කොළඹ ජාතික පුස්තකාල හා ප්‍රලේඛණ සේවා මණ්ඩලය විසින් ග්‍රන්ථ ප්‍රකාශනයේදී ලබාදෙනු ලබන ජාත්‍යන්තර ප්‍රමිතිගත පොත් අංක (ISBN) වෙනුවෙන් අයකරනු ලැබූ ගාස්තුව 150%න් ඉහළ නංවා තිබෙනවා.
ඒ් අනුව මෙතෙක් ග්‍රන්ථයකට ISBN වෙනුවෙන් අයකරනු ලැබූ රු.200ක මුදල වෙනුවට සැප්තැම්බර් මස 01 වන දින සිට රු.500ක් අය කිරීමට ජාතික පුස්තකාල මණ්ඩලය විසින් තීරණය කර ඇති බවයි වාර්තා වෙන්නෙ.
ඉකුත් 2022 වසර වන විට රු.100ක් ව පැවති මෙම මුදල එම වසරේ ජූනි මස සිට 100%න් වැඩි කරන ලද්දේ වාර ප්‍රකශන අංක සඳහා අයකරනු ලබන (ISSN) සහ සංගීත ප්‍රස්තර සඳහා (ISMN) ගාස්තුවද, ඒ් අයුරින්ම 100%න් ඉහළ නංවමින්. මෙසේ තිබියදී වාර ප්‍රකාශන සඳහා 2023 මාර්තු සිට ISSN වෙනුවෙන් නැවත 150%න් ගාස්තු වැඩි කරමින් එක් වාර ප්‍රකාශනයක් සඳහා රු.500ක ගාස්තුවක් අයකිරීමට තීරණය කර තිබෙනවා.
එළඹෙන සාහිත්‍ය මාසය හෙවත් සැප්තැම්බර් 01 වන දින සිට යළි 150%න් ISBN ගාස්තු වැඩිකරන්නේද, මේ අයුරින් ඉතා කෙටි කලක් තුළ නැවත නැවතත් ගාස්තු වැඩිකර තිබියදී වීම විශේෂත්වයක්.
හදිසියේම මේ අයුරින් ගාස්තු වැඩිකරන්නට තීරණය කර ඇත්තේ මන්දැයි, මොනරා වෙනුවෙන් අප කළ විමසුමකට ප්‍රතිචාර දැක්වූ, නම හෙළිකිරීමට අකමැති වූ, ජාතික පුස්තකාල හා ප්‍රලේඛණ සේවා මණ්ඩල අධ්‍යක්ෂ මණ්ඩල සාමාජිකයෙකු කියා සිටියේ ලක්ෂ 5ට අධික සභාපතිවරයාගේ වැටුප ගෙවීමට පුස්තකාලයට අදායමක් නොවීම හේතුවෙන් මෙම ගාස්තු වැඩි කිරීම සිදුකර ඇති බවයි.
ජාතික පුස්තකාලයේ සභාපති මහාචාර්ය නන්ද ධර්මරත්න මහතාට වැටුප් සහිතව වසරක නිවාඩු හිමිව තිබියදී, ජාතික පුස්තකාලයට අනියුක්ත කර තිබුණු අතර 2022 පෙබරවාරි මාසයේදී පත්වීම ලබන ඔහුට විශ්වවිද්‍යාලයෙන් ලබාදුන් වසරක කාලය 2023 පෙබරවාරි මාසයෙන් අවසන්වීමට නියමිතව තිබුණා. මේවන විට විශ්වවිද්‍යාලවල ආචාර්යවරුන්ගේ හිඟය හා ජ්‍යෙෂ්ඨයින් විශ්වවිද්‍යාල හැරයාම නිසා මහාචාර්ය නන්ද ධර්මරත්න මහතාද, තවදුරටත් විශ්වවිද්‍යාල රාජකාරිවලින් නිදහස් කරන්නට පරිපාලනය විසින් කැමැත්තක් නොදැක්වූ බවයි, විශ්වවිද්‍යාල ආරංචි මාර්ග පවසන්නෙ. එසේ තිබියදී, 2023 මාර්තු පමණ වන විට දේශපාලන හිතෛෂිවන්තභාවය ශක්තිමත් නිසාම විශේෂ අනුමැතියක් සහිතව තවදුරටත් ජාතික පුස්තකාලයේ සභාපතිවරයා ලෙස තනතුර දැරීමට අනුමැතිය ලබන බවයි, වාර්තා වෙන්නේ.
එහෙත් තවදුරටත් විශ්වවිද්‍යාලයෙන් ඔහුට නියමිත වැටුප ගෙවීමට නොහැකි නිසාත්, ජාතික පුස්තකාලයට ඔහුගේ ලක්ෂ 5ට අධික වැටුප ගෙවීමට සිදුව තිබෙනවා. නම හෙළිකිරීමට අකමැති අධ්‍යක්ෂ මණ්ඩල සාමාජිකයා පෙන්වා දුන් පරිදි රාජ්‍ය ආයතන විසින් එකී ආයතනවල නඩත්තුවට මුදල් සොයාගත යුතුය යන රජයේ ස්ථාවරය නිසාත්, සභාපතිවරයාගේ වැටුප ගෙවීමට පුස්තකාලයට විශේෂ ආදායම් මාර්ග නොමැති නිසාත්, අධ්‍යක්ෂ මණ්ඩලය විසින් අවස්ථා කිහිපයකදී නිර්මාණශීලි ලේඛනය, පුවත්පත්‍ කලාව ආදී පාඨමාලා ආරම්භ කළත් ඒ්වා සාර්ථක වී නෑ.
ඊට අමතරව ආයතන පරිශ්‍රයට අයත් ඉඩම තුළ නැවුම් කිරි හළක් ඇතුළු වෙළෙඳ කුටි ලෙස ස්ථාන කිහිපයක් බදු පදනම මත ලබාදී, එයින් ආදායමක් ලබන්නටත් උත්සාහ කළ නමුත්, එයද සාර්ථක නොවූ බවයි, වාර්තා වෙන්නෙ. මේ හේතුව නිසා අධ්‍යක්ෂ මණ්ඩලයේ අතැමුන්ගේ අකමැත්ත මත වුවද, අවසාන තුරුම්පුව ලෙස ISBN ගාස්තු මෙලෙස ඉතා කෙටි කලක් තුළ විශාල ප්‍රතිශතයකින් ඉහළ නැංවීමට කටයුතු කෙරුණු බවත්, දල වශයෙන් වසරකට පොත් 10,000ක පමණ ප්‍රමාණයක් සඳහා මෙම අංකය ලබාදෙනු ලබන නිසාම විශාල ආදායමක් ලෙස එය සැලකිය හැකි වෙනු ඇති බවත්, අධ්‍යක්ෂ මණ්ඩල සාමාජිකයා පෙන්වා දෙනවා.
කෙසේ වෙතත් මේ සම්බන්ධයෙන් අප කළ විමසුමකදී, ජාතික පුස්තකාල හා ප්‍රලේඛණ සේවා මණ්ඩල සභාපති මහාචාර්ය නන්ද ධර්මරත්න මහතා කියා සිටියේ රජය විසින් ප්‍රතිපාදන වෙන් නොකිරීම නිසා මීට ප්‍රථම නොමිලේ ලබාදුන් සේවාවන් පවා මුදල් අයකර ලබාදිය යුතු තැනට පත්ව ඇති බවයි. වැඩිදුරටත් අදහස් දක්වමින් මහාචාර්යවරයා මෙසේද, කියා සිටියා.
අමාත්‍යංශවලින් කියන්නෙ අපි දෙන සර්විස් ඒක වැඩිකරන්න කියලා. හැබැයි මහා භාණ්ඩාගාරයෙන් සල්ලි දෙන්නෙ වැටුප් ගෙවන්න විතරයි. අපට ලැබෙන ආදායම් වැඩිකරගන්නෙ නැතිව කොහොමද, සර්විස් එකක් දෙන්නෙ. ඔයාලම හොයල බලන්නකෝ, අමෙරිකාවෙ එහෙම ISBN අංකයකට යන රේටිං කොහොමද කියලා.පොත් කාරයෝ මිල වැඩිකරලා තියෙනවා. රුපියල් 500ට තිබ්බ පොත දැන් 2000ක් විතර වෙනවා. එයාලා එහෙම කරනවා නම් අපි කොහොමද, මේ තරමින් හෝ ගාස්තු වැඩි නොකර මේ ආයතන පවත්වාගෙන යන්නේ. විදුලිබිලම මාසෙකට ලක්ෂ 30ක් විතර යනවා. ඒ් නිසාම අපේ සර්විස් එකත් මාර්කට් කරන්නම වෙනවා
කෙසේ වෙතත් වැඩිවූ ගාස්තුව පිළිබඳ නිල නිවේදනයක් තාමත් ජාතික පුස්තකාල හා ප්‍රලේඛණ සේවා මණ්ඩල නිල වෙබ් අඩවියේ දැක්වෙන්නෙ නෑ.
ඒ් මන්දැයි අප කළ විමසීමේදී, තාක්ෂණික අංශයේ නිලධාරියෙකු කියා සිටියේ තාක්ෂණික දෝෂයක් හේතුවෙන් පුවත වහා යාවත් කාලීන කිරීමට හැකියාවක් නොමැති බවයි.
එබැවින් වෙබි අඩවිය නිර්මාණය කළ බාහිර ආයතනයට ඒ් බව දන්වා ඇති බවත්, ලබන සඳුදා පමණ වන විට එය වෙබ් අඩවියේ පළවනු ඇති බවත්, ඔහු වැඩිදුරටත් කියා සිටියා.
උපුටා ගැනීම – මොනරා