට යාමට හැකි වන ලෙස මෙම හරස් මාර්ගයට සමීප වන ලෙස දන්වා තිබූ බවත් සඳහන්.

ගාසා හි බලධාරීන් පෙන්වා දෙන්නේ ඊශ්‍රායල ප්‍රහාරවලින් මේ වන විට අවම වශයෙන් පුද්ගලයන් 2,750 ක් මිය ගොස් ඇති අතර, ඔවුන්ගෙන් හතරෙන් එකක් ළමයින් වන බවයි.

එමෙන්ම 10,000 කට ආසන්න පිරිසක් තුවාල ලබා ඇති බව සඳහන්. එමෙන්ම තවත් පුද්ගලයන් 1000ක් පමණ අතුරුදන්ව ඇති අතර ඔවුන් සුන්බුන්වලට යටවී ඇතැයි විශ්වාස කරන බව සඳහන් වනවා.