ලංකාවේ සීමා සහිත එක්සත් ප්‍රවෘත්ති පත්‍ර සමාගම හෙවත් ලේක්හවුස් ආයතනයේ දිනමිණ කර්තෘ මණ්ඩලයේ ප්‍රවෘත්ති කර්තෘ, මාධ්‍යවේදී නලීන් දිල්රුක්ෂ සේවයෙන් ඉල්ලා අස්වීමට සූදානම් වෙයි . X(twitter) හී සටහනක් පළ කරමින් නලීන් දිල්රුක්ෂ පවසන්නේ 28 වසරක ලේක්හවුල් ජීවිතයේ කම්පිතම ලිපිය ලැබූ බවත්, ඉක්ම යා යුතු කාලය පැමිණ ඇති බවත් ය.
“28 වසරක ලේක්හවුස් මාධ්‍ය ජීවිතයේ කම්පිතම ලිපිය ලැබුවෙමි. ඊට පිළිතුරු ද දුනිමි. දැන් ඉතින් ප්‍රවෘත්ති කර්තෘ ධුරයෙන් පමණක් නොව හැමතැනින්ම ඉක්ම යා යුතු කාලයයි.”
මීට අදාළව ලේක්හවුස් ආයතනයෙන් ලද ලිපියක් හා ඊට පිළිතුරු දෙමින් යොමු කළ ලිපිය ද මාධ්‍යවේදී නලින් දිල්රුක්ෂ එම සටහනට එක් කොට තිබෙනවා. ලේක්හවුස් ආයතනය විසින් ඔක්තෝබර් 03 දිනැතිව දිල්රුක්ෂ වෙත යොමු කළ ලිපියකින් ඔහු අනුමැතිය දී පළ කළ පුවතක් සම්බන්ධයෙන් “හේතු විමසා” තිබෙනවා. ඒ සැප්තැම්බර් 30 දිනමිණ ඊ-පුවත්පත තුළ පළ කරන ලද “රට බංකොළොත් වී තිබෙද්දී නායකයින් මාස් පතා රට සවාරි යනවා” මැයෙන් පළ කරන ලද පුවත සම්බන්ධවයි.
ලේක්හවුස් ආයතනය අදාළ ලිපියෙන් චෝදනා කොට ඇත්තේ අදාළ පුවත මගින් “රාජ්‍ය නායකතුමා අපහසුතාවයට පත්වන අන්දමින් ගොනු කර ඇති බව හැඟී යන” බවයි. කෙසේ වෙතත් එම පුවත විපක්ෂ නායක සජිත් ප්‍රේමදාස කළ ප්‍රකාශයක් උපුටා දැක්වීමකි.
ඒ අනුව, එවැනි පුවතක් පළ කිරීමට අනුමැතිය දීම සහ නොසැළකිලිමත් ආකාරයෙන් රාජකාරි කිරීම සම්බන්ධයෙන් විනයානුකූල පියවර නොගැනීමට හේතු ඇතොත් දින 3ක් ඇතුළත යොමු කරන ලෙස ලේක්හවුල් ආයතනය දිල්රුක්ෂට දන්වා තිබෙනවා.
ඒ අනුව, ඔක්තෝබර් 04 දිනම පිළිතුරු ලිපියක් යොමු කරමින් නලීන් දිල්රුක්ෂ දන්වා ඇත්තේ අදාළ ප්‍රවෘත්තිය පළ කිරීමේ වගකීම තමන් දරන බවයි. එසේම විපක්ෂ නායකවරයාගේ එක් පුවතක් හෝ මෙම පුවත්පතේ පළ කරන ලෙස තමන් වෙත උපදෙස් ලබා දී ඇති බව ද එම පිළිතුරු ලිපියේ සඳහන්. ඒ අනුව, විපක්ෂ නායක කාර්යාලය මගින් යොමු කරන ලද මාධ්‍ය නිවේදනයකින් අදාළ පුවත උපුටා ගත් බවත්, එම පුවතේ සම්පූර්ණ වගකීම තමන් දරන බවත් නලීන් දිල්රුක්ෂ සිය ලිපියෙන් දැනුම් දී තිබෙනවා.
එසේම සෑම පුවතක්ම මුල් පිටුවේ පළ වන්නේ කර්තෘ මණ්ඩල අධ්‍යක්ෂවරයාගේ ප්‍රධානත්වයෙන් දිනපතා පැවැත්වෙන රැස්වීමක දී බවත්, පිටු සැකසීමෙන් අනතුරුව එම පුවත්පත පළ කිරීමට පෙර සියලු ඉහළ නිලධාරීන් වෙත යොමු කළ බවත් තම ලිපියෙන් දිල්රුක්ෂ පෙන්වා දී තිබෙනවා.
කෙසේ වෙත්ත අදාළ ලිපිය පළ කිරීමෙන් නොසැළකිලිමත් ආකාරයෙන් කටයුතු කර ඇති බවට ලේක්හවුල් ආයතනය චෝදනා කරන්නේ නම් මේ මොහොතේ සිට දිනමිණ ප්‍රවෘත්ති කර්තෘ ධූරයෙන් තමා ඉවත්වන බව ද නලීන් දිල්රුක්ෂ තම පිළිතුරු ලිපියෙන් ලේක්හවුස් ආයතනය වෙත දැනුම් දී තිබෙනවා.
