පොදු ප්‍රවාහනය සඳහා යොදා ගනු ලබන වාහනවලට පනවා ඇති ආනයන තහනම ඉවත් කිරීමට රජයේ අවධානය යොමුවී ඇතැයි මුදල් රාජ්‍ය අමාත්‍ය රංජිත් සියඹලාපිටිය මහතා පවසනවා.
පොදු ප්‍රවාහනයට යොදා ගනු ලබන බස් රථ මෙන්ම භාණ්ඩ ප්‍රවාහනයට යොදා ගන්නා ට්‍රක් සහ ලොරි රථ ආනයන තහනම ද කඩිනමින් ඉවත් කිරීම සම්බන්ධයෙන් අවධානය යොමුවී ඇති බවයි අමාත්‍යවරයා සඳහන් කළේ.
මුදල් අමාත්‍යංශය ඇතුලු අනෙකුත් අමාත්‍යංශ මෙන්ම මහ බැංකුවේ ආර්ථික පර්යේෂණ දෙපාර්තමේන්තුව වැනි ආයතන එක්ව සිදු කළ සමාලෝචනයකින් අනතුරුව මෙම තීරණයට එළඹ ඇති බව ද ඔහු පෙන්වා දුන්නා.
එම සාකච්ඡාවලදී විශේෂයෙන් අවධානය යොමු වී ඇත්තේ සමස්ත ජනතාවගේ අවශ්‍යතා වෙනුවෙන් පොදු ප්‍රවාහනයට අවශ්‍ය වාහන ආනයනය කිරීමට බවයි මුදල් රාජ්‍ය අමාත්‍යවරයා කියාසිටියේ.
පොදු ප්‍රවාහනය සඳහා යොදා ගනු ලබන වාහන ආනයනය සඳහා පනවා තිබූ සීමා ලිහිල් කරන ගැසට් නිවේදනය ඉදිරි දින කිහිපය ඇතුලත නිකුත් කිරීමටයි මුදල් අමාත්‍යාංශය තීරණය කර ඇත්තේ.
ඒ අනුව පොදු ප්‍රවාහනය සඳහා භාවිත කරන ලොරි, ට්‍රක් සහ බස් රථ ආනයනයට පැනවූ සීමාවන් මෙම ගැසට්ටුව හරහා ලිහිල් වනු ඇති.
මූල්‍ය විශ්ලේෂකයන් පවසන්නේ දැනට පවතින විදේශ විනිමය සංචිතවලට සාපේක්ෂව සෙසු වාහන ආනයනය තවදුරටත් ප්‍රමාද වනු ඇති බවයි.
වාහන ආනයනය කඩිනම් කිරීම හරහා යළිත් ඩොලරයේ අගය ඉහළ යා හැකි බව ද ඔවුන් පෙන්වා දෙනවා.