දැනට තේරීපත්වී ඇති ලක්ෂ 15 වන අස්වැසුම ප්‍රතිලාභීන්ගේ නිවැරදිව තොරතුරු තහවුරු කරගෙන ඇති ප්‍රතිලාභී පවුල් ලක්ෂ 8ක් සදහා අවශ්‍ය මුදල් සඳුදා දින මහා භාණ්ඩාගාරය මගින් බැංකු වෙත බැර කරන බව මුදල් රාජ්‍ය අමාත්‍ය ශෙහාන් සේමසිංහ මහතා පවසයි.
ඒ අනුව අඟහරුවාදා හෝ බදාදා වන විට අදාළ ප්‍රතිලාභීන්ගේ ගිණුම් වෙත සිය ජූලි මස වාරියක ලැබෙනු ඇති බවයි. අනුරාධපුරයේ අද (27) පැවැති මාධ්‍ය හමුවක දී අමාත්‍යවරයා මේ බව පැවැසීය.
ප්‍රතිලාභ ලැබීම සඳහා තේරීපත් ව එහෙත් බැංකු ගිණුම් ආරම්භ කිරීම ඇතුළු ගෙවීමට අදාළ මුලික අවශතා සපුරා නොමැති ප්‍රතිලාභි පවුල් ඒව කඩිනමින් සපුරාලීමේ අවශ්‍යතාව ඇතැයි අමාත්‍යවරයා පෙන්වා දෙයි.
දැනට ලැබී ඇති ලක්ෂ දහයක් පමණ වන අභියාචනා සහ එක් ලක්ෂ විසි දහසක් පමණ වන විරෝධතා සමාලෝචනය ආරම්භ වී ඇතැයි පවසන සේමසිංහ මහතා පෙන්වා දෙන්නේ එම කටයුතු අවසන් වු වහා ම අදාළ ගෙවීම් සිදු කරන බවයි.
කිසියම් පවුල් ඒකකයක් සාවද්‍ය තොරතුරු ලබා දී ප්‍රතිලාභ ලබා ගත හොත් ඔවුන්ට එරෙහිව නීතිමය පියවර ගන්නා අතර ලබා ගත් මුදල් නැවත අයකර ගැනීමට පියවර ගන්නා බව අමාත්‍යවරයා වැඩි දුරටත් සඳහන් කළේය.