කොළඹ පිහිටා ඇති දෙමළ පාර්ලිමේන්තු මන්ත්‍රීවරුන්ගේ නිවාස ඉදිරිපිට විරෝධතාවක් පැවැත්වීමට කටයුතු කරන බව පාර්ලිමේන්තු මන්ත්‍රී උදය ගම්මන්පිළ මහතා පවසනවා.
ඔහු මේ බව ප්‍රකාශ කළේ, විශේෂ මාධ්‍ය හමුවක් කැඳවමින්.
කුරුන්දූමලෛ ප්‍රදේශයේ දෙමළ ජනයා පසුගිය ද පොංගල් පූජාවක් සූදානම් කර තිබුණා.
ඊට බාධා කිරීමට බොහෝ පිරිස් උත්සහ කළ ද ඊට ඉඩ ලැබුණේ නැහැ. මෙවැනි පසුබිමකයි උදය ගම්මන්පිළ මහතා මෙවැනි ප්‍රකාශයක් සිදු කර ඇත්තේ.
මෙම පූජාවට කිසිදු පාර්ශවයක් බාධා ඇති නොකළ යුතු බවට පාර්ලිමේන්තුන් ගජේන්ද්‍රකුමාර් පොන්නම්බලම් මහතා අධිකරණ නියෝගයක් ගෙන තිබූ බැවින් තමන් ඇතුළු පිරිස පසුගිය 18 වනදා කුරුන්දූමලෛ ප්‍රදේශයට නොගිය බව ද මන්ත්‍රීවරයා ප්‍රකාශ කළා.
එහි දී වැඩිදුරටත් අදහස් පළ කරමින් පිවිතුරු හෙළ උරුමයේ නායකයා අවධාරණය කළේ, ගජෙන්ද්‍රකුමාර් පොන්නම්බලම් මහතා ජාතිවාදි පරපුරකින් පැවැත එන අයෙක් බවයි.
කුරුන්දූර්මලෛහි පිහිටා ඇත්තේ, බෞද්ධ විහාරයක් බවත් ඊට අවශ්‍ය සාක්ෂි රැසක් පවතින බවත් පාර්ලිමේන්තු මන්ත්‍රීවරයා පෙන්වා දෙනවා.
එය ශිව කෝවිලක් වීමට කිසිදු සාක්ෂියක් නොමැති බවයි ඔහු කියා සිටියේ.
ජනාධිපති රනිල් වික්‍රමසිංහ මහතා බලයට පැමිණෙන සෑම අවස්ථාවකදී ම උතුරු – නැගෙනහිර පළාත්වල බෞද්ධ උරුමයන්වලට හානි සිදු වන බව ද ගම්මන්පිළ මහතා අවධාරණය කළා.
ගජේන්ද්‍රකුමාර් පොන්නම්බලම් මහතා කොළඹ ජීවත් වෙමින් උතුර – නැගෙනහිර පළාත්වල ජීවත් වන ජනයා අතර වෛරය පැතිරවීමට කටයුතු කරන බවයි ගම්මන්පිළ මහතා අවධාරණය කළේ.
ඔහු පමණක් නොවන එම්.ඒ සුමන්දිරන්, සී.වි විග්නේෂ්වරන් ඇතුළු පාර්ලිමේන්තු දෙමළ මන්ත්‍රීවරුන් කොළඹ ප්‍රදේශවල ජීවත් වනවා.
කෙසේ වෙතත් සිය දේශපාලන වාසි වෙනුවෙන් ජනතාව අතර ගැටුම් ඇති කරවීමට කටයුතු කරන බවයි උදයගම්මන්පිළ මහතා වැඩිදුරටත් කියා සිටියේ.