කාලගුණය චණ්ඩ වෙයි, කොළඹ ගසක් කඩා වැටී ගමනාගමනයට බාධා – පස් කන්දකට යටවී පුද්ගලයෙක් මරුට (VIDEO)

කොටුව දුම්රියපොළ ඉදිරිපිට විශාල ප්‍රමාණයේ මාර ගහක් කඩා වැටීමෙන් ඕල්කට් මාවතේ රථවාහන ගමනාගමනය එක් මංතීරුකට සීමා කර තිබේ.

කොළඹ නගර සභාවේ ගිනි නිවන ඒකකය සහ ආරක්ෂක අංශ මේ වනවිට ගස ඉවත් කිරීමේ කටයුතු සිදුකරමින් පවතී.

මේ අතර ඇදහැලෙන තද වැසි සමඟ කොළඹ මරදාන, ආමර්වීදිය ඇතුළු මාර්ග රැසක් ජලයෙන් යටවී ඇතැයි වාර්තාකරුවන් පැවසීය.

ඒ අනුව අදත් පළාත් රැසකට මිලිමීටර 100ක පමණ තද වැසි ඇති විය හැකි බව කාලගුණවිද්‍යා දෙපාර්තමේන්තුව නිවේදනය කරයි.

අද අලුයම් කාලයේ සිට කොළඹ නගරය හා තදාසන්න ප්‍රදේශවලට තද වැසි ඇද හැලුණි. ඒ සමග කොළඹ නගරයේ මාර්ග රැසක් ජලයෙන් යටවුණි.

මරදාන ඩීන්ස් මාර්ගයේ කොටසක් ද ජලයෙන් යටවී තිබුණි. සෙසු ප්‍රදේශවලටත් අද වැසි ඇද හැලෙමින් පවතී.

නියඟයෙන් පීඩා විඳින අනුරාධපුර දිස්ත්‍රික්කයේ ස්ථාන කිහිපයකටත් අද උදෑසන සිට වැසි ඇද හැලෙන බව වාර්තාකරු සඳහන් කළේය.

ඒ අනුව ගෙවුණු පැය 24 තුළ වැඩිම වර්ෂාපතනයක් වන මිලිමීටර 106.3ක් ලැබී ඇත්තේ ලබුගම ප්‍රදේශයටය. කාලගුණවිද්‍යා දෙපාර්තමේන්තුව පවසන්නේ අද දිනයේ බස්නාහිර, සබරගමුව, දකුණ, මධ්‍යම සහ වයඹ පළාත්වලට මිලිමීටර 100ක පමණ තද වැසි ඇති විය හැකි බවය.

මේ අතර නාවලපිටිය ප්‍රදේශයට බලපා ඇති අයහපත් කාලගුණයත් සමග නිවසක අලුතින් ඉදිකිරීමට නියමිත බැම්මක් සඳහා අත්තිවාරමක් කපමින් සිටි පුද්ගලයෙකු මතට පස් කන්දක් කඩා වැටී තිබේ.

ප්‍රදේශවාසින් එක්ව පස් කන්දට යට වු පුද්ගලයා ඉන් මුදාගෙන නාවලපිටිය දිස්ත්‍රික් මහ රෝහලට රැගෙන ගියත් ඔහු ඒ වනවිටත් මියගොස් සිටි බව පොලීසිය පැවසුවේය. මියගියේ නාවලපිටිය වෙරළුගස්හින්න ප්‍රදේශයේ පදිංචි 62 හැවිරිදි තිදරු පියෙක් වන විමල් ජයසිරි නැමත්තාය.

මෙවැනි පසුබිමක ජාතික ගොඩනැගිලි පර්යේෂණ සංවිධානය දිස්ත්‍රික්ක 3ක ප්‍රදේශ කිහිපයක් සඳහා ඇම්බර් හෙවත් දෙවන අදියරේ නායයෑම් අනතුරු ඇඟවීම් නිකුත් කළේය.

ඒ අනුව කළුතර දිස්ත්‍රික්කයේ බුලත්සිංහල සහ ඉංගිරිය යන ප්‍රාදේශීය ලේකම් කොට්ඨාස සඳහාත් කෑගල්ල දිස්ත්‍රික්කයේ වරකාපොළ ප්‍රාදේශීය ලේකම් කොට්ඨාසයේ පදිංචිකරුවන් අවධානයෙන් පසුවිය යුතු වේ.

මීට අමතරව රත්නපුර දිස්ත්‍රික්කයේ රත්නපුර, ඇහැළියගොඩ සහ කුරුවිට යන ප්‍රාදේශිය ලේකම් කොට්ඨාස සඳහාත් දෙවන අදියරේ නායයෑම් අනතුරු ඇඟවීම් නිකුත් කර තිබේ.