මැතිවරණ ක්‍රමය වෙනස් කිරීම සඳහා වන කැබිනට් පත්‍රිකාවක් අධිකරණ අමාත්‍ය විජයදාස රාජපක්ෂ මහතා විසින් කැබිනට් මණ්ඩලය වෙත ඉදිරිපත් කර තිබෙනවා.
ඒ අනුව විධායක ජනාධිපති ක්‍රමය අහෝසි කළ යුතු ද, යන්න පිළිබඳව මහජන මත විමසීම උදෙසා ජනමත විචාරණයක් පවත්වා විධායක අගමැතිවරයෙකු සමඟ පාර්ලිමේන්තුව තවදුරටත් ශක්තිමත් කිරීමට කටයුතු කරනු ඇති බව අද මෙරට ඉංග්‍රීසි පුවත්පතක් වාර්තා කර තිබුණේ.
එහි දී ජනමත විචාරණයක් කැඳවා එහි ප්‍රතිඵල මත එළඹෙන වසරේ පැවැත්වීමට නියමිත ජනාධිපතිවරණයට අදාළ නීති සංශෝධනය සිදු කිරීමෙන් පසු, එය කල් දැමීමට බොහෝ දුරට ඉඩ ඇති බව ද වාර්තා කර තිබුණා.
කෙසේ නමුත් මෙම සූදානමකට ප්‍රධාන දේශපාලන පක්ෂ පාර්ලිමේන්තුවේ දී විරෝධය පළ කිරීමට සූදානමින් සිටින බවයි එම පුවත් වාර්තාව වැඩිදුරටත් සඳහන් කර තිබුණේ.
වත්මන් රජය විධායක ජනාධිපතිවරයෙකු යටතේ කටයුතු කිරීම සඳහා ජනවරමක් මත තේරී පත් වී ඇති බැවින්, අවම වශයෙන් 2025 මහ මැතිවරණය අවසන් වන තුරු හෝ විධායක ජනාධිපති ක්‍රමය පැවතිය යුතු බව ප්‍රධාන ශ්‍රී ලංකා පොදුජන පෙරමුණේ අදහස බව එම පුවත් වාර්තාව පෙන්වා දෙනවා.
එම පක්ෂයේ ඉහළ පෙළ ආරංචි මාර්ගයක් උපුටා දක්වමින් අදාළ වාර්තාව සඳහන් කර තිබුණේ, “මෙම ක්‍රමය අහෝසි කිරීමට නම්, එය 2025 මහ මැතිවරණයෙන් පසුව නව රජයක් බලයට පත්වීමෙන් පසුව විය යුතුයි” ලෙසයි.
මේ අතර එම පුවත් වාර්තාව මගින් දක්වා තිබුණේ, විධායක ජනාධිපති ක්‍රමය අහෝසි කළ යුතු බවට නිරන්තරයෙන් හඬ නගන ජනතා විමුක්ති පෙරමුණ ද මෙය පාර්ලිමේන්තුවට ගෙන ආ පසු ඊට විරුද්ධ වන බව තමන්ට වාර්තා වන බවයි. “ඊළඟ ආණ්ඩුව එන්නේ ජනතා වරමෙන්. ඒ නිසා විධායක ජනාධිපති ක්‍රමය අහෝසි කරන එක ගැන අපිට තීරණයක් ගන්න බැහැ. ඊට කලින් ගත්තොත් අසාර්ථකයි,” යනුවෙන් එම පුවත් වාර්තාව ජවිපෙ ජ්‍යෙෂ්ඨ මන්ත්‍රීවරයෙක් උපුටා දක්වා තිබුණා.
ප්‍රධාන විපක්ෂය වන සමගි ජන බලවේගය ද මේ සම්බන්ධයෙන් සාකච්ඡා ආරම්භ කර ඇති අතර, 2025 පාර්ලිමේන්තු මැතිවරණයේ දී ප්‍රථමයෙන් නව ආණ්ඩුවක් පත් කර ගත යුතු බවට වන ස්ථාවරය ම ගනිමින්, කටයුතු කරනු ඇතැයි එම වාර්තාව වැඩිදුරටත් සඳහන් කරනවා.
මේ අතර අදාළ පුවත් වාර්තාව සඳහන් කර තිබුණේ, ජ්‍යෙෂ්ඨ පාර්ලිමේන්තු මන්ත්‍රීවරුන් පවසන පරිදි, මැතිවරණ ක්‍රමය සංශෝධනය කිරීමට අදාළ කැබිනට් පත්‍රිකාව ඉදිරිපත් වූ පසු දේශපාලන වටපිටාව නිවැරදි නම්, නීතියට අනුව මහජන ජනමත විචාරණයක් කැඳවිය හැක්කේ ජනාධිපතිවරයාට පමණක් බැවින් ජනාධිපතිවරයාගේ අනුදැනුම ඇතිව ජනමත විචාරණයක් කැඳවීමට ඉහළ කවයන් තුළ මේ වන විට සාකච්ඡා පැවැත්වෙන බවයි.
ඒ අනුව අදාළ ජනමත විචාරණයේ ප්‍රතිඵල මත විධායක ජනාධිපති ක්‍රමය අහෝසි කිරීම සඳහා, තුනෙන් දෙකක බලයක් ලබාගැනීම සඳහා එය පාර්ලිමේන්තුවට ගෙන ඒමට නියමිත බව පවසන එම පුවත් වාර්තාව වැඩිදුර දක්වා තිබුණේ, අවශ්‍ය නීති සංශෝධන සිදු කළහොත් 2024 නොවැම්බරයේ දී පැවැත්වීමට බලාපොරොත්තු වන ජනාධිපතිවරණය ද කල් දැමීමට ඉඩ තිබෙන බවයි.