Asia Cup 2023 – කුසල්, සධීර, අසලංකගේ කර මතින් ශ්‍රී ලංකා කණ්ඩායම 11 වන වරටත් ආසියානු කුසළාන අවසන් මහා තරගයකට සුදුසුකම් ලබයි !

කුසල් මෙන්ඩිස්, සධීර සමරවික්‍රම හා චරිත් අසලංක පිතිකරණයෙන් දැක් වූ සුපිරි දක්ෂතා හමුවේ මෙවර ආසියානු කුසලාන එක්දින ක්‍රිකට් තරගාවලියේ (Asia Cup 2023) 11 වැනි තරගයෙන් පාකිස්තානය පරදා ඩක්වර්ත් ලුවිස් න්‍යාය යටතේ කඩුලු දෙකක තියුණු ජයක් වාර්තා කරමින් 11 වැනි වරටත් ආසියානු කුසලාන එක්දින ක්‍රිකට් තරගාවලියක අවසන් මහා තරගයට සුදුසුකම් ලබා ගැනීමට ශ්‍රී ලංකා කණ්ඩායම සමත් වුණා.

කොළඹ ආර්. ප්‍රේමදාස ක්‍රීඩාංගනයේ පැවැති තරගයට වර්ෂාවෙන් බාධා එල්ල වීම හේතුවෙන් පළමුව එක් ඉනිමක් පන්දුවාර 45 කට සීමා කෙරුණු අතර, කාසියේ වාසිය දිනා පළමුව පන්දුවට පහරදුන් පාකිස්තාන ඉනිම අතරවාරයේ දී ද තරගයට වර්ෂාවෙන් යළි බාධා එල්ල වීම නිසා ඉනිමක් පන්දුවාර 42 කට සීමා කෙරුණා.

පාකිස්තානය කඩුලු 7 ක් දැවී ලකුණු 252 ක් රැස් කළේ මොහොමඩ් රිස්වාන් පන්දු 73 කින් නොදැවී රැස් කළ ලකුණු 86 න් ශක්තිමත් වෙමින්.

කෙසේ වෙතත්, ඩක්වර්ත් ලුවිස් න්‍යාය යටතේ ශ්‍රී ලංකාවට තරගය ජය ගැනීම සදහා හිමි වූ ඉලක්කය පන්දුවාර 42 කදී ලකුණූ 252 ක්. ඒ අනුව පිළිතුරු ඉනිම ක්‍රීඩා කළ ශ්‍රී ලංකා කණ්ඩායම ඉනිමේ අවසන් පන්දුවේ දී කඩුලු 8 ක් දැවී ජයග්‍රාහී ඉලක්කය පසු කළා.

පළමු කඩුල්ල ලෙස කුසල් පෙරේරා පන්දු 8 කින් ලකුණු 17 ක් ලබා සිටියදී අවාසනාවන්ත ලෙස දුවද්දී දැවී ගියා. පැතුම් නිස්සංක පන්දු 44ක් තුල ලකුණු 29යි. අනතුරුව සධීර සමරවික්‍රම හා කුසල් මෙන්ඩිස් අතර තෙවැනි කඩුල්ල සදහා පන්දු 98කදි ගොඩ නැගුණු සම්බන්ධතාවය ලකුණු 100ක්. සධීර පන්දු 51 කින් ලකුණු 48 ක් ලබා සිටියදී ඉෆ්ටිකාර් අහ්මඩ්ගේ පන්දුවක් හමුවේ ස්ටම්ප් කිරීමකට හසු වීමෙන් දැවී ගියා.

පසුව කුසල් සමග පිටියේ එක් වූ චරිත් අසලංක ලකුණු 33 ක සම්බන්ධතාවයක් සිව්වැනි කඩුල්ල වෙනුවෙන් ගොඩ නගමින් ශ්‍රී ලංකාව තවදුරටත් ජයග්‍රහනයට සමීප කළා.

කුසල් මෙන්ඩිස් හයේ පහරක් හා හතරේ පහර 8 ක් සමගින් පන්දු 87කින් ලකුණු 91ක් ලබා සිටිය දී අවාසනාවන්ත ලෙස දැවී ගියා.

යළි අසාර්ථක වූ නායක දසුන් ශානක රැස් කළේ ලකුණු 2 ක් පමණයි. ශ්‍රී ලංකාවට අවසන් පන්දු 12 තුළ දී ජයග්‍රහනය සදහා කඩුලු 5ක් අතැතිව ලකුණු 12 ක් අවශ්‍ය වුණා.

එවැනි පසුබිමක ධනංජය ද සිල්වා ලකුණු 5 කටත්, දුනිත් වෙල්ලාලගේ පළමු පන්දුවෙනුත් දවා ගනිමින් ශහීන් ශාහ් අෆ්රිඩි තරගයේ ජයග්‍රහනය පිළිබද බලාපොරොත්තු යළි පාකිස්තානයට හිමි කර දීමට 41 වැනි පන්දුවාරයේ දී සමත් වුණා.

ඒ අනුව අවසන් පන්දුවාරයේ දී තරගය ජය ගැනීමට ශ්‍රී ලංකාවට කඩුලු 3ක් අතැතිව ලකුණු 8 ක් ලබා ගත යුතු වුණා. නමුත්, අසලංක නොදැවී පන්දු 47ක් තුල ලකුණු 49ක් ලබා ගනිමින් සිය කණ්ඩායම අවසන් තරගය වෙත රැගෙන යාමට සමත් වුණේ රැස්ව සිටි දහස් ගණනක් වූ ශ්‍රී ලංකා ප්‍රේක්ෂකයින්ගේ ප්‍රීති ඝෝෂා මැදයි.

අවසන් පන්දුවේ දී ජයග්‍රහනය සදහා ලකුණු 2 ක් අවශ්‍ය වූ අතර, deep square leg කලාපයට පහරල් එල්ල කරමින් එම ලකුණු 2 රැස් කිරීමට චරිත් අසලංක සමත් වුණා.

පන්දු යැවීමේ දී ඉෆ්ටිකාර් අහ්මඩ් ලකුණු 50 කට කඩුලු 3 ක් දවා ගත්තා.

තරගයේ පළමුව පන්දුවට පහරදුන් පාකිස්තානය වෙනුවෙන් අබ්දුල්ලාහ් ශෆික් පන්දු 69කින් ලකුණු 52ක් ද, ඉෆ්ටිකාර් අහ්මඩ් පන්දු 40 කින් ලකුණු 47 ක් ද රැස් කිරීමට සමත් වුණා. පාකිස්තාන ඉනිමේ කඩුලු 5 ක් ලකුණු 130 ක් තුළ දැවී යාමෙන් පසුව රිස්වාන් හා ඉෆ්ටිකාර් 6 වැනි කඩුල්ල වෙනුවෙන් පන්දු 78 කින් ගොඩ නැගූ සම්බන්ධතාවය ලකුණු 108 ක්.

පන්දු යැවීමේ දී මතීෂ පතිරණ ලකුණු 65 කට කඩුලු 3 ක් දවා ගත් අතර, කසුන් රාජිත වෙනුවට කණ්ඩායමට කැදවූ ප්‍රමෝද් මදුෂාන් ලකුණු 58 කට කඩුලු 2 ක් දවා ගත්තා. මහීෂ් තීක්ෂණ හා දුනිත් වෙල්ලාලගේ අතරේ කඩුල්ල බැගින් බෙදී ගියා.

තරගයේ දක්ෂතම ක්‍රීඩකයා බවට පත්වුයේ පරිණත ඉනිමක් ක්‍රීඩා කරමින් ශ්‍රී ලංකා කණ්ඩායමේ නැංගුරම බවට පත්වූ කුසල් මෙන්ඩිස්.

ඒ අනුව ලබන ඉරිදා (17) පැවැත්වෙන අවසන් මහා තරගයේ දී ශ්‍රී ලංකා කණ්ඩායම ඉන්දියාවට එරෙහිව තරග වැදීමට නියමිතයි.