කොළඹ පාසල් සිසුන් අතර බෝවන රෝගයක් ව්‍යාප්ත වෙයි, පාසලක ශ්‍රේණි 3ක් වසා දමයි – දෙමව්පියන්ට විශේෂ දැනුම් දීමක් !

කොළඹ අධ්‍යාපන කලාපයේ පාසල් සිසුන් අතර ඇස් රෝගය බෝවන රෝගයක් ලෙස සීග්‍ර ලෙස පැතිර යන බවට කලාප අධ්‍යාපන කාර්යාලය අනතුරු අඟවා තිබෙනවා.

සියලුම විදුහල්පතිවරුන්ට ලිපියක් යොමුකරමින් කොළඹ කලාපයේ අධ්‍යාපන අධ්‍යක්ෂ පී.ආර්. දේවබන්දු මහතා කියා සිටියේ ඇස් රෝගය වැළඳී ඇති සිසුන් සිටී නම් වහාම පාසල අයත්වන සෞඛ්‍ය වෛද්‍ය නිලධාරි කාර්යාලය දැනුවත් කර නිර්දේශ ලබා ගන්නා ලෙසයි.

එසේම, පාසලේ එලෙස ඇස් රෝගය වැළඳී ඇති සිසුන් සිටී නම් අනෙක් සිසුන්ගෙන් වෙන් කර තබා ගන්නා ලෙසද කලාප අධ්‍යාපන අධ්‍යක්ෂවරයා එමඟින් දැනුම් දී තිබෙනවා.

මේ ආකාරයට විදුහල්පතිවරුන් දැනුවත් කර ඇත්තේ කොටහේන මධ්‍ය මහා විද්‍යාලයේ 06, 07 සහ 08 ‍‍ශ්‍රේණිවල සිසුන් ඇස් රෝගයට ගොදුරුවීමත් සමඟයි.

සෞඛ්‍ය වෛද්‍ය නිලධාරි කාර්යාල නිර්දේශ අනුව ඊයේ දිනයේ සිට එම පාසලේ අදාළ පන්තිවල අධ්‍යාපන කටයුතු සිදු නොකිරීමට තීන්දු කළ බව පළාත් අධ්‍යාපන අධ්‍යක්ෂ නිමල් ජයවීර මහතා කියා සිටියා.

මෙම අක්ෂි රෝගය වැළඳුණු සිසුන් 35 දෙනෙකු පමණ එම පාසලේ සිටි බවත්, එම තත්ත්වය මත කොටහේන මධ්‍ය මහා විද්‍යාලයේ 06, 07 සහ 08 ‍‍ශ්‍රේණි මෙම සතියේ වසා දැමිමට කටයුතු කළ බවත් කොටහේන සෞඛ්‍ය වෛද්‍ය නිලධාරි පැතුම් කොඩිකාර මහතා තවදුරටත් කියා සිටියා.

ඇස් රෝගය දින තුනක පමණ කාලයක් පවතින බවත් ළමයින්ගේ ඇස් රතු වී කැසීමක් සිදුවන්නේ නම් නිවසේදී ප්‍රතිකාර නොගෙන වහාම වෛද්‍ය ප්‍රතිකාර සඳහා යොමුවන ලෙසත් ඔහු දෙමව්පියන්ට දැනුම් දෙනවා. මේ වනවිට ළමයින් අතර මෙන්ම වැඩිහිටියන් අතරද මෙම අක්ෂි වෛරසය ව්‍යාප්ත වෙමින් පවතිනවා.

එම නිසා ඒ පිළිබඳවද අවධානයෙන් සිටිම වැදගත් වන අතර අක්ෂි රෝගය වැළඳුණු පුද්ගලයකුගේ කඳුළු මගින් අනෙක් පුද්ගලයන්ටද කඩිනමින් වෛරසය ව්‍යාප්ත වන බව සෞඛ්‍ය වෛද්‍ය නිලධාරිවරයා ප්‍රකාශ කළා.

සාමාන්‍යයෙන් අක්ෂි රෝග වැළඳීම සිදුවන්නේ උෂ්ණ අධික කාලයක වුවද පසුගිය වැසි සමයේ මෙම අක්ෂි වෛරසය ව්‍යාප්ත වීම විශේෂත්වයක් බව වෛද්‍යවරුන් පෙන්වා දෙනවා.