චීනයේ හංජෝ නුවරදී පැවැත්වෙන ආසියානු ක්‍රීඩා උ‍ලෙළේදී ශ්‍රී ලංකාවේ තවත් පදක්කමක් බලාපොරොත්තුවක් අද ගිලිහි ගියේය. ඒ, මීටර 400×4 මිශ්‍ර සහය දිවීමේ තරගය සම්බන්ධයෙන් තබා තිබූ බලාපොරොත්තුවයි.
ශ්‍රී ලංකා කණ්ඩායමේ පදක්කම් බලාපොරොත්තු සපල කරමින් මීටර් 400 මිශ්‍ර සහාය ඉසව්වෙන් තවත් රිදී පදක්කමක් දිනාගත්තද ආසියානු ක්‍රීඩා බලධාරීන් එම පදක්කම ශ්‍රී ලංකාවට අහිමි කිරීමට පියවර ගත්තේය.
ඊට හේතුව වනුයේ තරග අවසානයේදී මංතීරු නීති උල්ලංඝනය කිරීමය.
තරගය ආරම්භ කළ අරුණ දර්ශන, වැරදි මංතීරුවක් ස්පර්ශ කිරීම නිසා කණ්ඩායම තරගයෙන් ඉවත් කෙරුණි.
එනම් ආසියානු ක්‍රීඩා උළෙලේ තරග නීතිරීති අතර, TR17.3.1 උල්ලංඝනය කිරීමෙන් ශ්‍රී ලංකාව දිනාගත් රිදී පදක්කම තෙවැනි ස්ථානයට පත්වූ ඉන්දියාවටත් ලෝකඩ පදක්කම කසකස්තානයටත් පිරි නැමීමට තරග සංවිධායකයින් කටයුතු කළේය.
මෙම තරගයේ රන් පදක්කම බහරේනයටත් (මිනිත්තු 3.14.02) රිදී පදක්කම ඉන්දියාවටත් (මිනිත්තු 3.14.34) ලෝකඩ පදක්කම කසකස්තානයටත් (මිනිත්තු 3.24.85) හිමිවිය.
ශ්‍රී ලංකා මීටර් 400 මිශ්‍ර සහාය දිවීමේ කණ්ඩායමට අරුණ දර්ශන, කාලිංග කුමාරගේ, නදීෂා රාමනායක සහ තරුෂි කරුණාරත්න ඇතුළත් විය.
වසර 17 කට පසු ආසියානු ක්‍රීඩා උලෙළකදී මලල ක්‍රීඩා ඉසව්වෙන් ශ්‍රී ලංකාවට හිමි වීමට තිබූ පදක්කමක් එලෙස අහිමි වී ගියේය.