නිල සංචාරයක් සඳහා මෙරටට පැමිණි ඉන්දීය විදේශ අමාත්‍ය එස්. ජයශංකර් සිය සංචාරයේ කටයුතු අවලංගු කර හදිසියේ ම සිය රට බලා ගොස් ඇති බවට තොරතුරු වාර්තා වනවා.
ඔහු පසුගියදා ශ්‍රී ලංකාවට පැමිණියේ කොළඹ පැවැත්වෙන ”අයෝරා” (IORA) ජාත්‍යන්තර සමුළුව සඳහා සහභාගිවීම සඳහායි.
කෙසේ වෙතත් ඔහුගේ සංචාරයේ දෙවැනි දිනයේ සියලු නිල කටයුතු අවලංගු කිරීමටයි පියවර ගෙන ඇත්තේ.
අමාත්‍යවරයා පසුගිය අඟහරුවාදා සවස ජනාධිපතිවරයා හමු වූ අතර එම අවස්ථාවේ දී දෙරට අතර ගිවිසුම් ගණනාවකට අත්සන් කළ බව සඳහන්.
අනතුරුව ජනාධිපති රනිල් වික්‍රමසිංහ මහතා සමඟ වෙනම විශේෂ සාකච්ඡාවක් ද පවත්වා තිබුණා.
එහිදී ආන්දෝලනයට ලක්වූ චීන පර්යේෂණ නෞකාවේ ශ්‍රී ලංකා ගමන ගැන සිය රජයේ විරෝධය ඉන්දීය විදේශ අමාත්‍යවරයා විසින් ප්‍රකාශ කර ඇති බවයි වාර්තා වන්නේ.
එහි දී ජනාධිපතිවරයා පවසා ඇත්තේ තමන්ගේ ඉදිරි චීන නිල චාරිකාවේදී මෙම නැවට අදාළ ප්‍රශ්නය සාකච්ඡා කර විසඳාගන්නා බවයි.
අඟහරුවාදා පස්වරුවේ ආචාර්ය ජයශංකර් මහතා ඉන්දීය මහ කොමසාරිස් ගෝපාල් බාග්ලේ සමඟ හිටපු ජනාධිපති මහින්ද රාජපක්ෂ මහතා හමුවීමට ඔහුගේ නිල නිවසට පැමිණ සාකච්ඡා කර ඇති බව සඳහන්.
එහිදී රටේ දේශපාලන තත්ත්වය ගැන මෙන්ම අනාගත ජනාධිපතිවරණය හා ජනාධිපති අපේක්ෂකයන් පිළිබඳවද තොරතුරු විමසා ඇති බවටයි තොරතුරු වාර්තා වන්නේ.
එම අවස්ථාවට ශ්‍රී ලංකා පොදුජන පෙරමුණේ මහලේකම් සාගර කාරියවසම් මහතා ද එක්ව සිටියා.
කෙසේ වෙතත් පසුදිනට දේශපාලන සාකච්ඡා රැසකට එක්වීමටයි එස්. ජයශංකර් සැලසුම් කර තිබුණේ. ඉන් අනතුරු ත්‍රිකුණාමලයේ යෝජිත ආර්ථික කලාපයේ නිරීක්ෂණ චාරිකාවකට ද ඔහු එක්වීමට අපේක්ෂාවෙන් සිටි බව සඳහන්.
කෙසේ වෙතත් හදිසියේ දෙවැනි දින සියලු නිල කටයුතු අවලංගු කළ ඉන්දීය විදේශ අමාත්‍යවරයා හේතු දැක්වීමකින් තොරව රටින් පිට වී ඇති බවටයි තොරතුරු වාර්තා වන්නේ.
ඉන්දියාවට ගිය පසු ඔහුට එරට ඉහළම පෙළේ ප්‍රභූවරුන්ට ලබාදෙන අධි ආරක්ෂක රැකවරණයක් ලබා දී ඇති බව ද සඳහන්.