අතුරුදන් වූ කාන්තාවගේ හිස, අත්, පා නොමැති සිරුර හමුවේ !

කැලණි ගඟේ ඉවුරක තිබී හිස හා අත් පා නොමැති ඊයේ දහවල් කාලයේ හමු වූ කාන්තා මළ සිරුර පසුගිය 27 වැනිදා අතුරුදන් වූ ටී.ජී. ප්‍රදීපා නම් කාන්තාවගේ බව ඇයගේ ඥාතීන් විසින් අද පස්වරුවේ හඳුනාගෙන තිබෙනවා.

ටී.ජී.ප්‍රදීපා නමැති 51 හැවිරිදි කාන්තාවක් පසුගිය 27 වැනිදා උදෑසන සිට අතුරුදන් ව ඇති බව පවසමින් ඇය ගේ දියණිය විසින් මුල්ලේරියාව පොලීසියට පැමිණිල්ලක් ගොනු කර තිබුණා.

සිද්ධිය සම්බන්ධයෙන් මුල්ලේරියාව පොලිස් ස්ථානාධිපතිවරයා විසින් අදාළ දිනයේ දී සීසීටීවී දත්ත පරීක්ෂා කිරීම සඳහා පොලිස් කණ්ඩායමක් යොදවනු ලැබු අතර, අදාළ කාන්තාව අංගොඩ සිට කඩුවෙල දක්වා නිල් පැහැති ත්‍රිරෝද රථයකින් ගමන් කර ඇති බව අදාළ සී.සී.ටී.වී. දත්ත අනුව තහවුරු කරගනු ලැබුවා.

අනතුරුව කඩුවෙල නගර මධ්‍යයේ පිහිටි ආපණ ශාලවක රථ ගාලේ නවතා තිබූ මෝටර් රථයක රියදුරු අසුනේ සිටි පුද්ගලයකු සමඟින් එම ආපණ ශාලවට යන ආකාරය ද සීසීටීවී කැමරාවේ පටිගත වී තිබෙනවා.

එහි දී කාන්තාව විසින් ආහාර මිල දී ගෙන දෙදෙනාම විනාඩි 10ක් පමණ ආහාර ලබා ගැනීමෙන් පසු එම ස්ථානයෙන් පිටව යන අයුරු ද එහි වූ සීසීටීවී කැමරාවේ සටහන්ව තිබෙනවා.

KI 3030 දරන අලු පැහැති මෝටර් රථයකින් ඔවුන් පිටව යන අතර එතැන් සිට අදාළ කාන්තව පිළිබඳ තොරතුරක් අනාවරණ වී නැහැ.

අදාළ මෝටර් රථය සියඹලාපේ ප්‍රදේශයේ පදිංචි ව්‍යාපාරිකයකු වන සුධීර වසන්ත නම් පුද්ගලයෙකුට අයත් වූවක් බව පොලිසිය විසින් අනාවරණ කරගනු ලබනවා.

ඒ ඔස්සේ සොයා බැලීම් සිදුකළ පොලිසියට තොරතුරු වාර්තා වී ඇත්තේ අදාළ කාන්තාව ඔහු සමඟ වසර 20ක පමණ සිට සමීප සබඳතාවක් පවත්වා ඇති බවයි.

දෙදෙනාම විවාහකයින් බවත් ඔවුන් අතර කලක පටන් මුදල් ආරවුලක් තිබී ඇති බවත් පොලිසිය සිදුකළ සොයා බැලීමේදී අනාවරණ වී තිබෙනවා.

අනතුරුව අදාළ පුද්ගලයාට අයිති සියඹලාපේ ප්‍රදේශයේ පිහිටි අත්හැර දමා ඇති නිවසක් පොලීසිය විසින් පරීක්ෂා කිරීමේදී එහි කාමරයක් තුළ තිබී දිගු කෙස් සහ ලේ පැල්ලම් මෙන්ම එම නිවසින් පිටත අර්ධ වශයෙන් පිලිස්සී තිබූ ලේ පැල්ලම් සහිත කාන්තා ඇඳුම් කොටස් ද පොලිසිය විසින් සොයා ගැණුනා.

පසුව සපුගස්කන්ද පොලීසියට අදාළ තොරතුරු ලබාදී ඇති අතර ඔවුන් වැඩිදුරටත් විමර්ශනය කිරීමේදී අදාළ නිවසට කිලෝමීටරයක් පමණ දුරින් වූ කැලණි ගඟේ ඉවුරක තිබී හිස හා අත් පා නොමැති කාන්තා මළ සිරුරක් සොයාගෙන තිබෙනවා.

මෙම සිරුර අතුරුදන් ටී.ජී ප්‍රදීපා නම් 51 හැවිරිදි කාන්තාව ගේ බවට ඇය ගේ ඥාතීන් විසින් අද පස්වරුවේ හඳුනාගත් බවයි පොලිස් මාධ්‍ය ප්‍රකාශක ජ්‍යේෂ්ඨ පොලිස් අධිකාරී නීතිඥ නිහාල් තල්දූව මහතා ප්‍රකාශ කර සිටියේ.

එමෙන්ම ඇය සමඟ සමීප සබඳතාවක් පැවැත්වූ ව්‍යාපාරිකයකු වන සුධීර වසන්ත නම් පුද්ගලයාට විදෙස් ගමන් තහනමක්ද මේ වන විට පනවා ඇති අතර ඔහු අත්අඩංගුවට ගැනීමට මහජන සහාය පතන බවත් පොලිසිය සදහන් කළා.