ඊශ්‍රායලයට රොකට් ප්‍රහාර 5000ක් !

ඉස්ලාමීය සටන්කාමී කණ්ඩායමක් වන හමාස් සටන්කාමීන් විශාල පිරිසක් හදිසි රොකට් ප්‍රහාරයකින් පසු දකුණු ඊශ්‍රායලයට ඇතුළු වී ඇති බව වාර්තා වනවා.

ගාසා තීරයේ සිට රොකට් 5000කට අධික ප්‍රමාණයක් මෙලෙස ඊශ්‍රායලයට එල්ල කර ඇති බවයි විදෙස් මධ්‍ය වාර්තා කරන්නේ.

ඊශ්‍රායලට එල්ල වූ රොකට් ප්‍රහාරවලින් එක් අයෙකු මියගොස් තවත් 15 දෙනෙකු පමණ තුවාල ලබා ඇති බව එරට ගලවා ගැනීමේ ඒජන්සිය ප්‍රකාශ කළා.

මේ හේතුවෙන් ඊශ්‍රායලය ‘යුධ තත්වයක්’ ප්‍රකාශ කර ඇති බවයි වාර්තා වුණේ.

ඊශ්‍රායල අග්‍රාමාත්‍ය බෙන්ජමින් නෙතන්යාහුගේ කාර්යාලය පැවසුවේ ඔහු කඩිනමින් ආරක්ෂක ප්‍රධානීන්ගේ රැස්වීමක් කැඳවා ඇති බවයි.

ඊශ්‍රායලට ඇතුළු වූ හමාස් සටන්කාමීන් මේ වනවිටත් ගාසා දේශසීමාව අසල කුඩා නගරයේ වීදිවල රැඳී සිටින බවයි වැඩිදුරටත් තොරතුරු වාර්තා වුණේ.

පලස්තීන සටන්කාමී සංවිධානයක් වන හමාස් සංවිධානය ප්‍රහාරයේ වගකීම භාරගෙන ඇති අතර, එහි සන්නද්ධ අංශය පවසන්නේ විනාඩි 20ක් තුළ රොකට් 5000ක් ඊශ්‍රායලයට දියත් කළ බවයි.

මේ අතර ගාසා තීරය අවට ප්‍රදේශයේ පදිංචිකරුවන්ට සිය නිවෙස් ඇතුළත රැඳී සිටින ලෙස ඊශ්‍රායල ආරක්ෂක අංශ උපදෙස් ලබාදී ඇති අතර,දකුණු සහ මධ්‍යම ප්‍රදේශවල සිවිල් වැසියන්ට ද ආරක්‍ෂිත ස්ථානවලට වී රැඳී සිටින ලෙසටයි වැඩිදුරටත් දැනුම් දී ඇත්තේ.