Asia Cup 2023 – ආසියානු කුසලාන අවසන් තරගයේ පරාජය පිලිබඳ පැමිණිල්ලක් ඉදිරිපත් වෙයි, තරග පාවා දුන්නාදැයි පරීක්ෂණයක් ඉල්ලයි !

ආසියානු කුසලාන ක්‍රිකට් තරගාවලියේ (Asia Cup 2023) අවසන් මහා තරගය ඉන්දියාවට එරෙහිව අසාමාන්‍ය දක්ෂතාවක් පෙන්නුම් කරමින් පරාජයට පත්වීම සම්බන්ධයෙන් වහාම පරීක්ෂණයක් පවත්වන ලෙස අල්ලස, දූෂණය, නාස්තියට එරෙහි පුරවැසි බලය සංවිධානය අද (18) පොලිස් මූලස්ථානය වෙත පැමිණිල්ලක් ඉදිරිපත් කළා.

අල්ලස, දූෂණය, නාස්තියට එරෙහි පුරවැසි බලය සංවිධානයේ සභාපති ජාමුණි කමන්ත තුෂාර මහතා පොලිස් මූලස්ථානය වෙත මෙම පැමිණිල්ල ඉදිරිපත් කරමින් පවසා සිටියේ අවසන් මහා තරගයේදී ශ්‍රී ලංකා කණ්ඩායම ඉතා අඩු ලකුණු සංඛ්‍යාවකට දැවී යාම දැඩි සැකයක් පවතින බවත් තරග පාවාදී ඇත්ද යන්න සැකයක් පවතින නිසා පොලිස් මූලස්ථානයට අදාළ පැමිණිල්ල සිදු කළ බවයි.

ආසියානු කුසලාන ක්‍රිකට් තරගාවලියේ අවසන් මහා තරගයේදී ඉන්දීය කණ්ඩායම හමුවේ ශ්‍රී ලංකා කණ්ඩායම ලකුණු 50කට දැවී ගිය අතර, එදා මෙදාතුර ඕනෑම අවසන් මහා තරගයක ශ්‍රී ලංකා කණ්ඩායමක් සහ වෙනත් ඕනෑම කණ්ඩායමක් දැවී ගිය අඩුම ලකුණු සංඛ්‍යාව ලෙස ද මෙය වාර්තා අතරට එක්විය.